ଭୁବନେଶ୍ୱର,୮।୯: ଓଡ଼ିଶା ସୂଚନା ଆୟୋଗ ‘ଓଡ଼ିଶା ଲୋକସେବା ଆୟୋଗ’ (ଓପିଏସସି)କୁ ନିଯୁକ୍ତି ପରୀକ୍ଷାରେ ଅସଫଳ ପ୍ରାର୍ଥୀଙ୍କ ସାକ୍ଷାତକାର ନମ୍ବର ପ୍ରକାଶ କରିବାକୁ ନିର୍ଦ୍ଦେଶ ଦେଇଛନ୍ତି। ରାଜ୍ୟ ମୁଖ୍ୟ ସୂଚନା ଆୟୁକ୍ତ ମନୋଜ ପରିଡ଼ା ଏହି ସମ୍ପର୍କରେ ଏକ ଆଦେଶ ଜାରି କରିଛନ୍ତି।
ଭଦ୍ରକ ଜିଲାର ମିନତୀ ରାଣୀ ମହାପାତ୍ରଙ୍କ ଏକ ଆବେଦନ ଶୁଣାଣି ବେଳେ ଏହି ନିର୍ଦ୍ଦେଶ ଦିଆଯାଇଛି। ୨୦୦୨ରେ ସହକାରୀ ଶିକ୍ଷକ ପଦବୀ ପାଇଁ ମିନତୀ ଚୟନିତ ହୋଇ ନ ଥିଲେ। ସେ ନିଜର କ୍ୟାରିଅର ଓ ସାକ୍ଷାତକାର ନମ୍ବର ଜାଣିବା ପାଇଁ ଓପିଏସସିକୁ ଆବେଦନ କରିଥିଲେ। ଓପିଏସସି କ୍ୟାରିଅର ନମ୍ବର ପ୍ରଦାନ କରିଥିଲେ ହେଁ ସାକ୍ଷାତକାର ନମ୍ବର ଦେବାକୁ ମନା କରିଥିଲେ।
ଓପିଏସସି ଯୁକ୍ତି ଦେଇଥିଲେ ଯେ ସାକ୍ଷାତକାରରେ ପ୍ରାର୍ଥୀଙ୍କ ବ୍ୟକ୍ତିତ୍ୱ ଓ ଉପଯୁକ୍ତତା ପରୀକ୍ଷା କରାଯାଏ ଏବଂ ନମ୍ବର ପ୍ରକାଶ କରାଯାଏ ନାହିଁ। ତେବେ, ସୂଚନା ଆୟୋଗ ଏହାକୁ ଆରଟିଆଇ ଆଇନ ବିରୋଧୀ ବୋଲି କହିଛନ୍ତି। ଆୟୋଗ ଉଲ୍ଲେଖ କରିଛନ୍ତି ଯେ ପ୍ରାର୍ଥୀଙ୍କୁ ନିଜ ସାକ୍ଷାତକାର ନମ୍ବର ଜାଣିବାର ଅଧିକାର ରହିଛି, ଯାହା ସେମାନଙ୍କୁ ପରବର୍ତ୍ତୀ ପ୍ରୟାସରେ ଉନ୍ନତି କରିବାରେ ସାହାଯ୍ୟ କରିବ।
ଆରଟିଆଇ ଆଇନର ଧାରା ୨୨ ଅନୁଯାୟୀ, ସୂଚନା ପ୍ରଦାନ ପାଇଁ ଅନ୍ୟ ସମସ୍ତ ନିୟମ ଅପେକ୍ଷା ଏହା ପ୍ରାଧାନ୍ୟ ପାଇବ। ଆୟୋଗ ଓପିଏସସିକୁ ନିଯୁକ୍ତି ପରୀକ୍ଷାରେ ନମ୍ବର ସମ୍ପର୍କିତ ତଥ୍ୟ ପ୍ରାର୍ଥୀଙ୍କୁ ପ୍ରଦାନ କରିବାକୁ ପରାମର୍ଶ ଦେଇଛନ୍ତି।
