ନୂଆଦିଲ୍ଲୀ,୧୨।୮: କରୋନା ଯୋଗୁ ଦେଶର ଶିଳ୍ପ କ୍ଷେତ୍ର ବର୍ତ୍ତମାନ ବିଭିନ୍ନ ସମସ୍ୟା ଦେଇ ଗତି କରୁଛି। କରୋନା ଜନିତ ଲକ୍ଡାଉନ ଲାଗି ଘରୋଇ ବଜାରର ଔଦ୍ୟୋଗିକ ଉତ୍ପାଦନ ଜୁନ୍ରେ ୧୬.୬% ଖସିଥିବା ସରକାରୀ ଡାଟାରୁ ସାମ୍ନାକୁ ଆସିଛି। ପୂର୍ବର ମାସଗୁଡିକ ତୁଳନାରେ ଜୁନ୍ରେ ସ୍ଥିତି କିଛି ସୁଧୁରିଥିବା ରିପୋର୍ଟରେ ଉଲ୍ଲେଖ କରାଯାଇଛି। ଜୁନ୍ ମାସରେ ଔଦ୍ୟୋଗିକ ଉତ୍ପାଦନ ୩୩.୯% ହ୍ରାସ ହେବା ନେଇ ପରିବର୍ତ୍ତିତ ଆକଳନ କରାଯାଇଥିଲା। ସେହିଭଳି ଜୁନ୍ରେ ଏହି ବର୍ଗରେ ଉତ୍ପାଦନ ପ୍ରାୟ ୨୦.୦% ଖସିବା ନେଇ ରଏଟର୍ସ ବିଶେଷଜ୍ଞମାନେ ଆଶଙ୍କା କରିଥିଲେ। ହେଲେ ସ୍ଥିତି ସାମାନ୍ୟ ଉନ୍ନତ ରହିଥିବା ରିପୋର୍ଟରେ ପ୍ରକାଶ ପାଇଛି।
ମାର୍ଚ୍ଚ ଶେଷ ବେଳକୁ ସରକାର ଘୋଷଣା କରିଥିବା ଲକ୍ଡାଉନ ଯୋଗୁ ଔଦ୍ୟୋଗିକ କାର୍ଯ୍ୟକଳାପକୁ ଶକ୍ତ ଧକ୍କା ଲାଗିଥିଲା। ଧୀରେ ଧୀରେ କଟକଣା କୋହଳ କରାଯାଉଥିବାରୁ ସ୍ଥିତିରେ ସୁଧାର ଆସୁଥିବା ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ପକ୍ଷରୁ ସୂଚନା ରହିଛି। ଦେଶର ଅର୍ଥ ବ୍ୟବସ୍ଥା ୧୯୪୭ ପରଠାରୁ ବର୍ତ୍ତମାନ ସବୁଠାରୁ ଖରାପ ସ୍ଥିତିରେ ରହିଥିବା ବଜାର ବିଶେଷଜ୍ଞ କହିଛନ୍ତି। କରୋନା ସଂକ୍ରମଣ ବର୍ତ୍ତମାନ ନିୟନ୍ତ୍ରଣରେ ଆସୁ ନ ଥିବାରୁ ବିଭିନ୍ନ ରାଜ୍ୟ ସ୍ତରରେ ଲକ୍ଡାଉନ ଘୋଷଣା କରୁଛନ୍ତି। ରାଜ୍ୟଗୁଡିକ ସ୍ତରରେ ବିଭିନ୍ନ କଟକଣା ଯୋଗୁ ସାଧାରଣ ପରିବହନ ବ୍ୟବସ୍ଥା କ୍ଷେତ୍ରରେ କଟକଣା ଲାଗୁ କରାଯାଇଛି।
ଫ୍ୟାକ୍ଟ୍ରିଗୁଡିକରେ ଉତ୍ପାଦନ ପ୍ରଭାବିତ ହୋଇଥିବାରୁ ଗାର୍ମେଣ୍ଟ, ଯାନ, କଞ୍ଜ୍ୟୁମର ଡ୍ୟୁରେବଲ ଭଳି ବିଭିନ୍ନ କ୍ଷେତ୍ର ବର୍ତ୍ତମାନ କ୍ଷତିଗ୍ରସ୍ତ ସ୍ଥିତିରେ ରହିଛି। ଦେଶର ଅର୍ଥ ବ୍ୟବସ୍ଥାକୁ ୧୭% ଯୋଗଦାନ ରଖୁଥିବା ମାନୁଫାକ୍ଚରିଂ କ୍ଷେତ୍ର ଗତ ୩ ମାସରେ ୪୦.୭% ଖସିଛି। ଅର୍ଥନୈତିକ କାର୍ଯ୍ୟକଳାପ ଦ୍ରୁତ ହାରରେ ଖସିଥିବା ଏହା ସୂଚାଇ ଦେଉଛି। ଜୁଲାଇରେ ଯାତ୍ରୀବାହୀ ଯାନ ଉତ୍ପାଦନ ୨୯.୪% ଖସିଛି। ଏପ୍ରିଲ- ଜୁନ୍ରେ ଅର୍ଥ ବ୍ୟବସ୍ଥା ୨୦% ଖସିବ ବୋଲି ଅର୍ଥନୀତିଜ୍ଞମାନେ କହିଛନ୍ତି। ଦେଶର ଅର୍ଥ ବ୍ୟବସ୍ଥା ୬% ହାରରେ ଅଭିବୃଦ୍ଧି କରିବ ବୋଲି ସରକାର ଆଶାବାଦୀ ରହିଥିଲେ। ହେଲେ କରୋନା ଯୋଗୁ ବର୍ତ୍ତମାନ ଜିଡିପି ଋଣାତ୍ମକ ରହିବ ବୋଲି ଜଣାପଡିଛି।
