ଭୁବନେଶ୍ୱର,୨୨ା୧୦(ଅନୁରାଧା ମହାରଣା): ୭% ଜିଡିପି ଅଭିବୃଦ୍ଧି ଏବଂ ୧,୫୧,୦୦୦ରୁ ଅଧିକ ଷ୍ଟାର୍ଟଅପ୍ ସହିତ ଭାରତ ଏହାର ଅର୍ଥନୀତିକୁ ନୂଆରୂପ ଦେବାକୁ ଯାଉଛି। ନିକଟରେ ନୂଆଦିଲ୍ଲୀରେ ଆୟୋଜିତ ବାର୍ଷିକ ଭାରତ ନେତୃତ୍ୱ ସମ୍ମିଳନୀରେ ଭାରତ ଓ ଚାଇନାର ଅର୍ଥନୈତିକ ଅଭିବୃଦ୍ଧି ସମ୍ପର୍କରେ ବିଶେଷ ଆଲୋଚନା କାଳରେ ଆମେରିକା-ଇଣ୍ଡିଆ ଷ୍ଟ୍ରାଟେଜିକ ପାର୍ଟନରଶିପ ଫୋରମର ଚେୟାରମ୍ୟାନ୍ ଜନ୍ ଚାମ୍ବର୍ସ୍ ଏପରି ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଦୁଇ ବୃହତ ଉଦୀୟମାନ ଅର୍ଥନୀତି ଭାରତ ଏବଂ ଚାଇନା କ୍ରମାଗତ ଭାବରେ ବିଶ୍ୱ ଅର୍ଥନୈତିକ ଆଲୋଚନାରେ ଆଗରେ ରହିଆସିଛନ୍ତି। ଏହି ଶତାବ୍ଦୀର ଶେଷ ସୁଦ୍ଧା ଭାରତ କେବଳ ଚାଇନାକୁ ଅତିକ୍ରମ କରିବ ନାହିଁ, ଜିଡିପି ଦୃଷ୍ଟିରୁ ମଧ୍ୟ ବୃହତର ହେବ। ସେ କହିଛନ୍ତି, ବିଶ୍ୱ ବ୍ୟାଙ୍କର ଭାରତ ବିକାଶ ଅଦ୍ୟତନ ଅନୁଯାୟୀ, ଦେଶର ଜିଡିପି ୨୦୨୪-୨୫ ଆର୍ଥିକ ବର୍ଷରେ ୭% ବୃଦ୍ଧି ପାଇବ ବୋଲି ଆକଳନ କରାଯାଇଛି ଯାହା ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି ଭାବରେ ନିଜର ସ୍ଥିତିକୁ ଦର୍ଶାଉଛି। ଏହି ଅଭିବୃଦ୍ଧି ଗତି ସ୍ଥିର ରହିଆସିଛି, ଜିଡିପି ଋ଼ଣ ୨୦୨୨-୨୩ରେ ୭.୦% ରୁ ଋ଼ଣ ୨୦୨୩-୨୪ ରେ ୮.୨% କୁ ବୃଦ୍ଧି ପାଇଛି । ୨୦୨୪ରେ ଜିଡିପି ଅଭିବୃଦ୍ଧି ୪.୮% ରେ ପହଞ୍ଚିବ ଏବଂ ୨୦୨୫ରେ ଏହା ୪.୩% କୁ ହ୍ରାସ ପାଇବ ବୋଲି ବିଶ୍ୱ ବ୍ୟାଙ୍କ ଆକଳନ କରିଛି।
ଭାରତର ସକାରାତ୍ମକ ଅଥନୈତିକ ଦୃଷ୍ଟିକୋଣକୁ ଆଧାର କରି ସେବି ପୂର୍ଣ୍ଣକାଳୀନ ସଦସ୍ୟ ଅନନ୍ତ ନାରାୟଣ ଜି ଏନଏସଇରେ ନିବେଶକ ସଚେତନତା ସପ୍ତାହରେ ଭାରତର ଆକର୍ଷଣୀୟ ବଜାର ପ୍ରଦର୍ଶନ ଉପରେ ଆଲୋକପାତ କରିଥିଲେ। ଗତ ପାଞ୍ଚ ବର୍ଷ ମଧ୍ୟରେ ଭାରତୀୟ ବଜାର କ୍ରମାଗତ ଭାବରେ ବାର୍ଷିକ ୧୫ % ଯୌଗିକ ଅଭିବୃଦ୍ଧି ହାର ବିତରଣ କରିଥିବାବେଳେ ଚାଇନାର ବଜାର କ୍ଷେତ୍ରରେ ଏହା ସମ୍ଭବ ହୋଇନାହିଁ। ହଂକଂ ପରି କେତେକ କ୍ଷେତ୍ରରେ ଏହା ପ୍ରକୃତରେ ନକାରାତ୍ମକ ବୋଲି ସେ କହିଛନ୍ତି। ନାରାୟଣ କହିଛନ୍ତି ଯେ ଆର୍ଥିକବର୍ଷ ୨୦୨୪ରେ ବେଞ୍ଚମାର୍କ ସୂଚକାଙ୍କ ୨୮% ବୃଦ୍ଧି ପାଇଥିବାବେଳେ ଭୋଲାଟିଲିଟି ମାତ୍ର ୧୦% ରହିଥିଲା।
