ନୂଆଦିଲ୍ଲୀ,୩୦।୧୨: ୧୯୮୩ରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ରିଟ୍ରିଟ ପାଇଁ ୪୦ରୁ ଅଧିକ ଦେଶର ପ୍ରମୁଖ ନେତାଙ୍କ ସହ ବୈଠକ କରୁଥିଲେ। ଗୋଆର ପର୍ଯ୍ୟଟନ କ୍ଷେତ୍ରକୁ ବିଶ୍ୱସ୍ତରରେ ଲୋକପ୍ରିୟ କରିବା ପାଇଁ ଗୋଆରେ ଏହି ବୈଠକ ଆୟୋଜିତ ହୋଇଥିଲା। ତେବେ ଏହି ସମୟରେ କିଛି ଏପରି କୌତୁହଳପୂର୍ଣ୍ଣ ଘଟଣା ଘଟିଥିଲା ଯାହାକୁ ଇନ୍ଦିରାଙ୍କ ସେଫ୍ ସତୀଶ ଅରୋରା ତାଙ୍କ ପୁସ୍ତକ ‘ସ୍ବିଟସ୍ ଆଣ୍ଡ ବିଟର୍ସ: ଟେଲ୍ସ ଫର୍ମ ଏ ସେଫ୍ସ ଲାଇଫରେ ବର୍ଣ୍ଣନା କରିଛନ୍ତି।
ଘଟଣାଟି କିଛି ଏହିପରି, ଦିନେ ସକାଳ ବ୍ରେକଫାଷ୍ଟରେ ଇନ୍ଦିରା, ଅମୃତଭଣ୍ଡା ଖାଇବା ପାଇଁ ଇଛା ପ୍ରକାଶ କରିଥିଲେ। ଏହାକୁ ଶୁଣିବା ମାତ୍ରେ ୫ଷ୍ଟାର ତାଜ ହୋଟେଲର ସେଫଙ୍କ ମଧ୍ୟରେ ଚିନ୍ତା ବଢିଯାଇଥିଲା। ତେବେ ଏହି ଅମୃତଭଣ୍ଡା ଯୋଗାଡ କରିବା ହୋଟେଲର ସବୁ ଷ୍ଟାଫଙ୍କ ପାଇଁ ଚ୍ୟାଲେଞ୍ଜପୂର୍ଣ୍ଣ ରହିଥିଲା।
ସତୀଶ ତାଙ୍କ ପୁସ୍ତକରେ ଲେଖିଛନ୍ତି, ତାଙ୍କ ଟିମ୍କୁ ଭାରତୀୟ ଫଳ ବିଶେଷ କରି ସ୍ଥାନୀୟ ଫଳ ଯୋଗାଡ କରିବାରେ ଅସୁବିଧା ବଢି ଯାଇଥିଲା। ବୈଠକ ପାଇଁ ଗୋଆ ସୁସଜ୍ଜିତ ଥିବାବେଳେ ଅତିଥିଙ୍କୁ ଖାଦ୍ୟ ପରଷିବାର ସବୁ ଦାୟିତ୍ୱ ତାଜ ହୋଟେଲ ନେଇଥିଲା। ହୋଟେଲର ସବୁ ଷ୍ଟାଫ ସେତେବେଳେ ବିଭିନ୍ନ ବ୍ୟଞ୍ଜନ ପ୍ରସ୍ତୁତିରେ ଲାଗି ପଡିଥିଲେ। ଏହି ସମୟରେ ଇନ୍ଦିରାଙ୍କ ଅମୃତଭଣ୍ଡା ଖାଇବାର ଇଛା ଷ୍ଟାଫଙ୍କୁ ହରଡଘଣାରେ ପକେଇବା ସଦୃଶ ଥିଲା।
