ନୂଆଦିଲ୍ଲୀ: ଚାଇନାର ସବୁଠାରୁ ଧନୀ ବ୍ୟକ୍ତି ଜ୍ୟାକ ମା ୨.୫ ଲକ୍ଷ କୋଟି ମୂଲ୍ୟର ଇନିସିଆଲ ପବ୍ଲିକ ଅଫରିଂ (ଆଇପିଓ) ଆଣିବା ନେଇ ଯୋଜନା ରଖିଥିଲେ। ଏହା ଦୁନିଆର ସବୁଠାରୁ ବଡ ଆଇପିଓ ହୋଇଥାନ୍ତି। ଆଣ୍ଟ ଗ୍ରୁପ୍ର ଏହି ଆଇପିଓ ଯୋଜନା ଉପରେ ଚାଇନା ପ୍ରତିବନ୍ଧକ ଲଗାଇଛି। ଏହାର ଲିଷ୍ଟିଂକୁ ସାଂଘାଇ ଷ୍ଟକ ଏକ୍ସଚେଞ୍ଜ ରଦ୍ଦ କରି ଦେଇଛି। ଚାଇନାରରେ ହଠାତ୍ ନିୟମ ପରିବର୍ତ୍ତନ ହେବା ଯୋଗୁ ଏଭଳି ସ୍ଥିତି ଉପୁଜିଛି। କାହିଁକି ଲିଷ୍ଟିଂ ଉପରେ କଟକଣା ଲାଗିଲା ସେ ନେଇ ଚାଇନା ଷ୍ଟକ ବଜାର କର୍ତ୍ତୃପକ୍ଷ କିଛି ସ୍ପଷ୍ଟ ଭାବେ କହିନାହାନ୍ତି। ସେହିଭଳି ହଂକଂ ଲିଷ୍ଟିଂ ମଧ୍ୟ ବାତିଲ କରାଯାଇଥିବା ଆଣ୍ଟ ଗ୍ରୁପ ପକ୍ଷରୁ ଷ୍ଟକ ବଜାରକୁ ସୂଚନା ଦିଆଯାଇଛି। ଗୁରୁବାର ଏହି ଫିନ୍ଟେକ କମ୍ପାନୀର ଶୁଭାରମ୍ଭ ହେବା ନେଇ ଆଶା କରାଯାଉଥିଲା। ଆଣ୍ଟରେ ଆଲିବାବା ଗ୍ରୁପ୍ର ଅଂଶଧନ ରହିଛି। ଆଇପିଓ ଅଟକିବା ଯୋଗୁ କମ୍ପାନୀର ଶେୟାର କାରବାର ୮% କମିଥିବା ଜଣାପଡିଛି। ଏ ସମ୍ପର୍କରେ ଆଣ୍ଟ ଗ୍ଲୋବାଲ କର୍ତ୍ତୃପକ୍ଷଙ୍କ ମତାମତ ଲୋଡାଯାଇଥିଲେ ମଧ୍ୟ ଏହା ମିଳିପାରିନାହିଁ। ସେହିଭଳି ଜ୍ୟାକ୍ ମାଙ୍କ ଫାର୍ମ ବିଭିନ୍ନ ତଦନ୍ତ ସାମ୍ନା କରିବ ବୋଲି ରିପୋର୍ଟ ପ୍ରକାଶ ପାଇଛି। କମ୍ପାନୀ ଉପରେ ବିଭିନ୍ନ କଟକଣା ଲାଗିପାରେ ବୋଲି ଶୁଣାଯାଉଛି। ନୂଆ ଆଇପିଓ ଆଣିବା ଲାଗି ଆଣ୍ଟ ଗତବର୍ଷ ନିଷ୍ପତ୍ତି ଗ୍ରହଣ କରିଥିଲା। ନୂଆ ଚିନ୍ତାଧାରା ଗ୍ରହଣ ଦିଗରେ ନିୟାମକ ବାଧକ ସାଜୁଥିବା ଜ୍ୟାକ ମା କହିଥିଲେ। ଏହି ପ୍ରସଙ୍ଗରେ ସେ ଚାଇନା ସମେତ ବିଶ୍ୱର ନିୟାମକଙ୍କୁ ସମାଲୋଚନା କରିବା ଭାରି ପଡିଲା। ଫଳରେ ଚାଇନା ଆଇପିଓ ଲିଷ୍ଟିଂକୁ ଅଟକାଇ ଦେଇଛି ବୋଲି ଆଲୋଚନା ହେଉଛି।
