ନୂଆଦିଲ୍ଲୀ,୧୪।୧:ଦେଶର ଦ୍ୱିତୀୟ ବୃହତ୍ ଆଇଟି ସେବା ଯୋଗାଣକାରୀ କମ୍ପାନୀ ଇନ୍ଫୋସିସର ନେଟ୍ ଲାଭ ୧୭% ବଢିଛି। ଡିସେମ୍ବର ୩୧ ସୁଦ୍ଧା ଏହି କମ୍ପାନୀର ନେଟ୍ ଲାଭ ୫,୧୯୭ କୋଟି ଟଙ୍କା ରହିଛି। କମ୍ପାନୀ ଏହି ତ୍ରୈମାସରେ ୨୫,୯୨୭ କୋଟି ଟଙ୍କା ରାଜସ୍ବ ଲାଭ କରିଛ; ଯାହା ଗତ ବର୍ଷ ସମାନ ସମୟରେ ୨୩,୦୯୨ କୋଟି ଟଙ୍କା ରହିଥିଲା। ଏହି ତ୍ରୈମାସରେ ରାଜସ୍ବ ୧୨.୩% ଊର୍ଦ୍ଧ୍ୱରେ ରହିଥିବା କମ୍ପାନୀ ପ୍ରକାଶ କରିଛି। ୪.୫ରୁ ୫% ଅଭିବୃଦ୍ଧି ଗାଇଡ୍ ସହ ଏହା ଅଗ୍ରସର ହେଉଛି। ଆଉ ଏକ ତ୍ରୈମାସରେ ଇନ୍ଫୋସିସ୍ ଭଲ ଫଳାଫଳ କରିଛି ବୋଲି ଏହାର ଏମ୍ଡି ତଥା ସିଇଓ ସଲିଲ ପାରେଖ କହିଛନ୍ତି। କ୍ଲାଏଣ୍ଟଙ୍କୁ ଧରି ରଖିବାର କୌଶଳ, ଡିଜିଟାଲ ଟ୍ରାନ୍ସଫରମେଶନ ଏବଂ ଅଭିବୃଦ୍ଧିକୁ ତ୍ୱରାନ୍ବିତ କରିବା ଦିଗରେ କମ୍ପାନୀ ବିଭିନ୍ନ ପଦକ୍ଷେପ ହାତକୁ ନେଉଛି। କମ୍ପାନୀ ଭିନ୍ଗାର୍ଡ, ଡାଏମର, ରୋଲ୍ସ ରଏସ୍ ଭଳି ଗ୍ଲୋବାଲ ପାର୍ଟନରଙ୍କୁ ସେବା ଯୋଗାଣ ଧାରା ଜାରି ରଖିଥିବା ପାରେଖ କହିଛନ୍ତି।
