ନୂଆଦିଲ୍ଲୀ,୧।୭: ଅନ୍ଲକ-୨ ଅବଧି ମଧ୍ୟରେ ଖୁବ୍ଶୀଘ୍ର ଦେଶରେ ପର୍ଯ୍ୟାୟକ୍ରମେ ଅନ୍ତର୍ଜାତୀୟ ଯାତ୍ରୀବାହୀ ବିମାନ ସେବା ଆରମ୍ଭ ହେବ। ସ୍ବରାଷ୍ଟ୍ର ମନ୍ତ୍ରଣାଳୟ ସୋମବାର ଏ ସମ୍ପର୍କରେ ସୂଚନା ଦେଇଛି। କରୋନା ମହାମାରୀରୁ ଦେଶବାସୀଙ୍କୁ ସୁରକ୍ଷା ଯୋଗାଇଦେବା ସହ ସଂକ୍ରମଣର ସଂଖ୍ୟା ହ୍ରାସ ଲକ୍ଷ୍ୟରେ ସରକାର ମାର୍ଚ୍ଚ ଶେଷ ସପ୍ତାହରେ ଘରୋଇ ଓ ଅନ୍ତର୍ଜାତୀୟ ବିମାନସେବାକୁ ବନ୍ଦ ରଖିଥିଲେ। ବିଗତ ୨ମାସରୁ ଊର୍ଦ୍ଧ୍ୱ ସମୟ ବନ୍ଦ ରହିବା ପରେ ଘରୋଇ ବିମାନ ସେବା ଅଳ୍ପ ସଂଖ୍ୟକ ରୁଟ୍ରେ ଆରମ୍ଭ ହୋଇଥଲା। ସେହିଭଳି ଜୁଲାଇ ୧୫ ପର୍ଯ୍ୟନ୍ତ ସମସ୍ତ ଅନ୍ତର୍ଜାତୀୟ ବିମାନ ସେବାକୁ ମଧ୍ୟ ବନ୍ଦ ରଖିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ ସୂଚନା ଅନୁସାରେ ବିଭିନ୍ନ ଦିଗକୁ ଅନୁଧ୍ୟାନକରି କେତେକ ନିର୍ଦ୍ଦିଷ୍ଟ ରୁଟ୍ରେ ଅନ୍ତର୍ଜାତୀୟ ବିମାନ ସେବା ଆରମ୍ଭ କରାଯାଇପାରେ। ଏ ନେଇ ମନ୍ତ୍ରଣାଳୟ ବର୍ତ୍ତମାନ ଚିନ୍ତା କରୁଛି। ଭାରତ ସରକାରଙ୍କ ନିର୍ଦ୍ଦେଶନୁସାରେ ଇଂଲଣ୍ଡ, ଫ୍ରାନ୍ସ ଭଳି ଦେଶରେ ଫସି ରହିଥିବା ଭାରତୀୟଙ୍କୁ ଶୀଘ୍ର ଦେଶକୁ ଫେରାଇଆଣିବା ପାଇଁ ଏୟାର ଇଣ୍ଡିଆ ମାଧ୍ୟମରେ ଯାତ୍ରୀସେବା ଯୋଗାଇଦେବାକୁ ଲକ୍ଷ୍ୟ ରଖିଛି। ସେହିଭଳି ସରକାର ସାରା ବିଶ୍ୱରେ ଫସି ରହିଥିବା ଭାରତୀୟମାନଙ୍କୁ ସ୍ବଦେଶ ଫେରାଇ ଆଣିବା ପାଇଁ ମେ ୬ରୁ ବନ୍ଦେ ଭାରତ ମିଶନ ନାମରେ ସ୍ବତନ୍ତ୍ର ବିମାନ ସେବା ଆରମ୍ଭ କରିଛନ୍ତି। ଏହି ମିଶନର ତୃତୀୟ ପର୍ଯ୍ୟାୟ ମଧ୍ୟରେ ୮୭୫ଟି ଅନ୍ତର୍ଜାତୀୟ ବିମାନ ଚଳାଚଳ ସହ ପ୍ରାୟତଃ ୫୦ଟି ଦେଶ ଓ ୫ଟି ମହାଦେଶରୁ ପାଖାପାଖି ୧,୨୫,୦୦୦ ଭାରତୀୟ ସ୍ବଦେଶ ଫେରିଥିବା ବିଷୟରେ ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂହ ପୁରୀ ମତ ପ୍ରକାଶ କରିଛନ୍ତି।
