ନୂଆଦିଲ୍ଲୀ,୧୩।୧: ଭାରତୀୟ ଦଳର ଷ୍ଟାର କ୍ରିକେଟର୍ ବିରାଟ କୋହଲିଙ୍କ ଅଧିନାୟିତକତ୍ୱ ସମୟ ଉପ-ଅଧିନାୟକ ଭାବରେ ଦୀର୍ଘ ଦିନ ଧରି କାର୍ଯ୍ୟ କରିଥିବା ଅଜିଙ୍କ୍ୟ ରାହାଣେ ଏକ ବଡ଼ ଖୁଲାସା କରିଛନ୍ତି। ସେ କୋହଲିଙ୍କୁ ନେଇ ଏକ ବଡ଼ କଥା କହିଛନ୍ତି। କୋହଲିଙ୍କ ସମାଲୋଚକମାନଙ୍କର ଏକ ଗୋଷ୍ଠୀ ତାଙ୍କୁ ଅହଂକାରୀ ବୋଲି ଭାବନ୍ତି। ରାହାଣେ ବିଶ୍ୱାସ କରନ୍ତି ଯେ, ବାହାର ଲୋକମାନେ ଖେଳ ପ୍ରତି ତାଙ୍କର ଚିନ୍ତାଧାରା ଏବଂ ମନୋଭାବକୁ ଭୁଲ ବୁଝନ୍ତି।
ରାହାଣେ ଏକ ସାକ୍ଷାତକାରରେ କହିଛନ୍ତି, ବିରାଟ କୋହଲିଙ୍କ ବିଷୟରେ ଯେତେ ଆଲୋଚନା କଲେ ମଧ୍ୟ ତାହା ଯଥେଷ୍ଟ ନୁହେଁ। ମୁଁ ତାଙ୍କୁ ନିକଟରୁ ଦେଖିଛି। ଯେତେବେଳେ ସେ ବ୍ୟାଟିଂ କରିବାକୁ ଯାଆନ୍ତି ସେତେବେଳେ ଆମେ ତାଙ୍କ ଆଗ୍ରହ ବିଷୟରେ କଥା ହେଉ। ତାଙ୍କର ଶିଖିବାର ଆଗ୍ରହ ସବୁବେଳେ ଥାଏ। ତାଙ୍କର ମନୋଭାବ ତାଙ୍କୁ ସବୁଠୁ ଅଲଗା କରିଥାଏ। ବାହାର ଲୋକମାନେ ତାଙ୍କୁ ଅହଂକାରୀ ବୋଲି ଭାବନ୍ତି, କିନ୍ତୁ ଏହା ସତ୍ୟ ନୁହେଁ। କୋହଲି କେବଳ ତାଙ୍କ ଖେଳରେ ନିଜକୁ ବୁଡ଼ାଇ ଦିଅନ୍ତି।
ରାହାଣେ ଆହୁରି କହିଛନ୍ତ, ନୀରବ ରହିବା ଅର୍ଥ ଅହଂକାର ନୁହେଁ। ଏହା ଖେଳ ଉପରେ ଧ୍ୟାନ ଦେବାର ତାଙ୍କର ଉପାୟ। ମୁଁ ତାଙ୍କୁ ମ୍ୟାଚର ଦୁଇ ଦିନ ପୂର୍ବରୁ ଦେଖିଛି। ସେ ବହୁତ କମ କଥା ହୁଅନ୍ତି, ସାଥୀ ଖେଳାଳିଙ୍କ ସହିତ କିଛି କଥା ହୁଅନ୍ତି ନାହିଁ। ସେ କେବଳ ନିଜର ଜୋନ ସୃଷ୍ଟି କରନ୍ତି। ସେ ତାଙ୍କ ଏୟାରପଡ୍ସରେ ଯାହା ପସନ୍ଦ କରନ୍ତି ତାହା ଶୁଣନ୍ତି। ଏହା ତାଙ୍କୁ ଧ୍ୟାନ କେନ୍ଦ୍ରିତ କରିବାରେ ସାହାଯ୍ୟ କରେ। ଖେଳରେ ସବୁକିଛି ହାସଲ କରିବା ସତ୍ତ୍ୱେ, ବିରାଟ କୋହଲିଙ୍କ ପାଖରେ ଏବେ ବି ଇଚ୍ଛା ଅଛି। ତାଙ୍କର କାର୍ଯ୍ୟ ନୀତି ମଧ୍ୟ ଚମତ୍କାର।
ବିରାଟ କୋହଲି ବର୍ତ୍ତମାନ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜରେ ଖେଳୁଛନ୍ତି। ପ୍ରଥମ ମ୍ୟାଚରେ ସେ ୯୩ ରନର ଏକ ଚମତ୍କାର ଇନିଂସ ଖେଳିଥିଲେ, ଯାହା ପାଇଁ ସେ ମ୍ୟାଚର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ। ସେ ପୂର୍ବରୁ ବିଜୟ ହଜାରେ ଟ୍ରଫିରେ ଏକ ଶତକ ହାସଲ କରିଥିଲେ। ଏହା ପୂର୍ବରୁ, ସେ ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଇଥିବା ତିନୋଟି ଦିନିକିଆ ମଧ୍ୟରୁ ଦୁଇଟିରେ ଶତକ ହାସଲ କରିଥିଲେ।
Dharitri – Odisha’s No.1 Odia Daily
