ଲକ୍ଷ୍ନୌ,୧୭।୨: ଉତ୍ତରପ୍ରଦେଶ ରାଜଧାନୀ ଲକ୍ଷ୍ନୌରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବାସଭବନ ବାହାରେ ବୋମା ଥିବା ନେଇ ଏକ ଫୋନ୍ କଲ୍ ଆସିଥିଲା। ଏହି ସୂଚନା ମିଳିବା ପରେ ସେଠାରେ ଭୟର ବାତାବରଣ ଖେଳିଯାଇଛି। ଘଟଣାସ୍ଥଳରେ ପୋଲିସ ଓ ବୋମା ନିଷ୍କ୍ରିୟ ସ୍କ୍ବାଡ୍ ପହଞ୍ଚି ଆଖପାଖ ସ୍ଥାନଗୁଡ଼ିକୁ ଭଲଭାବେ ଯାଞ୍ଚ କରୁଛି। ପ୍ରାରମ୍ଭିକ ଅନୁସନ୍ଧାନ ପରେ କୁହାଯାଉଛି, ଏହି ତଥ୍ୟ ନକଲି ଥିଲା। ସୂଚନା ମୁତାବକ, ଶୁକ୍ରବାର ପୋଲିସ କଣ୍ଟ୍ରୋଲ ରୁମକୁ ମୁଖ୍ୟମନ୍ତ୍ରୀଙ୍କ ବାସଭବନ ବାହାରେ ଏକ ବୋମା ଥିବା ନେଇ ଜଣେ ବ୍ୟକ୍ତି ଫୋନ୍ କରି ସୂଚନା ଦେଇଥିଲେ। ଏହାପରେ ସୁରକ୍ଷା ଦୃଷ୍ଟିରୁ ସତର୍କତା ଅବଲମ୍ବନ କରାଯାଇଥିଲା। କିନ୍ତୁ କିଛି ମିଳିଲା ନାହିଁ ବୋଲି ଡିସିପି ସେଣ୍ଟ୍ରାଲ କହିଛନ୍ତି। ତେବେ ସୁରକ୍ଷା ଦୃଷ୍ଟିରୁ ଆଖପାଖର ସମସ୍ତ ଅଞ୍ଚଳରେ ଯାଞ୍ଚ କରାଯାଉଥିବା ବେଳେ ସୂଚନା ଦେଇଥିବା ଅଜ୍ଞାତ ବ୍ୟକ୍ତିଙ୍କୁ ମଧ୍ୟ ଖୋଜୁଛି ପୋଲିସ। ଅନ୍ୟପଟେ ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କ ବାସଭବନ ବାହାରେ ସୁରକ୍ଷା କଡ଼ାକଡ଼ି କରାଯିବା ସହ ବ୍ୟାପକ ପୋଲିସ ମୁତୟନ କରାଯାଇଛି।
