ନୂଆଦିଲ୍ଲୀ,୩୧।୩: ଆଇପିଏଲ ୨୦୨୫ ରିଷଭ ପନ୍ତଙ୍କ ପାଇଁ ଭଲ ଚାଲିନାହିଁ। ଏପର୍ଯ୍ୟନ୍ତ ସେ ଦୁଇଟି ମ୍ୟାଚ ଖେଳି ସାରିଛନ୍ତି। ଏହି ସମୟ ମଧ୍ୟରେ ତାଙ୍କ ବ୍ୟାଟ ରନ ସ୍କୋର କରିବାରେ ବିଫଳ ହୋଇଛି। ଦିଲ୍ଲୀ କ୍ୟାପିଟାଲ୍ସ ବିପକ୍ଷ ପ୍ରଥମ ମ୍ୟାଚ୍ରେ ତାଙ୍କର ଖାତା ମଧ୍ୟ ଖୋଲି ନ ଥିଲା। ଗତକାଲି ସନରାଇଜର୍ସ ହାଇଦ୍ରାବାଦ ବିପକ୍ଷରେ ପନ୍ତଙ୍କୁ ସଂଘର୍ଷ କରୁଥିବାର ମଧ୍ୟ ଦେଖାଯାଇଥିଲା। ୨୭ ବର୍ଷୀୟ ଖେଳାଳି ତାଙ୍କ ଫିସ ସହିତ ନ୍ୟାୟ କରିପାରୁ ନାହାଁନ୍ତି। ତାଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି।
୨୭ ମାର୍ଚ୍ଚରେ ହାଇଦ୍ରାବାଦରେ ଲକ୍ଷ୍ନୌ ସୁପରଜାଏଣ୍ଟସ ଏବଂ ସନରାଇଜର୍ସ ହାଇଦ୍ରାବାଦ ମୁହାଁମୁହିଁ ହୋଇଥିଲେ। ଏହି ମ୍ୟାଚ ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯାଇଥିଲା। ଲକ୍ଷ୍ନୌ ଦଳ ପ୍ରଥମେ ବ୍ୟାଟିଂ କରିବାକୁ ଆସିଥିଲା। ଏହି ମ୍ୟାଚ୍ରେ ଅଧିନାୟକ ରିଷଭ ପନ୍ତ କିଛି ବିଶେଷ କରିପାରିଲେ ନାହିଁ। ବାମହାତୀ ବ୍ୟାଟସମ୍ୟାନ ୧୫ ବଲରେ ୧୫ ରନ କରିବା ପରେ ଆଉଟ ହୋଇଥିଲେ। ତାଙ୍କ ଇନିଂସରେ ଗୋଟିଏ ଚୌକା ସାମିଲ ଥିଲା। ହର୍ଷଲ ପଟେଲ ତାଙ୍କୁ ମହମ୍ମଦ ଶାମିଙ୍କ ହାତରେ କ୍ୟାଚ କରାଇ ପାଭିଲିୟନ ପଠାଇ ଦେଇଥିଲେ।
ଦିଲ୍ଲୀ କ୍ୟାପିଟାଲ୍ସ ବିପକ୍ଷ ପ୍ରଥମ ମ୍ୟାଚ୍ରେ ରିଷଭ ପନ୍ତ ସମାନ ପରିସ୍ଥିତିର ସମ୍ମୁଖୀନ ହୋଇଥିଲେ। ୨୪ ମାର୍ଚ୍ଚରେ ଅନୁଷ୍ଠିତ ମ୍ୟାଚ୍ରେ ପନ୍ତ ଶୂନ୍ୟ ସ୍କୋରରେ ଆଉଟ ହୋଇଥିଲେ। ଲକ୍ଷ୍ନୌ ଅଧିନାୟକ ତାଙ୍କ ଇନିଂସ ସମୟରେ ୬ଟି ବଲର ସମ୍ମୁଖୀନ ହୋଇଥିଲେ। ସେ ଏହି ୬ ବଲ୍ରେ ଗୋଟିଏ ବି ରନ କରିପାରି ନ ଥିଲେ। ଏପର୍ଯ୍ୟନ୍ତ ଖେଳାଯାଇଥିବା ଦୁଇଟି ମ୍ୟାଚ ମିଶାଇ ଉଇକେଟକିପର ବ୍ୟାଟସମ୍ୟାନ ମୋଟ ୧୫ ରନ କରିଛନ୍ତି। ତାଙ୍କ ଦଳ ଆଗାମୀ ମ୍ୟାଚ୍ଗୁଡ଼ିକରେ ତାଙ୍କଠାରୁ ଭଲ ପ୍ରଦର୍ଶନ ଆଶା କରିବ।
ଆଇପିଏଲ ୨୦୨୫ ପାଇଁ ହୋଇଥିବା ମେଗା ନିଲାମରେ ରିଷଭ ପନ୍ତ ୨୭ କୋଟି ଟଙ୍କାରେ ବିକ୍ରି ହୋଇଥିଲେ। ଲକ୍ଷ୍ନୌ ସୁପରଜାଏଣ୍ଟ୍ସ ରେକର୍ଡ ବିଡ କରି ପନ୍ତଙ୍କୁ ନିଜ ଦଳରେ ସାମିଲ କରିଥିଲା। ଏହା ସହିତ ପନ୍ତ ଆଇପିଏଲ ଇତିହାସର ସବୁଠାରୁ ମହଙ୍ଗା କ୍ରିକେଟର ମଧ୍ୟ ହୋଇଯାଇଥିଲେ। ସେ ଅଷ୍ଟ୍ରେଲିଆର ମିଚେଲ ଷ୍ଟାର୍କଙ୍କୁ ପଛରେ ପକାଇଥିଲେ। ଗତ ସିଜିନରେ, କୋଲକାତା ନାଇଟ ରାଇଡର୍ସ ଏହି ଘାତକ ଦ୍ରୁତ ବୋଲରଙ୍କୁ ୨୪.୭୫ କୋଟି ଟଙ୍କାରେ କିଣିଥିଲା।
