ନୂଆଦିଲ୍ଲୀ,୧୩।୧୧: ଗତ କିଛି ବର୍ଷ ହେବ ଭାରତୀୟ ଅର୍ଥନୀତିରେ ମାନ୍ଦାବସ୍ଥା ଜାରି ରହିଛି। କୋଭିଡ୍ ପରଠାରୁ ତାହା ଉଚ୍ଚ ହାରରେ ରହିଛି। ଫଳରେ ଗତ କିଛି ମାସ ହେବ ଖୁଚୁରା ମୁଦ୍ରାସ୍ଫୀତି ରେକର୍ଡ ସ୍ତରରେ ପହଞ୍ଚତ୍ଛି। ହେଲେ ଚଳିତ ବର୍ଷ ସେପ୍ଟେମ୍ବରଠାରୁ ଅକ୍ଟୋବରରେ ଖୁଚୁରା ମୁଦ୍ରାସ୍ଫୀତି ହାର ୭% ରୁ କମ୍ ରହିପାରେ ବୋଲି ଭାରତୀୟ ରିର୍ଜଭ ବ୍ୟାଙ୍କ(ଆର୍ବିଆଇ)ର ଗଭର୍ନର ଶକ୍ତିକାନ୍ତ ଦାସ ନିକଟରେ ଆୟୋଜିତ ଏକ ସମ୍ମିଳନୀରେ ଯୋଗଦେଇ ଏଭଳି ଆକଳନ କରିଛନ୍ତି। ଗତ କିଛିମାସ ହେବ ଲଗାତର ମୁଦ୍ରାସ୍ଫୀତି ୭% ରୁ ଅଧିକ ରହୁଛି। ଏପରିକି ଆର୍ବିଆଇର ଅନେକ ପ୍ରୟାସ ପରେ ମଧ୍ୟ ସ୍ଥିତି ନିୟନ୍ତ୍ରଣକୁ ଆସିପାରୁନାହିଁ। ସାରା ବିଶ୍ୱ ବର୍ତ୍ତମାନ ସମୟରେ ଅର୍ଥନୈତିକ ସଙ୍କଟ ଦେଇ ଗତି କରୁଛି। ଏଥିପାଇଁ ମୁଖ୍ୟତଃ ୩ଟି କାରଣ ଦାୟୀ ଯଥା କୋଭିଡ୍ ମହାମାରୀ, ୟୁକ୍ରେନ୍-ରୁଷିଆ ଯୁଦ୍ଧ ଏବଂ ଆର୍ଥିକ ମାନ୍ଦାବସ୍ଥା (ବଜାର କାରବା) କାରଣରୁ ଭାରତ ସମେତ ବିଶ୍ୱରେ ଅର୍ଥନୈତିକ ସଙ୍କଟ ସୃଷ୍ଟି ହୋଇଛି। ବୋଲି ଶକ୍ତିକାନ୍ତ କହିଛନ୍ତି, ଏଭଳି ପରିସ୍ଥିତିରେ ମଧ୍ୟ ଦେଶର ଜିଡିପି ଉନ୍ନତି ପଥରେ ରହିଛି। ଏପରିକି ବିଶ୍ୱସ୍ତରର ଅର୍ଥନୀତିଠାରୁ ଭାରତର ଅର୍ଥନୀତିରେ ଦ୍ରୁତ ଉନ୍ନତି ପରିଲକ୍ଷିତ ହୋଇଛି। ଉଲ୍ଲେଖଯୋଗ୍ୟ, ହିନ୍ଦୁସ୍ଥାନ ଟାଇମ୍ସ ଲିଡରଶିପ୍ ସମିଟି-୨୦୨୨ରେ ଯୋଗ ଦେଇ ଭାରତରେ କାହିଁକି ଦରଦାମ ବୃଦ୍ଧି ପାଉଛି ସେ ନେଇ ଶକ୍ତିକାନ୍ତ ବିସ୍ତୃତ ମତ ଉପସ୍ଥାପନ କରିଛନ୍ତି। ଏହା ସହ ସେସବୁର ହ୍ରାସ ପାଇଁ ଆର୍ବିଆଇ ପକ୍ଷରୁ ନିଆଯାଉଥିବା ପଦକ୍ଷେପ ସମ୍ପର୍କରେ ମଧ୍ୟ ବିସ୍ତୃତ ସୂଚନା ଦେଇଛନ୍ତି।
ଗତ କିଛି ମାସ ହେବ ଖାଦ୍ୟ ଏବଂ ପାନୀୟ ସାମଗ୍ରୀର ମୂଲ୍ୟ ଏକ ପ୍ରକାର ସ୍ଥିର ରହିଛି। ଏପରିକି ପୂର୍ବମାସଗୁଡ଼ିକର ଦରଦାମକୁ ହିସାବକୁ ନେଲେ ସେପ୍ଟେମ୍ବର ଓ ଅକ୍ଟୋବରର ଦରଦାମ ସାମାନ୍ୟ ହ୍ରାସ କିମ୍ବା ବୃଦ୍ଧି ଘଟିଛି। ଏହାକୁ ନଜରରେ ରଖି ଅକ୍ଟୋବରରେ ଖୁଚୁରା ମୁଦ୍ରାସ୍ଫୀତି କମ୍ ରହିବା ନେଇ ବଜାର ବିଶେଷଜ୍ଞମାନେ ମୁଦ୍ରାସ୍ଫୀତ ହ୍ରାସ ନେଇ ଅନୁମାନ କରୁଛନ୍ତି। ସେହିଭଳି ଏକ ଜାତୀୟସ୍ତର ସର୍ଭେ ସଂସ୍ଥାର କହିବା ଅନୁସାରେ ୧୪ ନଭେମ୍ବରରେ ଜାରି ହେବାକୁ ଥିବା ମୁଦ୍ରାସ୍ଫୀତି ହାର ୭% ରୁ କମ୍ ରହିପାରେ ବୋଲି ଆକଳନ କରିଛି। ଚଳିତ ବର୍ଷ ସେପ୍ଟେମ୍ବରରେ ଦେଶର ମୁଦ୍ରାସ୍ଫୀତି ୭.୪୧% ରହିଥିଲା।
