ଦୈନନ୍ଦିନ ଜୀବନ ପାଇଁ ଖାଦ୍ୟ, ବାସଗୃହ ଯେମିତି ଆବଶ୍ୟକ, ଖୁସି ମଧ୍ୟ ସେହିପରି ଅପରିହାର୍ଯ୍ୟ । ଖୁସି ରହିବା ପ୍ରତ୍ୟେକ ବ୍ୟକ୍ତିଙ୍କ ଜନ୍ମଗତ ଅଧିକାର। ଆଜି ହେଉଛି ସେହି ଖୁସିର ଦିନ । ସମଗ୍ର ବିଶ୍ବ ମାର୍ଚ୍ଚ ୨୦ରେ ’ଅନ୍ତର୍ଜାତୀୟ ଖୁସି ଦିବସ’ ପାଳନ କରୁଛି । ଏହି ଦିନ ପାଳନ କରିବାର ଉଦ୍ଦେଶ୍ୟ ହେଉଛି ଲୋକଙ୍କୁ ସୁଖର ମହତ୍ତ୍ୱ ବିଷୟରେ ଅବଗତ କରାଇବା ଏବଂ ଖୁସି ବାଣ୍ଟିବା ଲାଗି ପ୍ରେରଣା ଦେବା। ଏହା କେବଳ ଗୋଟିଏ ଦିନ ପର୍ଯ୍ୟନ୍ତ ସୀମିତ ନୁହେଁ କାରଣ ଏହା ଆମକୁ ପ୍ରତ୍ୟେକ ଦିନ ମିଳୁଥିବା ଛୋଟ ଛୋଟ ଖୁସିକୁ ସମ୍ମାନ ଜଣାଇବାକୁ ପ୍ରେରଣା ଦେଇଥାଏ।
ଆଜିକାଲି ବ୍ୟସ୍ତ ବହୁଳ ଜୀବନରେ ଲୋକମାନେ ଚାପ ଏବଂ ଚିନ୍ତାରେ ଅଧିକ ଜୀବନଯାପନ କରିବା ଆରମ୍ଭ କରିଛନ୍ତି। ଯେଉଁ କାରଣରୁ ଜୀବନ ନୀରସ ହୋଇଯାଉଛି। ଏଭଳି ପରିସ୍ଥିତିରେ ଲୋକଙ୍କୁ ସୁଖର ମୂହୁର୍ତ୍ତ ବିଷୟରେ ଅବଗତ କରାଇବା ପାଇଁ ୨୦୧୧ରେ ଆନ୍ତର୍ଜାତୀୟ ଖୁସି ଦିବସ ଆରମ୍ଭ ହୋଇଥିଲା, ଯେତେବେଳେ ମିଳିତ ଜାତିସଂଘ ସାଧାରଣ ସଭାରେ ଖୁସିକୁ ଏକ ସାର୍ବଜନୀନ ନୀତି ଭାବରେ ବିବେଚନା କରିବା ପାଇଁ ଏକ ପ୍ରସ୍ତାବ ଆଗତ କରାଯାଇଥିଲା। ଏହି ଧାରଣା ମୁଖ୍ୟତଃ ପରାମର୍ଶଦାତା ଜେମି ଇଲିଅନ ଦ୍ୱାରା ପ୍ରସ୍ତାବିତ ହୋଇଥିଲା, ଯିଏ ’ହ୍ୟାପିଟାଲିଜିମ୍’ର ଧାରଣା ଆଣିଥିଲେ। ଯାହା ପରାମର୍ଶ ଦେଇଥିଲା ଯେ ଏକ ଦେଶର ଆର୍ଥିକ ବିକାଶ ପାଇଁ ଖୁସିକୁ ପ୍ରାଥମିକତା ଦିଆଯିବା ଉଚିତ। ଏହି ପ୍ରସ୍ତାବକୁ ୨୦୧୨ ମସିହାରେ ଗୃହୀତ କରାଯାଇଥିଲା ଏବଂ ୨୦୧୩ ମସିହାରେ ପ୍ରଥମ ଅନ୍ତର୍ଜାତୀୟ ଖୁସି ଦିବସ ପାଳନ କରାଯାଇଥିଲା।
