ଢେଙ୍କାନାଳ ଅଫିସ, ୮ା୭
ଢେଙ୍କାନାଳ ଜିଲାର ଶିଳ୍ପାନୁଷ୍ଠାନଗୁଡ଼ିକୁ କରୋନା ସଂକ୍ରମଣରୁ ଦୂରେଇ ରଖିବାକୁ ପ୍ରଶାସନ ପକ୍ଷରୁ ମଙ୍ଗଳବାର ନୂତନ କଟକଣା ଜାରି କରାଯାଇଛି। ବାହାରୁ ଆସୁଥିବା ଅଧିକାରୀ, କର୍ମଚାରୀ ଏବଂ ଶ୍ରମିକଙ୍କୁ କମ୍ପାନୀକୁ ବାରଣ କରାଯାଇଛି। କାରଖାନା ପରିସରରେ ରହୁଥିବା କର୍ମଚାରୀଙ୍କୁ ନେଇ କାମ ଚାଲିବ। ସେମାନଙ୍କ ସୁରକ୍ଷିତ ଭାବେ ରହିବା ବ୍ୟବସ୍ଥା କମ୍ପାନୀ କର୍ତ୍ତୃପକ୍ଷ କରିବେ। କୌଣସି ପରିସ୍ଥିତିରେ କମ୍ପାନୀରେ ଅଧିକ ଜନସମାଗମ ହେବନାହିଁ। କର୍ମସ୍ଥଳରେ ଅନୂ୍ୟନ ୬ଫୁଟ ଦୂରତା, ମାସ୍କ ବ୍ୟବହାର, ଟଚ୍ ଫ୍ରି ମେକାନିଜମ୍ ସହ ହାତଧୁଆ ବ୍ୟବସ୍ଥା ହେବ। କର୍ମଚାରୀଙ୍କର ନିୟମିତ ଥର୍ମାଲ ସ୍କାନିଂ କରାଯିବ। ଶିଫ୍ଟ ଶେଷ ହେବା ମଝିରେ ଏକଘଣ୍ଟା ବିରତି ଦିଆଯିବ। ୬୫ ବର୍ଷରୁ ଅଧିକ ବୟସର ବ୍ୟକ୍ତି, ଗର୍ଭବତୀ କାର୍ଯ୍ୟସ୍ଥଳକୁ ପ୍ରବେଶ କରିପାରିବେ ନାହିଁ। ବିନା କାରଣରେ ଲୋକଙ୍କୁ କମ୍ପାନୀ ପରିସର ମନା ହୋଇଛି। କାମ କରିବା ସମୟରେ କେହି ସଂକ୍ରମିତ ହେଲେ କମ୍ପାନୀ କର୍ତ୍ତୃପକ୍ଷ ତୁରନ୍ତ ପ୍ରଶାସନକୁ ଜଣାଇବେ। ଏହାକୁ ବାଦ୍ ଦେଲେ କର୍ମଚାରୀଙ୍କ ସ୍ବାସ୍ଥ୍ୟବୀମା, ଯାନବାହନ ଓ ମେଶିନଗୁଡ଼ିକୁ ବିଶୋଧନ କରିବା ଲାଗି ନିର୍ଦ୍ଦେଶାବଳୀ ଜାରି କରାଯାଇଛି। ସପ୍ତାହାନ୍ତ ଶଟ୍ଡାଉନ କମ୍ପାନୀ ପରିସରରେ ମଧ୍ୟ ଲାଗୁହେବ। ଜୁଲାଇରେ ଅଧିକ ସଂକ୍ରମଣ ଆଶଙ୍କା ଥିବାରୁ ପ୍ରଶାସନ ପକ୍ଷରୁ ଏହି ପଦକ୍ଷେପ ନିଆଯାଇଛି। ନିୟମ ଉଲ୍ଲଂଘନ କଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ଭୂମେଶ ଚନ୍ଦ୍ର ବେହେରା ସୂଚନା ଦେଇଛନ୍ତି।
