ଯାଜପୁର ଅଫିସ,୧୫ା: ମହାଭାରତର କିମ୍ବଦନ୍ତୀ ବହନ କରୁଥିବା ବ୍ୟାସ ସରୋବରର ସୌନ୍ଦର୍ଯ୍ୟକରଣ କାମରେ ବ୍ୟାପକ ଅନିୟମିତତା ହେଉଥିବା ଦେଖିବାକୁ ମିଳିଛି। ଏହି କାର୍ଯ୍ୟରେ ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ କିମ୍ବା ପୂର୍ତ୍ତ ବିଭାଗର କର୍ତ୍ତୃତ୍ୱ ନାହିଁ । ଯେଉଁ ସରକାରୀ ଅଧିକାରୀଙ୍କୁ ପଚାରିଲେ କେହି କିଛି ଜାଣି ନାହାନ୍ତି ବୋଲି ଉତ୍ତର ମିଳୁଛି। ଏଭଳି ସ୍ଥିତିରେ ଠିକାସଂସ୍ଥାର ମନମାନି ଯୋଗୁ ମଞ୍ଜୁର ହୋଇଥିବା ୬୪ କୋଟି ଟଙ୍କା ପାଣିରେ ପଡିବ ବୋଲି ମତପ୍ରକାଶ ପାଇଛି। ଏହି ପ୍ରକଳ୍ପ ପାଇଁ ପୂର୍ବରୁ ପ୍ରସ୍ତୁତ ହୋଇଥିବା ବ୍ଲୁ ପ୍ରିଣ୍ଟରେ ବ୍ୟାସସରୋବର ପାର୍କ ଅଞ୍ଚଳକୁ ପ୍ରବେଶ ପଥ ୪ଲେନ୍ ହେବ ବୋଲି ଦର୍ଶାଇଥିବାବେଳେ ଏବେ ୧ ଲେନ୍ ବିଶିଷ୍ଟ ରାସ୍ତା ନିର୍ମାଣ କରାଯାଉଛି। ଏହାସହ ପୋଖରୀର ଆୟତନ ଓ ଗଭୀର, ପାଚେରୀ ନିର୍ମାଣରେ ବ୍ୟତିକ୍ରମ କରାଯାଇ ଆବଣ୍ଟିତ ଅର୍ଥରୁ ସିଂହଭାଗ ଅର୍ଥ ବାଟମାରଣା କରାଯାଉଥିବା ଅଭିଯୋଗ ହେଉଛି।
ଯାଜପୁର ଜିଲା ବ୍ୟାସନଗର ପୌର ପରିଷଦ ଅନ୍ତର୍ଗତ ସହରୀ ଜଙ୍ଗଲ ସୃଷ୍ଟି କରି ପ୍ରଦୂଷଣ ନିୟନ୍ତ୍ରଣ ଏବଂ ନିଯୁକ୍ତି ସୃଷ୍ଟି କରିବା ଉଦ୍ଦେଶ୍ୟରେ ବ୍ୟାସସରୋବର ପୀଠର ସୌନ୍ଦର୍ଯ୍ୟକରଣ କରାଯାଉଛି। ଏଥିପାଇଁ ଏନ୍ବିସିସି (ନ୍ୟାଶନାଲ ବିଲ୍ଡିଂ କନଷ୍ଟ୍ରକ୍ସନ କାର୍ପୋରେଶନ) ଜରିଆରେ ଦିଲ୍ଲୀର କ୍ରିଷ୍ଣା ବିଲ୍ଡର ଠିକାସଂସ୍ଥା ନିୟୋଜିତ ହୋଇଛି। ତେବେ ଏହି କାର୍ଯ୍ୟରେ ପ୍ରଥମ ପର୍ଯ୍ୟାୟରୁ ହିଁ ଅନେକ ଅନିୟମିତା ହେଉଥିବା ଦେଖିବାକୁ ମିଳିଛି। ଉକ୍ତ ପାଚେରୀ ପାଇଁ ପ୍ରାୟ ୬ ଫୁଟ ଗାତ ଖୋଲା ଯାଇ ପିଲର ସହ ତଳ ଅଂଶରେ କଂକ୍ରିଟ କରାଯାଉଥିବାବେଳେ ମଝି ପ୍ରାୟ ୩ ଫୁଟ ଇଟା ଯୋଡା ଯାଇଛି। ସେଠାରୁ ମାଟି ଉପରସ୍ତର ପର୍ଯ୍ୟନ୍ତ ପୁଣି କଂକ୍ରିଟ ହୋଇଛି। ଖୋଲା ଗାତରେ ବାଲି ସ୍ଥାନରେ ମାଟି ଓ ମୋରମ ପୋତା ଯାଉଛି। ଏଭଳି ପାଚେରୀ ନିର୍ମାଣ ପ୍ରାୟ ୫୦ ଏକର ପରିମିତ ଅଞ୍ଚଳରେ ହୋଇଛି। ବନ୍ୟା ସମୟରେ ଗଣ୍ଡାନାଳ ପାଣି ଏଠାରେ ସମୁଦ୍ର ଭଳି ଭ୍ରମ ସୃଷ୍ଟି କରିଥାଏ। ତେଣୁ ବନ୍ୟା ପାଣିକୁ ଏଭଳି ଦୁର୍ବଳ କାମ ସମ୍ଭାଳି ପାରିବା ନେଇ ସନ୍ଦେହ ସୃଷ୍ଟି ହୋଇଛି। ଯଦି ଲଗାତାର ପ୍ରବଳ ବର୍ଷା ହୁଏ ଗଣ୍ଡାନାଳା ପାଣି ପାଚେରୀ ସହ ପୋଖରୀ କାମକୁ ଧୋଇ ନେଇପାରେ ବୋଲି ସାଧାରଣରେ ଆଶଙ୍କା ପ୍ରକାଶ ପାଇଛି। ଏହାପରେ ଏନ୍ବିସିସି ଏତିକିରେ କାମ ସରିଲା ବୋଲି କହି ଫେରାର ମାରିପାରେ ବୋଲି ମଧ୍ୟ କେତେଜଣ ମତ ଦେଇଛନ୍ତି ା ଆବଶ୍ୟକ ନିର୍ମାଣ ସାମଗ୍ରୀ ବ୍ୟବହାର ହେଉ ନ ଥିବାରୁ ରାସ୍ତାର ଦୀର୍ଘ ସ୍ଥାୟିତ୍ୱ ନେଇ ସଂଶୟ ପ୍ରକାଶ ପାଇଛି। ଏହି ସୌନ୍ଦର୍ଯ୍ୟକରଣ କାମରେ ପୋଖରୀ, ଘାଟ, ବୋଟିଂ ସୁବିଧା, ହସ୍ତିନାପୁର, ଭଗବାନ କୃଷ୍ଣ, ବ୍ୟାସଦେବ ମୂର୍ତ୍ତି, ପାଣ୍ଡବ ଓ କୌରବ, ଦୌପଦୀ, ଚକ୍ରବ୍ୟୁହ, ମାଛଆଖି, ଭୀଷ୍ମଙ୍କ ଶରଶଯ୍ୟା, ବିଶ୍ୱରୂପ ଭଳି ଦୃଶ୍ୟ ନିର୍ମାଣ କରିବାକୁ ଯୋଜନା ରହିଛି।
