ଓ୍ବାଶିଂଟନ୍,୧୩।୩:ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ G7 ନେତାଙ୍କ ସହ ଏକ ଭର୍ଚୁଆଲ ବୈଠକ କରିଛନ୍ତି। ଏହି ବୈଠକ ସମୟରେ ଇରାନ ଏବେ ଆତ୍ମସମର୍ପଣ କରିବାକୁ ଯାଉଛି। ଇରାନର ସ୍ଥିତି ଦୁର୍ବଳ ହୋଇଯାଇଛି ଏବଂ ସଂଘର୍ଷର ଫଳାଫଳ ଏବେ ସ୍ପଷ୍ଟ ହେବାରେ ଲାଗିଛି ବୋଲି ଟ୍ରମ୍ପ କହିଛନ୍ତି। ତଥାପି ହ୍ବାଇଟ ହାଉସ ଏପର୍ଯ୍ୟନ୍ତ ଏହି ଦାବି ସମ୍ପର୍କରେ କୌଣସି ତୁରନ୍ତ ସରକାରୀ ପ୍ରତିକ୍ରିୟା ଜାରି କରିନାହିଁ।
G7 ନେତାଙ୍କ ସହ ଅନୁଷ୍ଠିତ ଅନଲାଇନ ବୈଠକରେ ଟ୍ରମ୍ପ ଘୋଷଣା କରିଥିଲେ, ଆମେ ଆମ ସମସ୍ତଙ୍କ ପାଇଁ ବିପଦ ସୃଷ୍ଟି କରୁଥିବା କ୍ୟାନସର୍କୁ ଦୂର କରିଛୁ। ଏହି ପରିପ୍ରେକ୍ଷୀରେ ସେ ‘ଅପରେଶନ ଏପିକ ଫ୍ୟୁରି’ – ଇରାନ ବିରୋଧରେ କରାଯାଇଥିବା ସାମରିକ ଅଭିଯାନର ଫଳାଫଳ ଉପରେ ମଧ୍ୟ ଆଲୋକପାତ କରିଥିଲେ।
ଟ୍ରମ୍ପ ଉଲ୍ଲେଖ କରିଥିଲେ ଯେ, ଇରାନରେ ବର୍ତ୍ତମାନ ଜଣେ ଦୃଢ ନେତାଙ୍କ ଅଭାବ ଅଛି। ଫଳସ୍ବରୂପ, ଦେଶର ଭିତରେ ଏପରି କୌଣସି ବ୍ୟକ୍ତି ନାହିଁ ଯିଏ ଆନୁଷ୍ଠାନିକ ଭାବରେ ଆତ୍ମସମର୍ପଣ ଘୋଷଣା କରିବାକୁ ସକ୍ଷମ।
ମଧ୍ୟପ୍ରାଚ୍ୟରେ ସଂଘର୍ଷ ଆରମ୍ଭ ହେବାର ପ୍ରାୟ ଦୁଇ ସପ୍ତାହ ହୋଇଗଲାଣି ଏବଂ ଏହି ସମୟ ମଧ୍ୟରେ ଡ୍ରୋନ ଏବଂ କ୍ଷେପଣାସ୍ତ୍ର ଆକ୍ରମଣର ଧାରା ଅବିରତ ଜାରି ରହିଛି।
Dharitri – Odisha’s No.1 Odia Daily