୨୦୧୫ରେ ଆରମ୍ଭ ହୋଇଥିବା ଡିଜିଟାଲ ଇଣ୍ଡିଆ ଏକ ଗୁରୁତ୍ୱପୂର୍ଣ୍ଣ ଫଳାଫଳ ଦେଇଛି। ୟୁନିଫାଏଡ ପେମେଣ୍ଟସ ଇଣ୍ଟରଫେସ (ୟୁପିଆଇ) ଦ୍ୱାରା ବ୍ୟାପକ ପରିବର୍ତ୍ତନ ପରିଲକ୍ଷିତ ହୋଇଛି। ୨୦୧୭-୧୮ ଆର୍ଥିକ ବର୍ଷରେ ୯୨ କୋଟି କାରବାର ଅଭିବୃଦ୍ଧି ଦେଖାଦେଇଥିବାବେଳେ ୨୦୨୩-୨୪ରେ ୧୩,୧୧୬ କୋଟି କାରବାରରେ ଡିଜିଟାଲ କାରବାର ହୋଇଛି। ସେହିପରି କୋଭିଡ୍-୧୯ ମହାମାରୀ ସମୟରେ କୋଓ୍ବିନ୍ ପ୍ଲାଟଫର୍ମ ଏକ ଗୁରୁତ୍ୱପୂର୍ଣ୍ଣ ଉପକରଣ ଭାବରେ ଉଭା ହୋଇଥିଲା। ଯାହା ଭାରତର ଟିକାକରଣ ଡ୍ରାଇଭ ପାଇଁ ଡିଜିଟାଲ ମେରୁଦଣ୍ଡ ଭାବରେ କାର୍ଯ୍ୟ କରିଥିଲା। ଏହା ମାତ୍ର ଗୋଟିଏ ଦିନରେ ୨୨୦ କୋଟିରୁ ଅଧିକ ଡୋଜ ପରିଚାଳନା କରିବାରେ ସକ୍ଷମ ହୋଇଥିଲା। ଏହା ଦେଶର ଜନସ୍ବାସ୍ଥ୍ୟ ପାଇଁ ବୈଷୟିକ ଜ୍ଞାନକୌଶଳର ଦକ୍ଷତା ପ୍ରଦର୍ଶନ କରିଥିଲା । ସେହିପରି ଆୟୁଷ୍ମାନ ଭାରତ ଯୋଜନା ଅଧୀନରେ ୩୫.୬ କୋଟିରୁ ଅଧିକ ଆୟୁଷ୍ମାନ କାର୍ଡ ଜାରି କରାଯାଇ ଲକ୍ଷ ଲକ୍ଷ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି। ଏଥିସହ ୯ କୋଟିରୁ ଅଧିକ ଫାସଟ୍ୟାଗ୍ ଜାରି କରାଯାଇଛି।
ସେହିପରି ଭାରତରେ ଷ୍ଟାର୍ଟଅପର ଦ୍ରୁତ ଅଭିବୃଦ୍ଧିକୁ ଦେଶର ଅଥନୈତିକ ପ୍ରଗତିର ଏକ ଗୁରୁତ୍ୱପୂର୍ଣ୍ଣ କାରଣ ବୋଲି ଜନ୍ ଚାମ୍ବର୍ ଦର୍ଶାଇଥିଲେ। ୧୦ରୁ ୧୨ ବର୍ଷ ପୂର୍ବେ ଭାରତରେ ବହୁତ କମ୍ ଷ୍ଟାର୍ଟଅପ ଥିଲା। ୨୦୧୫ ରୁ ୨୦୨୨ ମଧ୍ୟରେ ଷ୍ଟାର୍ଟଅପରେ ପୁଞ୍ଜି ବିନିଯୋଗ ୧୫ ଗୁଣ ବୃଦ୍ଧି ପାଇଛି। ପୁଞ୍ଜି ବିନିଯୋଗର ଏହି ବୃଦ୍ଧି ଏକ ଗତିଶୀଳ ଉଦ୍ୟୋଗୀ ଇକୋସିଷ୍ଟମକୁ ସହାୟକ କରିଛି। ୧,୫୧,୦୦୦ ରୁ ଅଧିକ ସ୍ବୀକୃତିପ୍ରାପ୍ତ ଷ୍ଟାର୍ଟଅପ ସହିତ ଭାରତ ବର୍ତ୍ତମାନ ବିଶ୍ୱର ତୃତୀୟ ବୃହତ୍ତମ ଷ୍ଟାର୍ଟଅପ ଇକୋସିଷ୍ଟମ ଅଟେ। ୨୦୧୬ରେ ଆରମ୍ଭ ହୋଇଥିବା ଷ୍ଟାର୍ଟଅପ ଇଣ୍ଡିଆ ପଦକ୍ଷେପ ଏହି ଅଭିବୃଦ୍ଧିକୁ ତ୍ୱରାନ୍ବିତ କରି ୧୫.୫ ଲକ୍ଷରୁ ଅଧିକ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି କରିବାରେ ପ୍ରମୁଖ ଭୂମିକା ଗ୍ରହଣ କରିଛି। ୨୦୨୩ ମସିହାରେ ସରକାର ଏଆଇ ଫର୍ ଇଣ୍ଡିଆ ୨.୦ ଭଳି ପଦକ୍ଷେପ ଆରମ୍ଭ କରିବା ସହ ୨୦୨୪ରେ ଗ୍ଲୋବାଲ ଇଣ୍ଡିଆ ଏଆଇ ସମ୍ମିଳନୀ ଆୟୋଜନ କରିବା ଦେଶକୁ ବିଶ୍ୱସ୍ତରରେ ପ୍ରତିଷ୍ଠିତ କରୁଛି।
