ଭବାନୀପାଟଣା,୨୧ା୭ (ଉତ୍ତମ କୁମାର ଦାଶ): ଇନ୍ଦ୍ରାବତୀ ପ୍ରକଳ୍ପ ପାଇଁ ରାଜ୍ୟରେ କଳାହାଣ୍ଡି ଜିଲା ଏକ ସ୍ବତନ୍ତ୍ର ପରିଚୟ ପାଇଛି। ଏହି ପ୍ରକଳ୍ପ ଏବେ ୨୫ ବର୍ଷ ପୂରଣ କରିସାରିଛି। ଇନ୍ଦ୍ରାବତୀର ଜଳସେଚନକୁ ପାଥେୟ କରି ଏବେ ଜିଲାର ୧.୧୮ଲକ୍ଷ ହେକ୍ଟର ଜମିରେ ଜଳସେଚନ ହେବା ସହ ଦୁଇଫସଲି ଚାଷ ହୋଇପାରୁଛି। ଅନ୍ୟପଟେ ୬୦୦ ମେଗାୱାଟ ବିଜୁଳି ଉତ୍ପାଦନ କ୍ଷମତା ରଖିଥିବା ଇନ୍ଦ୍ରାବତୀ ପ୍ରକଳ୍ପ ବିଗତ ୨୫ବର୍ଷ ମଧ୍ୟରେ ୩୫୯୭.୨୫କୋଟି ଟଙ୍କାର ବିଦ୍ୟୁତ୍ ବିକ୍ରିକରି ରାଜ୍ୟ ମାନଚିତ୍ରରେ ନିଜକୁ ପ୍ରତିଷ୍ଠିତ କରିପାରିଛି।
୧୯୭୮ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ସ୍ବର୍ଗତ ମୋରାର୍ଜୀ ଦେଶାଇ ଇନ୍ଦ୍ରାବତୀ ପ୍ରକଳ୍ପର ଭିଭିପ୍ରସ୍ତର ସ୍ଥାପନ କରିବା ପରେ ପ୍ରକଳ୍ପ କାମ ଆରମ୍ଭ ହୋଇଥିଲା। ସମୁଦ୍ର ପତ୍ତନରୁ ପ୍ରାୟ ୭ଶହ ମିଟର ପାହାଡ଼ ପରିବେଷ୍ଟନି ମଧ୍ୟରେ ଇନ୍ଦ୍ରାବତୀ, କପୁର, ମୂରାନ, ଓ ପୋଡ଼ାଗଡ ଭଳି ଚିରସ୍ରୋତା ନଦୀମାନଙ୍କ ସମଷ୍ଟିରେ ୧୧୦ବର୍ଗ କିଲୋମିଟର ପରିବ୍ୟାପ୍ତ ଏକ ସୁଉଚ୍ଚ ଜଳଭଣ୍ଡାର ସୃଷ୍ଟି ହେଲା। ସେହି ଜଳରାଶିକୁ ଉଦୟଗିରି ପାହାଡ଼କୁ ଭେଦକରି ଚାରି କିଲୋମିଟର ଲମ୍ବର ଏକ ସୁଡ଼ଙ୍ଗ ତିଆରକରି ମୁଖିଗୁଡ଼ା ଶକ୍ତି ଗୃହରୁ ବିଦ୍ୟୁତ୍ ଉତ୍ପାଦନ କରାଗଲା। ପ୍ରକଳ୍ପର ବିକାଶଧାରା ସାଙ୍ଗରେ ବିଜୁଳି ଉତ୍ପାଦନ ସହ ମଙ୍ଗଳପୁର ହାତୀ ବ୍ୟାରେଜର ବାମ, ଦକ୍ଷିଣ ଓ ମେଗା ଉଠା ଜଳସେଚନ କେନାଲ ମାଧ୍ୟମରେ ଜିଲାର ୮ଟି ବ୍ଲକରେ ଜଳସେଚନ ହେଲା। ପ୍ରକଳ୍ପକୁ ୧୯୯୧ମସିହାରେ ଏକ ବଡ଼ଧରଣର ଆଘାତ ମିଳିଥିବା ସତ୍ତ୍ୱେ ପ୍ରକଳ୍ପ କାମ ପୁନର୍ଜୀବିତ ହୋଇଥିଲା। ଶେଷରେ ୧୯୯୯ମସିହାରେ ପ୍ରଥମ
ୟୁନିଟ କାର୍ଯ୍ୟକ୍ଷମ ହୋଇ ବିଦ୍ୟୁତ୍ ଉତ୍ପାଦନ ସହ ବାମ କେନାଲରେ ଜଳସେଚନ ଶୁଭାରମ୍ଭ ହୋଇଥିଲା। ପରେ ୨୦୦୧ମସିହାରେ ଚାରିଟି ଯାକ ୟୁନିଟ କାର୍ଯ୍ୟକ୍ଷମ ହୋଇ ୬୦୦ ମେଗାୱାଟ ବିଦ୍ୟୁତ୍ ଉତ୍ପାଦନ କରିବା ସହ ଦକ୍ଷିଣ ମୁଖ୍ୟ କେନାଲରେ ଜଳସେଚନ ଆରମ୍ଭ କରାଯାଇଥିଲା। ଇନ୍ଦ୍ରାବତୀ ପ୍ରକଳ୍ପରୁ ୧୯୯୯-୨୦୦୦ ଆର୍ଥିକବର୍ଷରେ ୪୯୦.୩୮ ମିଲିୟନ ୟୁନିଟ ବିଜୁଳି ଉତ୍ପାଦନ ହୋଇ ୪୫.୯୫ କୋଟି ଟଙ୍କାର ରାଜସ୍ବ ମିଳିଥିଲା। ସେହିପରି ୨୦୨୪-୨୦୨୫ ଆର୍ଥିକ ବର୍ଷ ସୁଦ୍ଧା ପ୍ରକଳ୍ପରୁ ମୋଟ ୪୯, ୭୬୫ମିଲିୟନ ୟୁନିଟ୍ ବିଦ୍ୟୁତ୍ ଉତ୍ପାଦନ ହୋଇ ୩୫୯୭.୨୫କୋଟି ଟଙ୍କାର ବିଦ୍ୟୁତ୍ ବିକ୍ରିକରି ସାରିଥିବା ସୂଚନା ମିଳିଛି। ୨୦୦୭-୦୮ରେ ପ୍ରକଳ୍ପରୁ ସର୍ବାଧିକ ୩୦୧୯ମିଲିୟନ ୟୁନିଟ ବିଦ୍ୟୁତ୍ ଉତ୍ପାଦନ ହୋଇ ୧୮୨.୬୭କୋଟି ଟଙ୍କା ଉପାର୍ଜନ କରିଥିବା ବେଳେ ୨୦୦୩- ୦୪ବର୍ଷରେ ସର୍ବନିମ୍ନ ୮୦୭.୦୭ମିଲିୟନ ୟୁନିଟ ବିଦ୍ୟୁତ୍ ଉତ୍ପାଦନ କରି ମାତ୍ର ୫୦.୪୦କୋଟି ଟଙ୍କା ରାଜସ୍ବ ଆଦାୟ କରିଥିଲା। ଏଭଳି ଏକ ନିର୍ଭରଯୋଗ୍ୟ ପ୍ରକଳ୍ପର ସ୍ଥାୟୀ ରକ୍ଷଣାବେକ୍ଷଣ ପାଇଁ ସରକାର ଚିନ୍ତାଶୀଳ ହେବା ପାଇଁ ସାଧାରଣରେ ଦାବି ହେଉଛି।