୨୦୨୫ ପାଇଁ ଏହିି ଦିବସର ବିଷୟବସ୍ତୁ ହେଉଛି “ଯତ୍ନ ଏବଂ ବାଣ୍ଟିବା”। ଆମେ ଯତ୍ନ ଏବଂ ବାଣ୍ଟିବାର ଛୋଟ ଛୋଟ କାର୍ଯ୍ୟ ମାଧ୍ୟମରେ ଅନ୍ୟମାନଙ୍କ ଜୀବନରେ ଖୁସି ଆଣିପାରିବା। ଯେତେବେଳେ ଆମେ କାହାକୁ ସାହାଯ୍ୟ କରୁ କିମ୍ବା ଭାବପ୍ରବଣ ହୋଇ ସମର୍ଥନ ପ୍ରଦାନ କରୁ, ଆମେ କେବଳ ତାଙ୍କୁ ଆଶ୍ୱସ୍ତି ଦେଉନାହୁଁ ବରଂ ନିଜେ ମଧ୍ୟ ଭଲ ଅନୁଭବ କରୁ। ଏହା ସମାଜରେ ଏକ ସକାରାତ୍ମକ ପରିବର୍ତ୍ତନ ଆଣିଥାଏ ଏବଂ ପାରସ୍ପରିକ ସମ୍ପର୍କକୁ ମଜବୁତ କରିଥାଏ।
ଆନ୍ତର୍ଜାତୀୟ ଖୁସି ଦିବସର ଗୁରୁତ୍ୱ ହେଉଛି ଯେ ଏହା ଆମକୁ ଅନୁଭବ କରାଏ ଯେ ଖୁସି କେବଳ ଭୌତିକ ସମ୍ପତ୍ତି କିମ୍ବା ବାହ୍ୟ ସୁଖ ସୁବିଧାରେ ମିଳେ ନାହିଁ, ବରଂ ଏହା ଭିତରୁ ଅନୁଭବ ହୁଏ। ଯେତେବେଳେ ଆମେ ନିଜକୁ ସନ୍ତୁଷ୍ଟ ରଖୁ ଏବଂ ଜୀବନର ଛୋଟ ଛୋଟ ମୁହୂର୍ତ୍ତଗୁଡ଼ିକୁ ଆଦର କରୁ, ଆମର ଖୁସି ସ୍ବାଭାବିକ ଭାବରେ ବିକଶିତ ହୁଏ। ଏହି ଦିନଟି ଆମକୁ ଶିଖାଏ ଯେ ଖୁସି ପାଇବା ପାଇଁ ଆମକୁ ଆମର ଚିନ୍ତାଧାରା ଏବଂ କାର୍ଯ୍ୟରେ ସକାରାତ୍ମକତା ଆଣିବାକୁ ପଡିବ।
ଆଜିକାଲି ସମାଜରେ ସମସ୍ତଙ୍କର ବହୁତ ଦାୟିତ୍ୱ ଏବଂ ଚାପ ରହିଛି। ଏପରି ପରିସ୍ଥିତିରେ, ନିଜକୁ ଖୁସି ରଖିବା ଏକ ଚ୍ୟାଲେଞ୍ଜ ହୋଇପାରେ। କିନ୍ତୁ ଆନ୍ତର୍ଜାତୀୟ ଖୁସି ଦିବସ ଆମକୁ ନିଜକୁ ଖୁସି ରଖିବାର ଉପାୟ ଗ୍ରହଣ କରିବାକୁ ଏବଂ ଆମ ଜୀବନରେ ଶାନ୍ତି ଏବଂ ସନ୍ତୋଷ ଆଣିଥିବା ଜିନିଷଗୁଡ଼ିକର ମୂଲ୍ୟ ବୁଝିବାକୁ ପ୍ରେରଣା ଦିଏ। ଏହି ଦିନଟି ଆମକୁ ଏହା ମଧ୍ୟ ବୁଝାଏ ଯେ ଖୁସି କେବଳ ବ୍ୟକ୍ତିଗତ ନୁହେଁ ବରଂ ଏହା ସାମୂହିକ ପ୍ରୟାସର ଫଳାଫଳ।
ଯଦିଓ ମାର୍ଚ୍ଚ ୨୦ ତାରିଖ ଅନ୍ତର୍ଜାତୀୟ ଖୁସି ଦିବସ ପାଳନ କରିବାକୁ ସ୍ଥିର କରାଯାଇଛି। କିନ୍ତୁ ପ୍ରତ୍ୟେକ ଦିନ ଖୁସିରେ ରହିବା ଉଚିତ। କାରଣ ଖୁସି ହେଉଛି ମାନବ ଜୀବନର ମୌଳିକ ଅଧିକାର। ସେଥିପାଇଁ ଆପଣଙ୍କୁ ଜୀବନରେ ସୁଖର ମହତ୍ତ୍ୱ ବୁଝିବାକୁ ପଡ଼ିବ ଏବଂ ସୁଖର ମହତ୍ତ୍ୱ ବିଷୟରେ ସଚେତନ ହେବାକୁ ପଡ଼ିବ।
