=ନୂଆଦିଲ୍ଳୀ,୩।୫: IPL 2025ରେ ପ୍ରତ୍ୟେକ ମ୍ୟାଚ ସହିତ ଅରେଞ୍ଜ କ୍ୟାପ ଏବଂ ପର୍ପଲ କ୍ୟାପ ପାଇଁ ଦୌଡ଼ ରୋମାଞ୍ଚକର ହେବାରେ ଲାଗିଛି। ଏହି ଲିଗର ୫୧ତମ ମ୍ୟାଚ ଶେଷ ହେବା ପରେ, ଅରେଞ୍ଜ ଏବଂ ପର୍ପଲ କ୍ୟାପ ତାଲିକାରେ ପୁଣି ଥରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଏହି ମ୍ୟାଚ୍ରେ ଗୁଜରାଟ ବ୍ୟାଟ୍ସମ୍ୟାନ ସାଇ ସୁଦର୍ଶନ ହାଇଦ୍ରାବାଦ ବିପକ୍ଷରେ ୪୮ ରନର ଇନିଂସ ଖେଳି ସୂର୍ଯ୍ୟ କୁମାରଙ୍କୁ ପଛରେ ପକାଇ ଅରେଞ୍ଜ କ୍ୟାପ ଅଧିକାର କରିଥିଲେ।
ହାଇଦ୍ରାବାଦ ବିପକ୍ଷ ଏହି ମ୍ୟାଚ୍ରେ ଗୁଜରାଟର ବୋଲର ପ୍ରସିଦ୍ଧ କ୍ରିଷ୍ଣା ୨ଟି ଉଇକେଟ ନେଇ ପର୍ପଲ କ୍ୟାପ ରେସ୍ରେ ସର୍ବାଗ୍ରେ ଅଛନ୍ତି। ଜୋଶ ହାଜେଲଉଡଙ୍କୁ ସେ ପଛରେ ପକାଇଦେଇଛନ୍ତି। ବିରାଟ କୋହଲି ଏବେ ଅରେଞ୍ଜ କ୍ୟାପ ଦାବିଦାରଙ୍କ ତାଲିକାରେ ତଳକୁ ଖସି ଯାଇଛନ୍ତି। ହାଇଦ୍ରାବାଦ ବିପକ୍ଷରେ ଅର୍ଦ୍ଧଶତକ ହାସଲ କରିଥିବା ଶୁବମନ ଗିଲ (୭୬ ରନ) ଏବଂ ଜସ ବଟଲର୍ (୬୪ ରନ) ତାଙ୍କଠାରୁ ଆଗରେ ଅଛନ୍ତି।
ସାଇ ସୁଦର୍ଶନ ଏହି ସିଜିନରେ ୫୦୦ ରନ ପୂରଣ କରିବାରେ ପ୍ରଥମ ବ୍ୟାଟସମ୍ୟାନ ହୋଇଥିଲେ ଏବଂ ୧୦ ମ୍ୟାଚରେ ୫୦୪ ରନ କରି ସେ ଅରେଞ୍ଜ କ୍ୟାପ ଜିତିଥିଲେ। ସେ ସୂର୍ଯ୍ୟକୁମାରଙ୍କୁ ପଛରେ ପକାଇ ଦେଇଛନ୍ତି ଯିଏ ୧୧ଟି ମ୍ୟାଚ୍ରେ ୪୭୫ ରନ କରିଛନ୍ତି। ବିରାଟ କୋହଲି ବର୍ତ୍ତମାନ ୧୦ଟି ମ୍ୟାଚ୍ରେ ୪୪୩ ରନ କରି ତାଲିକାର ୫ମ ସ୍ଥାନରେ ପହଞ୍ଚିଛନ୍ତି। ଜୋସ ବଟଲର୍ ୧୦ଟି ମ୍ୟାଚ୍ରେ ୪୭୦ ରନ ସଂଗ୍ରହ କରି ତୃତୀୟ ସ୍ଥାନରେ ଥିବା ବେଳେ ଶୁବମନ ଗିଲ ୧୦ଟି ମ୍ୟାଚ୍ରେ ୪୬୫ ରନ ସହିତ ଚତୁର୍ଥ ସ୍ଥାନରେ ଅଛନ୍ତି।
ହାଇଦ୍ରାବାଦ ବିପକ୍ଷରେ ୨ ଉଇକେଟ ନେଇ ପ୍ରସିଦ୍ଧ କ୍ରିଷ୍ଣା ଜୋଶ ହାଜେଲଉଡଙ୍କୁ ପଛରେ ପକାଇ ଦେଇଥିଲେ। ପ୍ରସିଦ୍ଧ ଏପର୍ଯ୍ୟନ୍ତ ଖେଳାଯାଇଥିବା ୧୦ଟି ମ୍ୟାଚ୍ରେ ୧୯ଟି ଉଇକେଟ ନେଇଥିବା ବେଳେ ଜୋଶ ୧୦ଟି ମ୍ୟାଚ୍ରେ ୧୮ଟି ଉଇକେଟ ନେଇ ଦ୍ୱିତୀୟ ସ୍ଥାନରେ ରହିଛନ୍ତି। ଟ୍ରେଣ୍ଟ ବୋଲ୍ଟ ୧୧ଟି ମ୍ୟାଚ୍ରେ ୧୬ଟି ଉଇକେଟ ସହିତ ତୃତୀୟ ସ୍ଥାନରେ ଥିବା ବେଳେ ନୁର ଅହମ୍ମଦ ଚତୁର୍ଥ ଏବଂ ଖଲିଲ ଅହମ୍ମଦ ପଞ୍ଚମ ସ୍ଥାନରେ ଅଛନ୍ତି।
