ନୂଆଦିଲ୍ଲୀ,୧୬।୧୨:ଜାତୀୟ ଓ ଅନ୍ତର୍ଜାତୀୟ ସମସ୍ୟା ସାଙ୍ଗକୁ ଆମେରିକୀୟ ଫେଡେରାଲ ରିଜର୍ଭ ତା’ର ସୁଧ ହାରରେ ୦.୫୦% ବୃଦ୍ଧି କରିବା ଯୋଗୁ ଗୁରୁବାର ଭାରତୀୟ ଷ୍ଟକ୍ ବଜାରରେ ଏକ ବଡ଼ ଧରଣର କ୍ଷତି ଘଟିଛି। ଏପରିକି ଦିନକରେ ପ୍ରାୟ ୩ ଲକ୍ଷ କୋଟିର ନିବେଶ ଶେୟାର ବଜାରର ନିବେଶକ ହରାଇଛନ୍ତି। ଆଗକୁ ମଧ୍ୟ ସୁଧହାର ବୃଦ୍ଧି ନେଇ ଫେଡେରାଲଙ୍କ ସୂଚନା ଭାରତୀୟ ବଜାରକୁ ପ୍ରଭାବିତ କରିପାରେ ବୋଲି ଆଶଙ୍କା କରାଯାଉଛି। ବିଶେଷକରି ଆମେରିକା ବଜାରରେ ସୁଧହାର ୧୫ବର୍ଷର ଶୀର୍ଷତମ ସ୍ତରରେ ପହଞ୍ଚତ୍ଛି। ଫଳରେ ଷ୍ଟକ୍ ବଜାରର ନିବେଶକଙ୍କ ଉପରେ ଏହାର ପ୍ରଭାବ ପଡ଼ିଛି। ସେହିଭଳି ଫେଡେରାଲ ରିଜର୍ଭଙ୍କ ସୁଧହାର ବୃଦ୍ଧି ଘୋଷଣା ପରେ ଶେୟାର ବଜାରରେ ଅଂଶଧନ ବିକ୍ରି ଆରମ୍ଭ ହୋଇଯାଇଛି। ଏପରିକି ସେନ୍ସେକ୍ସରେ ସାମିଲ ୩୦ ମୁଖ୍ୟ ଶେୟାର ମଧ୍ୟରୁ ଏନ୍ଟିପିସି ଓ ସନ୍ଫାର୍ମାକୁ ଛାଡ଼ି ଦେଲେ ବାକି ୨୮ ଶେୟାରର ବଡ଼ ଧରଣର ହ୍ରାସ ଦେଖିବାକୁ ମିଳିଛି। ଉଲ୍ଲେଖଯୋଗ୍ୟ, ଡିସେମ୍ବର ୧୪ ଷ୍ଟକ୍ ବଜାର ବନ୍ଦ ବେଳକୁ ବିଏସ୍ଇରେ ସୂଚୀବଦ୍ଧ କମ୍ପାନୀଙ୍କ ବଜାର ପୁଞ୍ଜୀକରଣ ୨.୯୧ ଲକ୍ଷ କୋଟି ଟଙ୍କା ଥିଲା। ହେଲେ ଗୁରୁବାର କାରବାର ଆରମ୍ଭ ହେବା ପରେ ଏହାର ପରିମାଣ ହ୍ରାସ ହୋଇ ୨.୮୮ ଲକ୍ଷ କୋଟି ଟଙ୍କା ହୋଇଯାଇଛି। ଫଳରେ ଦିନକରେ ବଜାରରେ ନିବେଶକ ପ୍ରାୟ ୩ ଲକ୍ଷ କୋଟି ଟଙ୍କାର ନିବେଶ ହରାଇଛନ୍ତି। ସେହିପରି ଆଇଟି ଶେୟାରରେ ହ୍ରାସ ଓ ବଜାରରେ ଦୁର୍ବଳ ପରିସ୍ଥିତି ଯୋଗୁ ୩୦ ଶେୟାରର ବିଏସ୍ଇ ସୂଚକାଙ୍କ ପୂର୍ବାହ୍ନରେ ୧୮୬.୭୪ ପଏଣ୍ଟ ହ୍ରାସ ହୋଇ ୬୨,୪୯୧.୧୭ ଅଙ୍କରେ ଖୋଲିଥିଲା। ସେହିପରି ନିଫ୍ଟି ୫୧.୯୫ ପଏଣ୍ଟ ହ୍ରାସ ହୋଇ ୧୮,୬୦୮.୩୫ ଅଙ୍କରେ ଖୋଲିଥିଲା। ତେବେ ବଜାର ବର୍ତ୍ତମାନ ବ୍ୟାଙ୍କ ଅଫ୍ ଇଂଲଣ୍ଡ(ବିଓଇ) ଏବଂ ୟୁରୋପୀୟ କେନ୍ଦ୍ରୀୟ ବ୍ୟାଙ୍କ(ଇସିବି)ର ନିଷ୍ପତ୍ତିକୁ ଅପେକ୍ଷା କରିଛି। ଉଭୟ ବ୍ୟାଙ୍କ ସେମାନଙ୍କ ନୀତିଗତ ହାର ଅଧା ପ୍ରତିଶତ ବୃଦ୍ଧି କରିପାରନ୍ତି ବୋଲି ଆଶଙ୍କା କରାଯାଉଛି।
