ମହାକାଳପଡ଼ା, ୧୯ା୨(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମାର୍ଶାଘାଇ-ଜମ୍ବୁ ରାସ୍ତାର ଉନ୍ନତି ଓ ପ୍ରଶସ୍ତୀକରଣ ପ୍ରକଳ୍ପ ନିମନ୍ତେ ମହାକାଳପଡ଼ା ତହସିଲ ଅନ୍ତର୍ଗତ ଦୁଇଟି ଗ୍ରାମ ତଥା ଚଡେଇଗୁଅଁା ଓ ମହାକାଳପଡା ରାଜସ୍ବ ଗ୍ରାମର ପ୍ରସ୍ତାବିତ ୦. ୯୮୯୦ ଏକର ଘରୋଇ ଜମି ଅଧିଗ୍ରହଣର ଏକ ଜନ ଶୁଣାଣି ମହାକାଳପଡ଼ା ପଞ୍ଚାୟତ ଅଫିସ ସଭାଗୃହରେ ବୁଧବାର ଅନୁଷ୍ଠିତ ହୋଇଯାଇଛି। ଏଥିରେ ଉକ୍ତ ଦୁଇଟି ଗ୍ରାମରେ ଜମି ହରାଇବାକୁ ଥିବା ୫୦ରୁ ଊର୍ଦ୍ଧ୍ୱ ବ୍ୟକ୍ତି ଯୋଗଦେଇ ନିଜ ନିଜର ମତ ରଖିଥିଲେ। ରାଜ୍ୟ ସରକାରଙ୍କ ଜମି ଅଧିଗ୍ରହଣ ଆଇନ ୨୦୧୩ ଓ ନିର୍ଦ୍ଧାରିତ ନିୟମ ଅନୁସାରେ କ୍ଷତିଗ୍ରସ୍ତ ଘରୋଇ ଜମି ମାଲିକମାନଙ୍କୁ ଉପଯୁକ୍ତ କ୍ଷତିପୂରଣ ଅର୍ଥ ପ୍ରଦାନ କରାଯିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି। ତେଣେ ରାସ୍ତା ପାଇଁ ଆଗାମୀ ଦିନରେ ୧୧ ଗ୍ରାମର ଘରୋଇ ଜମି ଅଧିଗ୍ରହଣ କରାଯିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।
ଅଦ୍ୟାବଧି ଜମ୍ବୁ-ମାର୍ଶାଘାଇ ନୂତନ ରାସ୍ତା ନିର୍ମାଣ ଦ୍ରୁତଗତିରେ ଚାଲିଛି। ଏହାର ଦକ୍ଷିଣ ପାର୍ଶ୍ୱରେ ଆଉ ଏକ ନୂଆ ଦୋହରୀକରଣ ରାସ୍ତା ତିଆରି ପାଇଁ ରାଜ୍ୟ ପୂର୍ତ୍ତ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି। ଏହି କାର୍ଯ୍ୟ ସମ୍ପୂର୍ଣ୍ଣ ହେଲେ ମହାକାଳପଡ଼ା ଉପକୂଳ ଅଞ୍ଚଳରେ ଶିଳ୍ପ ପ୍ରତିଷ୍ଠା ପାଇଁ ନୂଆ ସମୀକରଣ ସୃଷ୍ଟି ହୋଇପାରିବ ବୋଲି ସ୍ଥାନୀୟ ଲୋକମାନେ କହିଛନ୍ତି । ଅପର ପକ୍ଷରେ ଏହି ଅଞ୍ଚଳର ବିକାଶ ପାଇଁ ରାଜ୍ୟ ସରକାର ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛନ୍ତି।
ଏହି ଜନ ଶୁଣାଣି ଭୂ-ଅର୍ଜନ ବିଭାଗ ଓ ଜିଲା ପ୍ରଶାସନ ପକ୍ଷରୁ ପରିଚାଳିତ କରାଯାଇଥିଲା। ଜିଲା ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ (ପ୍ରଶାସନ) ରବୀନ୍ଦ୍ର କୁମାର ମଲିକ, ଜିଲା ଭୂ-ଅର୍ଜନ ଅଧିକାରୀ ଅମରେଶ ସାହୁ, ସର୍ଭେ ଅଧିକାରୀ ସୀମାଞ୍ଚଳ ପଣ୍ଡା, ମହାକାଳପଡା ପୂର୍ତ୍ତ ବିଭାଗ ଏସ୍ଡିଓ ଦୈତାରୀ ଟୁଡୁ, ଦେବାଶିଷ ସାମଲ ଓ ମହାକାଳପଡା ସରପଞ୍ଚ ରତିକାନ୍ତ ପଣ୍ଡାଙ୍କ ସମେତ ଘରୋଇ ଜମି ମାଲିକମାନଙ୍କ ମଧ୍ୟରେ ସାରଦା ପ୍ରସାଦ ଚୌଧୁରୀ, ସରୋଜ କୁମାର ପଣ୍ଡା, ଶିବ ପ୍ରସାଦ ଚୌଧୁରୀ, ଶୈଳେନ୍ଦ୍ର ଚୌଧୁରୀ, ନଗେନ୍ଦ୍ର ଚୌଧୁରୀ, ସୌଭାଗ୍ୟ ବାହାଲିଆ, ରାଜେନ୍ଦ୍ର ଚୌଧୁରୀ, ସଞ୍ଜୟ କୁମାର ଚୌଧୁରୀ, ଗୋକୁଳି ସେଠୀ ଓ ଚିତ୍ତ ରଞ୍ଜନ ବାହାଲିଆଙ୍କ ସହିତ ଅନ୍ୟ ଚାଷୀମାନେ ଯୋଗଦେଇ ନିଜ ନିଜର ବକ୍ତବ୍ୟ ରଖିଥିଲେ। ଏ ସମ୍ପର୍କରେ ଅତିରିକ୍ତ ଜିଲାପାଳ ରବୀନ୍ଦ୍ର କୁମାର ମଲିକଙ୍କୁ ପଚାରିବାରେ ଏହି ଅଞ୍ଚଳ ଭବିଷ୍ୟତ ଉନ୍ନତି ପାଇଁ ପ୍ରଶାସନ ପକ୍ଷରୁ ସମସ୍ତ ସହଯୋଗ ଯୋଗାଇ ଦିଆଯାଉଛି। ଆଉ ଏକ ନୂଆ ଏୟାର ଷ୍ଟ୍ରିପ୍ ନିର୍ମାଣ ପ୍ରସ୍ତାବ ରହିଛି ବୋଲି କହିଛନ୍ତି।