ନୂଆଦିଲ୍ଲୀ,୮।୧ : ଭାରତ ଏବଂ ବାଂଲାଦେଶର ଉଚ୍ଚାଭିଳାଷୀ ଇଣ୍ଡୋ-ବାଂଲା ଫ୍ରେଣ୍ଡଶିପ୍ ପାଇପଲାଇନ ପ୍ରକଳ୍ପ (ଆଇବିଏଫପିଏଲ) ଆସନ୍ତା ମାସରୁ ଆରମ୍ଭ ହେବ। ଏହି ପାଇପଲାଇନର କାର୍ଯ୍ୟ ଆରମ୍ଭ ଉଭୟ ଦେଶର ଶକ୍ତି ଆବଶ୍ୟକତା ପୂରଣ କରିବାରେ ସହାୟକ ହେବ।
ଆଇବିଏଫପିଏଲ ପ୍ରକଳ୍ପର ମୂଲ୍ୟ ୩୭୭ କୋଟି ଟଙ୍କା । ଇଣ୍ଡୋ-ବାଂଲା ଫ୍ରେଣ୍ଡଶିପ୍ ପାଇପଲାଇନ ପ୍ରକଳ୍ପ ପଶ୍ଚିମବଙ୍ଗର ସିଲିଗୁଡିକୁ ବାଂଲାଦେଶର ପାର୍ବତୀପୁର ଡିପୋ ସହିତ ସଂଯୋଗ କରିବ। ଏହି ପାଇପଲାଇନ ସାହାଯ୍ୟରେ ଭାରତର ଆସାମର ନୁମାଲିଗଢ ରିଫାଇନାରୀର ମାର୍କେଟିଂ ଟର୍ମିନାଲ ସିଲିଗୁଡିରୁ ଇନ୍ଧନ ବାଂଲାଦେଶ ପେଟ୍ରୋଲିୟମ ନିଗମର ପାର୍ବତୀପୁର ଡିପୋକୁ ପଠାଯିବ।
ଏହି ୧୩୦ କିଲୋମିଟର ଲମ୍ବା ପାଇପଲାଇନର ମୂଳଦୁଆ ସେପ୍ଟେମ୍ବର ୨୦୧୮ ରେ ରଖାଯାଇଥିଲା। ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବାଂଲାଦେଶ ପ୍ରତିପକ୍ଷ ଶେଖ ହସିନା ଭିଡିଓ କନଫରେନ୍ସିଂ ମାଧ୍ୟମରେ ଅଂଶଗ୍ରହଣ କରିଥିଲେ। ଭାରତ ଏହି ପ୍ରକଳ୍ପ ପାଇଁ ଅର୍ଥ ପ୍ରଦାନ କରିଛି ଏବଂ ଏହି ପ୍ରକଳ୍ପର କାର୍ଯ୍ୟ ଗତ ବର୍ଷ ୨୦୨୨ ଡିସେମ୍ବର ୧୨ ରେ ଶେଷ ହୋଇଥିଲା। ବର୍ତ୍ତମାନ ଏହି ପାଇପଲାଇନ ଆସନ୍ତା ମାସରୁ ଆରମ୍ଭ ହେବ। ତେବେ ବାଂଲାଦେଶକୁ ତୈଳ ରପ୍ତାନି ଚଳିତ ବର୍ଷ ଶେଷ ସୁଦ୍ଧା ଆରମ୍ଭ ହେବ। ନୁମାଲିଗଢ ରିଫାଇନାରୀର ଜଣେ ଅଧିକାରୀ କହିଛନ୍ତି ଯେ ଏହି ପ୍ରକଳ୍ପ ଇଞ୍ଜିନିୟରିଂର ଏକ ଆଶ୍ଚର୍ଯ୍ୟଜନକ ଘଟଣା। ଏହି ପ୍ରକଳ୍ପ ସମ୍ପୂର୍ଣ୍ଣ କରିବାରେ ଅନେକ ଆହ୍ବାନର ସମ୍ମୁଖୀନ ହୋଇଥିଲେ ମଧ୍ୟ ଉଭୟ ଦେଶ ବୈଷୟିକ ଏବଂ ପାରସ୍ପରିକ ସହଯୋଗରେ ସମସ୍ତ ବାଧାକୁ ଅତିକ୍ରମ କରିଥିଲେ ।
ଏହି ପ୍ରକଳ୍ପ ଆରମ୍ଭ ହେବା ପରେ ଉଭୟ ଦେଶ ନିକଟତର ହେବେ ବୋଲି ଅଧିକାରୀ କହିଛନ୍ତି। ପ୍ରକୃତରେ, ଏପ୍ରିଲ ୨୦୧୭ ରେ, ନୁମାଲିଗଢ ରିଫାଇନାରୀ ଏବଂ ବାଂଲାଦେଶ ପେଟ୍ରୋଲିୟମ ନିଗମ ମଧ୍ୟରେ ପାଇପଲାଇନ ମାଧ୍ୟମରେ ହାଇ ସ୍ପିଡ ଡିଜେଲ ରପ୍ତାନି ପାଇଁ ଏକ ଚୁକ୍ତି ହୋଇଥିଲା। ଏହା ପରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାଂଲାଦେଶର ପ୍ରଧାନମନ୍ତ୍ରୀ ଶେଖ ହସିନାଙ୍କ ସହ ଏକ ବୈଠକ କରିଥିଲେ। ବୈଠକରେ ପ୍ରଧାନମନ୍ତ୍ରୀ ମୋଦି ପାଇପଲାଇନକୁ ଅର୍ଥ ପ୍ରଦାନ କରିବାକୁ ରାଜି ହୋଇଥିଲେ। ଯାହା ପରେ ଅକ୍ଟୋବର ୨୦୧୭ରେ ଏହି ପ୍ରକଳ୍ପର କାର୍ଯ୍ୟ ଆରମ୍ଭ ହୋଇଥିଲା।
ଏହି ପାଇପଲାଇନର କ୍ଷମତା ବାର୍ଷିକ ୧୦ ଲକ୍ଷ ମେଟ୍ରିକ ଟନ ଅଟେ । ଯେଉଁଥିରେ ନୁମାଲିଗଢ ରିଫାଇନାରୀ ଲିମିଟେଡ ଦ୍ୱାରା ୯୧.୮୪ କୋଟି ଟଙ୍କା ବିନିଯୋଗ କରାଯାଇଛି। ଅବଶିଷ୍ଟ ୨୮୬ କୋଟି ଟଙ୍କା ଭାରତ ସରକାର ବାଂଲାଦେଶକୁ ସହାୟତା ରୂପେ ପ୍ରଦାନ କରିଥିଲେ। ଇଣ୍ଡୋ-ବାଂଲା ଫ୍ରେଣ୍ଡସିପ ପାଇପଲାଇନ ମାଧ୍ୟମରେ ରପ୍ତାନି ଆରମ୍ଭରୁ ବାଂଲାଦେଶ ୧୫ ବର୍ଷ ପାଇଁ ଭାରତରୁ ଡିଜେଲ କିଣିବ।
