ପୋଲସରା,୧୧ା୭(ଡି.ଏନ.ଏ.)- ରାଜ୍ୟରେ ଗଞ୍ଜାମ ଜିଲା ଏବେ କରୋନା ହଟ୍ସ୍ପଟ୍ ପାଲଟିଛି। ମାତ୍ର କୋଭିଡ୍ ନିୟମ ଉଲ୍ଲଂଘନ କରି ପୋଲସରା ବ୍ଲକ ଜା.ଡ଼େଙ୍ଗାପଦର ପଞ୍ଚାୟତ ମର୍ଦ୍ଦରାଜପୁର ଗ୍ରାମରେ ଏକ ମନ୍ଦିର ପ୍ରତିଷ୍ଠା ଉତ୍ସବ ଅନୁଷ୍ଠିତ ହୋଇଥିଲା। ଏନେଇ ପୋଲସରା ବିଡିଓ ଶମ୍ଭୁନାଥ ନନ୍ଦି ଶନିବାର ଥାନାରେ ଏତଲା ଦେବାପରେ ମାମଲା (ନଂ.୧୭୧/୨୦) ରୁଜୁକରି ନାଏବ ସରପଞ୍ଚ କୃଷ୍ଣଚନ୍ଦ୍ର ଜେନା ଓ ପୁରୋହିତଙ୍କ ସମେତ ୧୧ଜଣଙ୍କୁ ଗିରଫ କରାଯାଇଛି।
ପ୍ରକାଶ ଯେ, ମର୍ଦ୍ଦରାଜପୁର ଗ୍ରାମରେ ୭ଦିନ (ଗତ ୨ରୁ ୮ ତାରିଖ)ଧରି ହନୁମାନ ମନ୍ଦିର ପ୍ରତିଷ୍ଠା ଉତ୍ସବ ଅନୁଷ୍ଠିତ ହୋଇଥିଲା। ଏନେଇ ଅନୁଷ୍ଠିତ କଳସ ଶୋଭାଯାତ୍ରାରେ ପ୍ରାୟ ୫ ଶହରୁ ଊର୍ଦ୍ଧ୍ୱ ମହିଳା, ପୁରୁଷ ଓ ଶିଶୁ ଏକାଠି ହୋଇ ନଦୀଘାଟକୁ ଯାଇଥିଲେ। ସାମାଜିକ ଦୂରତା ଓ ମାସ୍କ ପିନ୍ଧିବା ଭଳି ନିୟମକୁ କେହି ମାନି ନ ଥିଲେ। ଗ୍ରାମର ଜଣେ ବ୍ୟକ୍ତି ଆକୁଳ ସ୍ବାଇଁ ଏହାର ପ୍ରତିବାଦ କରିବାରୁ ସରପଞ୍ଚ ସୂର୍ଯ୍ୟ ଜେନାଙ୍କ ପୁଅ ନାଏବ ସରପଞ୍ଚ କୃଷ୍ଣଚନ୍ଦ୍ର ତାଙ୍କୁ ଆକ୍ରମଣ କରିଥିଲେ। ଆକୁଳ ଏନେଇ ପୋଲସରା ଥାନାରେ ମଧ୍ୟ ଲିଖିତ ଅଭିଯୋଗ କରିଥିଲେ। ନଂ.୧୬୭/୨୦ରେ ମାମଲା ରୁଜୁ କରି ଥାନା ଅଧିକାରୀ ଜିତେନ୍ଦ୍ର କୁମାର ମଲ୍ଲିକ ତଦନ୍ତ ଚଳାଇଥିଲେ। ଇତିମଧ୍ୟରେ ସାମାଜିକ ଗଣମାଧ୍ୟମରେ ଭିଡିଓ ଭାଇରାଲ ପରେ ବିଡିଓ ନନ୍ଦି ନାଏବ ସରପଞ୍ଚଙ୍କ ବିରୋଧରେ କୋଭିଡ୍-୧୯ ନିୟମ ଉଲ୍ଲଂଘନ ନେଇ ଥାନାରେ ଏତଲା ଦେଇଥିଲେ। ସନ୍ଧ୍ୟାରେ ପୋଲିସ ଗଁାରେ ପହଞ୍ଚତ୍ ନାଏବ ସରପଞ୍ଚ ଓ ପୁରୋହିତଙ୍କ ସମେତ ୧୧ ଜଣଙ୍କୁ ଗିରଫ କରିଛି।
