ନୂଆଦିଲ୍ଲୀ,୨୦।୨: ମାର୍ଚ୍ଚ ୨୨ରୁ ଆରମ୍ଭ ହୋଇପାରେ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୪ । ଲୋକ ସଭା ନିର୍ବାଚନ ଥିବା ସତ୍ତ୍ୱେ ଏହାର ଆୟୋଜନ ଦେଶରେ ହେବ ବୋଲି ମଙ୍ଗଳବାର ଆଇପିଏଲ୍ ଅଧ୍ୟକ୍ଷ ଅରୁଣ ଧୁମଲ କହିଛନ୍ତି। ତେବେ ଏନେଇ ବିଧିବଦ୍ଧ ଘୋଷଣାକୁ ଅପେକ୍ଷା ରହିଛି।
ଆଇପିଏଲ୍ ନେଇ ସୂଚନା ଦେଇ ଧୁମଲ କହିଛନ୍ତି, ପ୍ରାରମ୍ଭରେ ଏହି ଲିଗ୍ର କେବଳ ପ୍ରଥମ ୧୫ ଦିନର କାର୍ଯ୍ୟସୂଚୀ ଘୋଷଣା କରାଯିବ। ବାକି ମ୍ୟାଚ୍ର ଘୋଷଣା ସାଧାରଣ ନିର୍ବାଚନ ତାରିଖ ଘୋଷଣା ହେବା ପରେ ହେବ। ତେବେ ନିର୍ବାଚନର ତାରିଖ ଘୋଷଣା ଆସନ୍ତା ମାସ ପ୍ରଥମ ସପ୍ତାହରେ ହେବାର ସମ୍ଭାବନା ରହିଛି। ଏଣୁ ଟୁର୍ନାମେଣ୍ଟକୁ ମାର୍ଚ୍ଚ ୨୨ରୁ ଆରମ୍ଭ କରିବାକୁ ଯୋଜନା କରାଯାଉଛି। ସରକାରୀ ଏଜେନ୍ସିଂଗୁଡ଼ିକ ସହ ମିଶି ଆମେ କାମ କରୁଛୁ। ପ୍ରଥମେ ଆମେ ପ୍ରାରମ୍ଭିକ କାର୍ଯ୍ୟକ୍ରମ ଜାରି କରିବୁ। ପୁରା ଟୁର୍ନାମେଣ୍ଟ ଭାରତରେ ହିଁ ଆୟୋଜିତ ହେବ ବୋଲି ସେ କହିଛନ୍ତି।
କହିରଖୁଛୁ, ପୂର୍ବରୁ ୨୦୦୯ରେ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଆଇପିଏଲ୍ର ସମ୍ପୂର୍ଣ୍ଣ ମ୍ୟାଚ୍ର ଆୟୋଜନ ଦକ୍ଷିଣ ଆଫ୍ରିକାରେ କରାଯାଇଥିଲା। ସେହିଭଳି ୨୦୧୪ରେ କିଛି ମ୍ୟାଚ୍ର ଆୟୋଜନ ୟୁଏଇରେ ହୋଇଥିଲା। ପରେ ୨୦୧୮ରେ ସାଧାରଣ ନିର୍ବାଚନକୁ ନେଇ ଲିଗ୍ ଭାରତରେ ଅନୁଷ୍ଠିତ ହୋଇ ନ ଥିଲା।