ଅମୃତଭଣ୍ଡା ଯୋଗାଡ କରିବା ନେଇ ଚର୍ଚ୍ଚା ଚାଲିଥିବାବେଳେ ଅନ୍ୟ ଏକ ଖବର ଶୁଣିବାକୁ ମିଳିଲା। ଇନ୍ଦିରା ପ୍ରତିଦିନ ଅମୃତଭଣ୍ଡା ଖାଇବା ପାଇଁ ଇଛା କରିଥିଲେ। ତେବେ ଗୋଆରେ ସେହି ସମୟରେ ଅମୃତଭଣ୍ଡା ବିଶେଷ କରି ପାଚିଲା ଅମୃତଭଣ୍ଡା ମିଳିବା କଷ୍ଟକର ହୋଇପଡିଥିଲା। ନଭେମ୍ବରରେ ଗୋଆରେ ଅମୃତଭଣ୍ଡା ମିଳୁ ନ ଥିଲା ସେଥିପାଇଁ ସତୀଶ ମୁମ୍ବାଇରୁ କଞ୍ଚା ଅମୃତଭଣ୍ଡା ଆଣିବା ପାଇଁ ବ୍ୟବସ୍ଥା କରିଥିଲେ। ଏହାକୁ କଞ୍ଚା ଆଣି କାଗଜରେ ଗୁଡାଇ ପାଚିଲା କରିବା ପାଇଁ ବ୍ୟବସ୍ଥା କରିଥିଲେ।
ତହିଁ ଆରଦିନ ଏପରି କିଛି ଘଟିଲା ଯାହା ଦେଖି ବିଶ୍ୱାସ କରିପାରିଲୁ ନାହିଁ। ବ୍ରେକଫାଷ୍ଟରେ ପାଚିଲା ଅମୃତଭଣ୍ଡା ପରଷା ଯିବାର ଥିଲା ହେଲେ ତାହା ଅଧିକ ପାଚି ଯାଇଥିଲା। କାରଣ ଯାହାଙ୍କୁ ଅମୃତଭଣ୍ଡାକୁ କାଗଜରେ ଗୁଡାଇ ରଖିବାର ଦାୟିତ୍ୱ ଦିଆଯାଇଥିଲା ସେ ତାକୁ ଅଧିକ ସମୟ ରଖି ଦେଇଥିଲେ। ଯାହାଯୋଗୁ ତାହା ପୁରା ପଚି ଯାଇଥିଲା ବୋଲି ସେ କହିଛନ୍ତି।
ସତୀଶ ଆହୁରି କହିଛନ୍ତି, ଏହାରି ଭିତରେ ଅତିଥିଙ୍କ ସହ ଇନ୍ଦିରା ବ୍ରେକଫାଷ୍ଟ ପାଇଁ ଆସିବାକୁ ଯାଉଥିଲେ। ହଠାତ୍ କଣ କରାଯିବା ବୁଝା ପଡୁ ନ ଥିଲା। ରୋଷୟା ପ୍ରଧାନମନ୍ତ୍ରୀ ଇନ୍ଦିରାଙ୍କୁ ଏପରି ପଚି ଯାଇଥିବା ଅମୃତଭଣ୍ଡା ପରଷିବାକୁ ରାଜି ନ ଥିଲା। ଏହା ପରେ ଅନ୍ୟ ଉପାୟ ନ ପାଇ ମୋତେ ପୋଲିସ ଗାଡିରେ ବସି ଅମୃତଭଣ୍ଡା ଆଣିବା ପାଇଁ ଯିବାକୁ ପଡିଲା। ସମୟ କମ୍ ଥିଲା। ଗାଡିରେ ମୋ ସହ କିଛି ପୋଲିସ ମଧ୍ୟ ଥିଲେ। ଭାଗ୍ୟ ଭଲ ଥିଲା କି, ପାଖ ବଜାରରୁ ମୋତେ ଅମୃତଭଣ୍ଡା ମିଳି ଯାଇଥିଲା। ଗୋଟିଏ କି ଦୁଇଟା ନୁହେଁ ପୁରାପୁରି ଏକ ଡଜନ ଅମୃତଭଣ୍ଡା ମିଳିଥିଲା। ସେତେବେଳେ ମୁଁ ନିଜକୁ ଯୋଦ୍ଧା ଭଳି ଅନୁଭବ କରୁଥିଲି। ଯିଏକି ଯୁଦ୍ଧ ଜିତି ୧୨-୧୨ଟି ଅମୃତଭଣ୍ଡା ନେଇ ପୋଲିସ ଗାଡିରେ ଫେରୁଥିଲା।
