ଶ୍ରୀନଗର,୨୬।୨: ଜମ୍ମୁ କଶ୍ମୀରର ରାଜୌରୀରେ ଏକ ବଡ଼ ଆତଙ୍କବାଦୀ ଆକ୍ରମଣ ହୋଇଛି। ଏଠାରେ ସେନା ଗାଡ଼ି ଉପରେ ଅନେକ ରାଉଣ୍ଡ ଗୁଳିଚାଳନା କରାଯାଇଛି। ଏହା ପରେ ସୁରକ୍ଷା ବାହିନୀ ପକ୍ଷରୁ ସର୍ଚ୍ଚ ଅପରେ:ନ ଆରମ୍ଭ କରିଛନ୍ତି।
ସୂଚନା ଅନୁଯାୟୀ, ଜମ୍ମୁର ରାଜୌରୀର ସୁନ୍ଦରବନୀ ସେକ୍ଟରରେ ବୁଧବାର ଅପରାହ୍ନ ପ୍ରାୟ ୧୨.୪୫ ସମୟରେ ଏକ ସେନା ଗାଡ଼ି ଉପରେ ୪ ରୁ ୫ ରାଉଣ୍ଡ ଗୁଳିଚାଳନା କରାଯାଇଥିଲା। ଏହି ଘଟଣା ଘଟାଇବା ପରେ ଆତଙ୍କବାଦୀମାନେ ତୁରନ୍ତ ଘଟଣାସ୍ଥଳରୁ ପଳାଇ ଯାଇଥିଲେ। ବର୍ତ୍ତମାନ ଏହି ଘଟଣାରେ କେହି ମୃତ କିମ୍ବା ଆହତ ହୋଇଥିବାର କୌଣସି ଖବର ମିଳିପାରିନାହିଁ। ଅଞ୍ଚଳରେ ସର୍ଚ୍ଚ ଅପରେଶନ ଆରମ୍ଭ ହୋଇଛି ଏବଂ ଆତଙ୍କବାଦୀମାନଙ୍କୁ ଖୋଜା ଚାଲିଛି।
ଜମ୍ମୁର ସୁନ୍ଦରବନୀ ଅଞ୍ଚଳ, ଯେଉଁଠାରେ ଏହି ଆକ୍ରମଣ ଘଟିଛି, ତାହା ଏଲଓସି ସଂଲଗ୍ନ। ସକାଳରୁ ଏଠାରେ ଏକ ସର୍ଚ୍ଚ ଅପରେଶନ ଚାଲିଥିଲା, ଏହି ସମୟରେ ସେନା ଗାଡ଼ି ଉପରେ ଆକ୍ରମଣ ହୋଇଛି। ସେନା ଏପର୍ଯ୍ୟନ୍ତ ଏହାକୁ ଆନୁଷ୍ଠାନିକ ଭାବରେ ନିଶ୍ଚିତ କରିନାହିଁ। ଏହି ଅଞ୍ଚଳ ପାକିସ୍ତାନ ସୀମା ସଂଲଗ୍ନ, ତେଣୁ ପୋଲିସକୁ ବର୍ତ୍ତମାନ ସେଠାକୁ ଯିବାକୁ ଅନୁମତି ଦିଆଯାଉନାହିଁ। ସେନା ନିଜେ ସେଠାରେ ସର୍ଚ୍ଚ ଅପରେଶନ କରୁଛି।
