ନୂଆଦିଲ୍ଲୀ,୨୮।୨: କ୍ରମାଗତ ୭ ଦିନ ଲାଗି ଭାରତୀୟ ଶେୟାର ବଜାର କାରବାରରେ ହ୍ରାସ ଘଟିଛି। ଫଳରେ ଶେୟାର ବଜାରର ନିବେଶକମାନେ ପ୍ରାୟ ୧୦.୪୩ ଲକ୍ଷ କୋଟି ଟଙ୍କା ହରାଇଥିବା ଜଣାପଡିଛି। ବିଶେଷ କରି ଫେବୃୟାରୀ ୧୬ରୁ ୨୭ ମଧ୍ୟରେ ସେନସେକ୍ସ ପ୍ରାୟ ୨,୦୩୧ ପଏଣ୍ଟ ହ୍ରାସ ହୋଇଛି। ଏହି ସମୟ ମଧ୍ୟରେ ବମ୍ବେ ଷ୍ଟକ ଏକ୍ସଚେଞ୍ଜ (ବିଏସଇ)ରେ ତାଲିକାଭୁକ୍ତ କମ୍ପାନିଗୁଡିକର ବଜାର ପୁଞ୍ଜି ୧୦,୪୨,୭୯୦.୩୦ କୋଟି ଟଙ୍କା ହ୍ରାସ ହୋଇ ୨,୫୭,୮୮,୧୯୫.୫୭ କୋଟି ଟଙ୍କାରେ ପହଞ୍ଚତ୍ଛି। ଅପରପକ୍ଷରେ ବିକଶିତ ଦେଶ ଗୁଡିକର କେନ୍ଦ୍ରୀୟ ବ୍ୟାଙ୍କଙ୍କ ପକ୍ଷରୁ ସୁଧ ହାର ବୃଦ୍ଧି ଏବଂ ଭୌଗୋଳିକ କାରଣରୁ ଚାପରେ ଥିବା ବିଶ୍ୱ ବଜାର ସହ ବିଦେଶୀ ନିବେଶକଙ୍କ ଶେୟାର ବିକ୍ରି ଯୋଗୁ ଘରୋଇ ପୁଞ୍ଜି ବଜାର ମଧ୍ୟ ଚାପରେ ରହିଛି ବୋଲି ବଜାର ବିଶେଷଜ୍ଞମାନେ ଆକଳନ କରିଛନ୍ତି।
ଉଲ୍ଲେଖଯୋଗ୍ୟ ଚଳିତ ସପ୍ତାହ ପ୍ରଥମ କାର୍ଯ୍ୟରେ ବିଏସଇର ୩୦ଶେୟାର ବିଶିଷ୍ଟ ସୂଚକାଙ୍କ ସେନସେକ୍ସ ୧୭୫.୫୮ ପଏଣ୍ଟ ହ୍ରାସ ସହ ୫୯,୨୮୮.୩୫ ଅଙ୍କରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ ଏକ୍ସଚେଞ୍ଜ ନିଫ୍ଟି ୫୦ରେ ମଧ୍ୟ ୭୩. ୧୦ ପଏଣ୍ଟ ହ୍ରାସ ପାଇ ୧୭,୩୯୨.୭୦ ଅଙ୍କରେ ବଜାର ବନ୍ଦ ବନ୍ଦ ହୋଇଥିବା ଜଣାପଡିଛି।
ସୂଚନାଯୋଗ୍ୟ ସୋମବାର ବଜାର କାରବାର ସମୟରେ ସେନସେକ୍ସର ଶେୟାର ମଧ୍ୟରେ ଟାଟା ଷ୍ଟିଲ, ଇନଫୋସିସ୍, ଟାଟା ମୋଟର୍ସ, ଟାଟା କନସଲଟାନ୍ସି ସର୍ଭିସେସ୍, ମହିନ୍ଦ୍ରା ଆଣ୍ଡ ମହିନ୍ଦ୍ରା, ଏଚସିଏଲ ଟେକ୍ନୋଲଜିସ୍, ଏନ ଆଣ୍ଡ ଟି, ଭାରତୀ ଏୟାରଟେଲ୍, ୱିପ୍ରୋ ଏବଂ ବଜାଜ ଫାଇନାନ୍ସରେ ସବୁଠୁ ଅଧିକ ହ୍ରାସ ଦେଖିବାକୁ ମିଳିଛି। ଅନ୍ୟପଟେ ପାୱର ଗ୍ରୀଡ, ଆଇସିଆଇସିଆଇ ବ୍ୟାଙ୍କ, କୋଟାକ ମହିନ୍ଦ୍ରା ବ୍ୟାଙ୍କ ଏବଂ ଏସବିଆଇ ବ୍ୟାଙ୍କ ଲାଭ ସହ ବନ୍ଦ ହୋଇଛି। ସେହିପରି ସେକ୍ଟୋରଲ ସୂଚକାଙ୍କରେ ଟେକ୍ ୨%, ଆଇଟିରେ ୧.୯୬%, କମୋଡିଟିରେ ୧.୭୫%, ମେଟାଲରେ ୧.୩୯%, କ୍ୟାପିଟଲ ଗୁଡସରେ ୦.୯୫% ହ୍ରାସ ଘଟିଛି।
