ତେହରାନ୍,୨୪।୩: ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ସମ୍ପର୍କରେ ଆଲୋଚନା ଆରମ୍ଭ କରିବା ପାଇଁ ପ୍ରୟାସ ତୀବ୍ର ହୋଇଛି । ତଥାପି, ପରିସ୍ଥିତି ସ୍ୱାଭାବିକ ହେବା ପରି ମନେ ହେଉନାହିଁ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ଏନର୍ଜି ଭିତ୍ତିଭୂମି ବିରୋଧରେ ୫ ଦିନ ଯୁଦ୍ଧ ସ୍ଥଗିତ ରଖିବା ନେଇ ଘୋଷଣା କରିଛନ୍ତି । ସଦ୍ୟତମ ଘଟଣାକ୍ରମରେ, ଇସ୍ରାଏଲ ରିପୋର୍ଟ କରିଛି ଯେ ଇରାନ ମାଶାଇଲ୍ ଆଟାକ୍ କରୁଛି ।
ଇସ୍ରାଏଲୀ ସେନା ଆଜି ସକାଳେ ଦେଶର ନାଗରିକମାନଙ୍କୁ ଏକ ଜରୁରୀକାଳୀନ ଚେତାବନୀ ଜାରି କରିଛି । ସେନା ପକ୍ଷରୁ କୁହାଯାଇଛି ଯେ, ଇରାନରୁ ଇସ୍ରାଏଲୀ ଅଞ୍ଚଳ ଆଡକୁ ମିଶାଇଲ୍ ଆଟାକ୍ ହେଉଛି । ଯାହା ଫଳରେ ଚଳିତ ସଂଘର୍ଷରେ ଉତ୍ତେଜନା ବୃଦ୍ଧି ପାଇଛି । ଏକ ସଂକ୍ଷିପ୍ତ ବିବୃତ୍ତିରେ, ସେନା ନିଶ୍ଚିତ କରିଛି ଯେ ବାୟୁ ପ୍ରତିରକ୍ଷା ପ୍ରଣାଳୀ ସକ୍ରିୟ ଭାବରେ ଆସୁଥିବା ମିଶାଇଲକୁ ଅଟକାଇବା ପାଇଁ କାର୍ଯ୍ୟ କରୁଛି । ଅନ୍ୟପଟେ ପ୍ରଭାବିତ ଅଞ୍ଚଳରେ ସତର୍କତା ଜାରି ରହିଛି ।
ଅନ୍ୟପଟେ ତେହରାନ୍ ଆମେରିକା ସହିତ ଆଲୋଚନା କରିବାକୁ ମନା କରିବାରୁ ତେଲ ଦର ମଧ୍ୟ ବୃଦ୍ଧି ପାଇଛି । ଟ୍ରମ୍ପ ଇରାନ ଏନର୍ଜି ଭିତ୍ତିଭୂମି ଉପରେ ଆମେରିକାର ଆକ୍ରମଣ ବନ୍ଦ କରିବାର ଘୋଷଣା କରିବା ମାତ୍ରେ ତେଲ ମୂଲ୍ୟ ହ୍ରାସ ପାଇଥିଲା। ଦିନକ ପୂର୍ବରୁ ପ୍ରାୟ ଏକ ପ୍ରତିଶତ ବୃଦ୍ଧି ପାଇବା ପରେ ଅଶୋଧିତ ତେଲ ମୂଲ୍ୟ ୧୪ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଥିଲା। ଏହି ସମୟରେ, ଅନ୍ତର୍ଜାତୀୟ ବେଞ୍ଚମାର୍କ ବ୍ରେଣ୍ଟ ନର୍ଥ ସି ଅଶୋଧିତ ତେଲ ପ୍ରତି ବ୍ୟାରେଲ ୬.୭ ପ୍ରତିଶତ ହ୍ରାସ ପାଇ ୧୦୪.୭୦ ଡଲାରରେରେ ପହଞ୍ଚିଥିଲା। ମୁଖ୍ୟ ଆମେରିକୀୟ ତୈଳ ଚୁକ୍ତିନାମା ୱେଷ୍ଟ ଟେକ୍ସାସ ଇଣ୍ଟରମିଡିଏଟ୍ ୬.୯ ପ୍ରତିଶତ ହ୍ରାସ ପାଇ ୯୧.୪ ଡଲାରରେ ପହଞ୍ଚିଛି ।
ହେଲେ ଇରାନ ଆମେରିକା ସହିତ ଆଲୋଚନା କରିଥିବା କଥା ଅସ୍ୱୀକାର କରିବା ପରେ ନକାରାତ୍ମକ ପ୍ରଭାବ ପକାଇଥିଲା। ମଙ୍ଗଳବାର ପ୍ରାରମ୍ଭିକ ବାଣିଜ୍ୟରେ ତେଲ ମୂଲ୍ୟ ବୃଦ୍ଧି ପାଇଥିଲା, ବ୍ରେଣ୍ଟ ଫ୍ୟୁଚର୍ସ ପ୍ରତି ବ୍ୟାରେଲ ୧.୧ ପ୍ରତିଶତ ବୃଦ୍ଧି ପାଇ ୧୦୧ ଡଲାରରେ ପହଞ୍ଚିଥିଲା ଏବଂ ଆମେରିକା ୱେଷ୍ଟ ଟେକ୍ସାସ ଇଣ୍ଟରମିଡିଏଟ୍ ୧.୮ ପ୍ରତିଶତ ବୃଦ୍ଧି ପାଇ ୮୯.୭୧ ଡଲାରରେ ପହଞ୍ଚିଛି ।
