ନୂଆଦିଲ୍ଲୀ,୧୦।୧: କ୍ରିକେଟ ପ୍ରେମୀଙ୍କ ପାଇଁ ଖୁସି ଖବର। ଆଇପିଏଲ୍ ମାର୍ଚ୍ଚ ମାସ ୨୨ ତାରିଖରୁ ଆରମ୍ଭ ହେବାକୁ ଯାଉଛି। ଚଳିତ ବର୍ଷ ଭାରତରେ ସାଧାରଣ ନିର୍ବାଚନ ସମାନ ସମୟରେ ହେବାର ଅଛି, ତେବେ ବିସିସିଆଇ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଆଇପିଏଲ ଭାରତରେ ହିଁ ଖେଳାଯିବ। କୌଣସି ପରିସ୍ଥିତିରେ ଭାରତରୁ ଆଇପିଏଲ ଅନ୍ୟ କେଉଁ ଦେଶକୁ ସ୍ଥାନାନ୍ତର ହେବ ନାହିଁ।
ବିସିସିଆଇ ପକ୍ଷରୁ କୁହାଯାଇଛି ଯେ, ”ସେପରି କିଛି ନାହିଁ, ଟୁର୍ନାମେଣ୍ଟକୁ ଦେଶ ବାହାରେ ସ୍ଥାନାନ୍ତର କରିବା ଯୋଜନା ନାହିଁ, କାରଣ ସାଧାରଣ ନିର୍ବାଚନ ମଧ୍ୟ ସମାନ ସମୟରେ ହେବ। ଯଦି କୌଣସି ରାଜ୍ୟ ସେହି ସମୟରେ ମ୍ୟାଚ୍ ଆୟୋଜନ କରିବାକୁ ଚାହୁଁନାହାଁନ୍ତି, କୌଣସି ଯଥାର୍ଥ କାରଣ ସହିତ ମ୍ୟାଚ୍ ଅନ୍ୟ ସ୍ଥାନକୁ ସ୍ଥାନାନ୍ତର ହୋଇପାରେ।”
ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଏଥର ଆଇପିଏଲର କାର୍ଯ୍ୟସୂଚୀ ପ୍ରସ୍ତୁତ ହେବ। ସୂଚନାଯୋଗ୍ୟ ଯେ ଚଳିତ ବର୍ଷ ମାର୍ଚ୍ଚରୁ ମେ ମଧ୍ୟରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ଏଭଳି ପରିସ୍ଥିତିରେ, ଏହି ସବୁ ଜିନିଷକୁ ଧ୍ୟାନରେ ରଖି କାର୍ଯ୍ୟସୂଚୀ ପ୍ରସ୍ତୁତ ହେବ ଯାହା ଦ୍ୱାରା ଆଇପିଏଲ୍ ମ୍ୟାଚ୍ ଏବଂ ନିର୍ବାଚନ ସମୟରେ ସୁରକ୍ଷା ବ୍ୟବସ୍ଥାରେ ସନ୍ତୁଳନ ରହିବ ଏବଂ ଆଇନ ଶୃଙ୍ଖଳା ପରିସ୍ଥିତିରେ କୌଣସି ଅସୁବିଧା ହେବ ନାହିଁ। ୨୦୦୯ ରେ ସାଧାରଣ ନିର୍ବାଚନ ହେତୁ ଦକ୍ଷିଣ ଆଫ୍ରିକାରେ ଆଇପିଏଲ୍ ଆୟୋଜିତ ହୋଇଥିଲା। ୨୦୧୪ ମସିହାରେ ମଧ୍ୟ ନିର୍ବାଚନ ହେତୁ ଅର୍ଦ୍ଧ ମ୍ୟାଚ୍ ୟୁଏଇରେ କରିବାକୁ ପଡିଥିଲା।
