ଭୁବନେଶ୍ଵର,୧୬ା୧: ବିଜେଡି ସଭାପତି ନବୀନ ପଟ୍ଟନାୟକଙ୍କ ଏକ ବଡ଼ ନିଷ୍ପତ୍ତି କ୍ରମେ ଦଳରୁ ଦୁଇ ବିଧାୟକ ଅରବିନ୍ଦ ମହାପାତ୍ର (ପାଟକୁରା) ଏବଂ ସନାତନ ମହାକୁଡ଼ (ଚମ୍ପୁଆ)ଙ୍କୁ ନିଲମ୍ବିତ କରାଯାଇଛି। ଦଳ ବିରୋଧୀ କାର୍ଯ୍ୟ ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ବେଳେ ଏହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
ପାଟକୁରା ବିଧାୟକ ଅରବିନ୍ଦ ମହାପାତ୍ର ବିଭିନ୍ନ ସମୟରେ ବିଧାନସଭା ଭିତରେ ଓ ବାହାରେ ଦେଇଥିବା ମନ୍ତବ୍ୟ ତାଙ୍କ ପାଇଁ ଅଡୁଆ ସୃଷ୍ଟି କରିଛି। ସେ ବାରମ୍ବାର ପୂର୍ବ ସରକାର ସମୟର ପ୍ରଭାବଶାଳୀ ଅଫିସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ସରକାରଙ୍କୁ ଉସ୍କାଉଥିଲେ, ଯାହା ବିଜେଡିକୁ ଅଡୁଆରେ ପକାଉଥିଲା।
ସେ କହିଥିଲେ, “ନବୀନ ମୋ ନେତା, ପାଣ୍ଡିଆନ ନେତା ନୁହନ୍ତି।” ଏପରିକି ସେ ପୂର୍ବ ସରକାରର ଅଫିସରମାନଙ୍କ ଦୁର୍ନୀତି ବିଷୟରେ ଶାସକ ଦଳକୁ ତଦନ୍ତ କରିବାକୁ ଖୋଲା ଚ୍ୟାଲେଞ୍ଜ ଦେଇଥିଲେ। ବିଜେଡିରେ ଭିକେ ପାଣ୍ଡିଆନଙ୍କ ପ୍ରଭାବ ଥିବା ବେଳେ ଅରବିନ୍ଦଙ୍କର ଏହି ‘ନବୀନ-କେନ୍ଦ୍ରିକ’ ଆଭିମୁଖ୍ୟ ଏବଂ ପରୋକ୍ଷରେ ପାଣ୍ଡିଆନଙ୍କୁ ଅସ୍ୱୀକାର କରିବା ହିଁ ତାଙ୍କ ନିଲମ୍ବନର ପ୍ରମୁଖ କାରଣ ବୋଲି କୁହାଯାଉଛି।
ଅନ୍ୟପଟେ ସନାତନ ମହାକୁଡ଼ ମଧ୍ୟ ଦଳୀୟ କାର୍ଯ୍ୟଧାରାକୁ ସମାଲୋଚନା କରିବା ସହ ବିଜେପି ପ୍ରତି ନରମ ଆଭିମୁଖ୍ୟ ରଖୁଥିବା ଅଭିଯୋଗ ହୋଇଥିଲା। ତେବେ ଅରବିନ୍ଦ ଓ ସନାତନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ଦଳ ସ୍ପଷ୍ଟ ସଙ୍କେତ ଦେଇଛି ଯେ, ନବୀନଙ୍କ ସହ ପାଣ୍ଡିଆନଙ୍କ ନେତୃତ୍ୱକୁ ମଧ୍ୟ ଗ୍ରହଣ କରିବାକୁ ପଡ଼ିବ। ଆଗକୁ ରାଜ୍ୟସଭା ନିର୍ବାଚନ ଥିବାରୁ ଦଳରେ କୌଣସି ପ୍ରକାରର ଅସନ୍ତୋଷ କିମ୍ବା ଗୋଷ୍ଠୀକନ୍ଦଳକୁ ବରଦାସ୍ତ କରାଯିବ ନାହିଁ ବୋଲି ଏହି ନିଲମ୍ବନ ଜରିଆରେ ବାର୍ତ୍ତା ଦିଆଯାଇଛି।