ନୂଆଦିଲ୍ଲୀ,୨୫।୧୨: ଦ୍ରୁତ ବୋଲର୍ ଜସପ୍ରିତ ବୁମ୍ରା ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି)ର ବୋଲିଂ ର଼୍ୟାଙ୍କିଂରେ ୯୦୪ ଅଙ୍କ ହାସଲ କରି ଇତିହାସ ରଚିଛନ୍ତି। ସେ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ଭାରତୀୟ ରେକର୍ଡର ସମକକ୍ଷ ହୋଇଛନ୍ତି। ବୁମ୍ରା ଅଷ୍ଟ୍ରେଲିଆ ବିପକ୍ଷରେ ବ୍ରିସବେନରେ ଖେଳାଯାଇଥିବା ତୃତୀୟ ଟେଷ୍ଟରେ ୯୪ ରନ୍ ଦେଇ ୯ ଉଇକେଟ ନେଇଥିଲେ। ଏଥିରେ ତାଙ୍କୁ ୧୪ ରେଟିଂ ପଏଣ୍ଟ ମିଳିଥିଲା। ଫଳରେ ସେ ଅଶ୍ୱିନଙ୍କ ରେକର୍ଡର ସମକକ୍ଷ ହେବା ସହ ବୋଲର୍ଙ୍କ ର଼୍ୟାଙ୍କିଂରେ ଶୀର୍ଷରେ ନିଜ ସ୍ଥିତି ସୁଦୃଢ଼ କରିଛନ୍ତି। ସେ ୯୦୦ରୁ ଅଧିକ ରେଟିଂ ପାଇଥିବା ପ୍ରଥମ ଭାରତୀୟ ଦ୍ରୁତ ବୋଲର୍ ପାଲଟିଛନ୍ତି।
ବୁମ୍ରାଙ୍କ ନିକଟରେ ଏବେ ଅଷ୍ଟ୍ରେଲିଆ ବିପକ୍ଷରେ ଗୁରୁବାରଠାରୁ ଆରମ୍ଭ ହେଉଥିବା ଚତୁର୍ଥଟେଷ୍ଟ ମ୍ୟାଚ୍ରେ ଭଲ ପ୍ରଦର୍ଶନ କରି ଅଶ୍ୱିନଙ୍କୁ ପଛରେ ପକାଇ ନୂଆ ଭାରତୀୟ ରେକର୍ଡ କରିବାର ସୁଯୋଗ ରହିଛି। ଅଶ୍ୱିନ ଡିସେମ୍ବର୨୦୧୬ରେ ଏହି ଉପଲବ୍ଧି ହାସଲ କରିଥିଲେ। ଏହି ଅଫ୍ ସ୍ପିନର ନିକଟରେ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେଇଛନ୍ତି।
ଭାରତ ବିପକ୍ଷ ଚଳିତ ସିରିଜରେ ଚମତ୍କାର ପ୍ରଦର୍ଶନ କରିଥିବା ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ଟ୍ରାଭିସ ହେଡ ବ୍ୟାଟ୍ସମ୍ୟାନ୍ଙ୍କ ଟେଷ୍ଟ ର଼୍ୟାଙ୍କିଂରେ ଚତୁର୍ଥ ସ୍ଥାନରେ ପହଞ୍ଚିଛନ୍ତି। ତାଙ୍କର ୮୨୫ ରେଟିଂ ପଏଣ୍ଟ ଅଛି। ସେ ଏବେ ଇଂଲଣ୍ଡର ଜୋ ରୁଟ (୮୯୫) ଏବଂ ହ୍ୟାରି ବ୍ରୁକ (୮୭୬) ଏବଂ ନ୍ୟୁଜିଲ୍ୟାଣ୍ଡର ପୂର୍ବତନ ଅଧିନାୟକ କେନ ୱିଲିୟମସନ (୮୬୭) ଙ୍କ ପଛରେ ଅଛନ୍ତି। ଭାରତର ରବିନ୍ଦ୍ର ଜାଡେଜା ୪୨୪ ରେଟିଂ ପଏଣ୍ଟ ସହ ସର୍ବଦଳୀୟ ତାଲିକାରେ ଶୀର୍ଷରେ ରହିଛନ୍ତି। ଗାବାରେ ଚାଲିଥିବା ତୃତୀୟ ଟେଷ୍ଟରେ ତାଙ୍କର ଚାରି ଉଇକେଟ ଏବଂ ୪୨ ରନ ଯୋଗୁ ପ୍ୟାଟ୍ କମିନ୍ସ ଶ୍ରେଷ୍ଠ ୧୦ରେ ଅଛନ୍ତି।
