ନୂଆଦିଲ୍ଲୀ,୯।୩: କଂଗ୍ରେସର ବ୍ୟାଙ୍କ ଆକାଉଣ୍ଟ ଉପରେ ଆୟକର (ଆଇଟି) ବିଭାଗର କାର୍ଯ୍ୟାନୁଷ୍ଠାନ ବନ୍ଦ ଲାଗି ଦଳ ପକ୍ଷରୁ କରାଯାଇଥିବା ଆବେଦନକୁ ଆୟକର ଆପିଲେଟ୍ ଟ୍ରିବ୍ୟୁନାଲ ଶୁକ୍ରବାର ଖାରଜ କରିଦେଇଛନ୍ତି। ଫଳରେ ଲୋକ ସଭା ନିର୍ବାଚନ ପୂର୍ବରୁ କଂଗ୍ରେସକୁ ଶକ୍ତ ଧକ୍କା ଲାଗିଛି। ଆୟକର ଟ୍ରିବ୍ୟୁନାଲଙ୍କ ରାୟକୁ ୧୦ ଦିନ ପାଇଁ ସ୍ଥଗିତ ରଖିବା ନିମନ୍ତେ ଦଳ ପକ୍ଷରୁ ଆଇନଜୀବୀ ବିବେକ ତଙ୍ଖା ଅପିଲ କରିଛନ୍ତି। ରାୟ ବିରୋଧରେ ଦଳ ଖୁବ୍ଶୀଘ୍ର ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହେବ ବୋଲି କଂଗ୍ରେସ କୋଷାଧ୍ୟକ୍ଷ ଅଜୟ ମାକେନ୍ କହିଛନ୍ତି।
ସୂଚନାଯୋଗ୍ୟ ୨୦୧୮-୧୯ ଆର୍ଥତ୍କ ବର୍ଷରେ କଂଗ୍ରେସ ୨୧୦ କୋଟି ଟଙ୍କାର ଟିକସ ଏବଂ ଜରିମାନା ପୈଠ କରି ନ ଥିବାରୁ ଆୟକର ବିଭାଗ ଏହାର ୧୧୫ କୋଟି ଟଙ୍କାର ବ୍ୟାଙ୍କ ଆକାଉଣ୍ଟକୁ ଅଚଳ କରିଦେଇଥିବା ଗତ ମାସ ୧୬ ତାରିଖରେ ଦଳ ପକ୍ଷରୁ ଅଭିଯୋଗ ହୋଇଥିଲା। ଏହା ବିରୋଧରେ କଂଗ୍ରେସର ପିଟିଶନ ଆୟକର ଟ୍ରିବ୍ୟୁନାଲରେ ବିଚାରାଧୀନ ଥିବାବେଳେ ଦଳର ୩ ବ୍ୟାଙ୍କ ଆକାଉଣ୍ଟରୁ ଆୟକର ବିଭାଗ ୬୫ କୋଟି ଟଙ୍କା ଉଠାଇ ନେଇଥିବା ଦିନକ ପରେ ମାକେନ୍ ଅଭିଯୋଗ ଆଣିଥିଲେ। ଭାଜପା କେନ୍ଦ୍ରୀୟ ଏଜେନ୍ସିଗୁଡ଼ିକର ଦୁରୁପଯୋଗ କରୁଛି ବୋଲି କଂଗ୍ରେସ ଏହାର ଅଭିଯୋଗକୁ ଦୋହରାଇବା ସହ ଟିକସ ଦାବି ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହିଥିଲା। ନିର୍ବାଚନ ପ୍ରସ୍ତୁତିକୁ ଭଣ୍ଡୁର କରିବା ପାଇଁ ଆୟକର ବିଭାଗ ଦ୍ୱାରା ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଭାଜପା ସରକାର ଆର୍ଥତ୍କ ଆତଙ୍କବାଦ ସୃଷ୍ଟି କରିବା ସହ ନିର୍ବାଚନ ପୂର୍ବରୁ ମୁଖ୍ୟ ବିରୋଧୀ ଦଳକୁ ଅଚଳ କରିଦେବା ପାଇଁ ଉଦ୍ୟମ କରୁଛି ବୋଲି ଅଭିଯୋଗ ହୋଇଥିଲା। ସାଧାରଣ ନିର୍ବାଚନ ପୂର୍ବରୁ ଆୟକର ବିଭାଗ ଦଳୀୟ ପାଣ୍ଠିକୁ ଜବତ କରିବାକୁ ଟ୍ରିବ୍ୟୁନାଲ ନିର୍ଦ୍ଦେଶ ଦେବା ଗଣତନ୍ତ୍ର ଉପରେ ଆକ୍ରମଣ। ଏଭଳି ସ୍ଥିତିରେ ଜଣେ ସ୍ବଚ୍ଛ ଓ ଅବାଧ ନିର୍ବାଚନ କିପରି ଆଶା କରିବ ବୋଲି ମାକେନ୍ ପ୍ରଶ୍ନ କରିଛନ୍ତି। ଆମେ ଆୟକର ଟ୍ରିବ୍ୟୁନାଲଙ୍କ ନିଷ୍ପତ୍ତିରେ ଅସନ୍ତୁଷ୍ଟ ଏବଂ ହାଇକେର୍ଟଙ୍କ ଦ୍ୱାରସ୍ଥ ହେବୁ। ଟ୍ରିବ୍ୟୁନାଲ ନିଜର ପୂର୍ବ ରାୟକୁ ଅନୁସରଣ କରି ନାହାନ୍ତି। ପୂର୍ବରୁ ଏକ ରାୟରେ ଟ୍ରିବ୍ୟୁନାଲ ବକେୟା ଦେୟର ୨୦ ପ୍ରତିଶତ ପୈଠ କରିଥିବା ଏକ ଜାତୀୟ ଦଳକୁ କାର୍ଯ୍ୟାନୁଷ୍ଠାନରୁ ମୁକ୍ତ କରିଥିଲେ ବୋଲି ଆଇନଜୀବୀ ତଙ୍ଖା କହିଛନ୍ତି।
