ନୂଆଦିଲ୍ଲୀ,୧୮।୯: ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ (ଇଏସି-ପିଏମ) ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ଏହି ରିପୋର୍ଟରେ ଦର୍ଶାଯାଇଛି ଯେ, ଉଦାରୀକରଣ ପରେ ଦକ୍ଷିଣ ରାଜ୍ୟଗୁଡ଼ିକ ଆଗକୁ ବଢ଼ିଛନ୍ତି। ଭାରତର ଜିଡିପିରେ ଉଲ୍ଲେଖନୀୟ ଯୋଗଦାନ ଦେଇଥିବା ଏହି ରାଜ୍ୟଗୁଡିକର ମୁଣ୍ଡପିଛା ଆୟ ହାରାହାରିଠାରୁ ଅଧିକ ରହିଛି।
କର୍ନାଟକ, ଆନ୍ଧ୍ରପ୍ରଦେଶ, ତେଲଙ୍ଗାନା, କେରଳ ଏବଂ ତାମିଲନାଡୁ ଭଳି ରାଜ୍ୟଗୁଡ଼ିକ ଏବେ ଭାରତର ଜିଡିପିର ୩୦% ଅଂଶ ଗ୍ରହଣ କରୁଥିବା ବେଳେ ଅନ୍ୟାନ୍ୟ ଅଞ୍ଚଳ ବିଶେଷକରି ପୂର୍ବାଞ୍ଚଳ ରାଜ୍ୟଗୁଡ଼ିକରେ ତାଳ ମିଳାଇବା ପାଇଁ ସଂଘର୍ଷ କରୁଛନ୍ତି।
ରିପୋର୍ଟରେ ସବୁଠାରୁ ଆଶ୍ଚର୍ଯ୍ୟଜନକ ପ୍ରଦର୍ଶନ କରିଥିବା ରାଜ୍ୟ ହେଉଛି ପଶ୍ଚିମବଙ୍ଗ। ଏଠାରେ ପ୍ରାରମ୍ଭିକ ଅର୍ଥନୈତିକ ଶକ୍ତି ସତ୍ତ୍ୱେ କ୍ରମାଗତ ଜିଡିପି ହ୍ରାସ ଦେଖିବାକୁ ମିଳିଛି। ୧୯୬୦-୬୧ରେ ଜାତୀୟ ଜିଡିପିରେ ପଶ୍ଚିମବଙ୍ଗର ଅଂଶ ୧୦.୫% ଥିବାବେଳେ ଏବେ ୫.୬% ହ୍ରାସ ପାଇଛି।
ଏକଦା ଜାତୀୟ ହାରାହାରି ୧୨୭.୫% ଥିବା ରାଜ୍ୟର ମୁଣ୍ଡପିଛା ଆୟ ଏବେ ୮୩.୭%କୁ ଖସି ଆସିଛି, ଯାହା ରାଜସ୍ଥାନ ଓ ଓଡ଼ିଶା ଭଳି ପାରମ୍ପରିକ ପଛୁଆ ରାଜ୍ୟଠାରୁ ମଧ୍ୟ କମ।
ଐତିହାସିକ ସୁବିଧା ଏବଂ ରଣନୈତିକ ସାମୁଦ୍ରିକ ଅବସ୍ଥିତି ସତ୍ତ୍ୱେ ଏହି ହ୍ରାସ ଏହାର ନିରନ୍ତର ଖରାପ ପ୍ରଦର୍ଶନର କାରଣ ପାଲଟିଥିବା ନୀତି ଏବଂ କାରଣଗୁଡିକ ଉପରେ ପ୍ରଶ୍ନ ଉଠାଇଛି।
ବିଗତ କିଛି ଦଶନ୍ଧି ମଧ୍ୟରେ ବିହାରର ସ୍ଥିତି ସ୍ଥିର ହୋଇଥିଲେ ହେଁ ଅଭିବୃଦ୍ଧି ଦୃଷ୍ଟିରୁ ଏହା ଅନ୍ୟ ରାଜ୍ୟଠାରୁ ବହୁତ ପଛରେ ରହିଛି। ଅପରପକ୍ଷରେ ଓଡ଼ିଶାରେ ଜିଡିପିରେ ଉଲ୍ଲେଖନୀୟ ଉନ୍ନତି ପରିଲକ୍ଷିତ ହୋଇଛି ଏବଂ ପଛୁଆ ରାଜ୍ୟ ଭାବେ ନିଜର ଭାବମୂର୍ତ୍ତିକୁ ସୁଧାରିବାରେ ସମର୍ଥ ହୋଇଛି।
ଜିଡିପିରେ ଭାରତର ସର୍ବାଧିକ ଯୋଗଦାନକାରୀ ମହାରାଷ୍ଟ୍ରକୁ ମଧ୍ୟ ଏହି ରିପୋର୍ଟରେ ସ୍ପଷ୍ଟ କରାଯାଇଛି। ଯଦିଓ ସାମ୍ପ୍ରତିକ ବର୍ଷଗୁଡ଼ିକରେ ଏହାର ଅଂଶ ୧୫% ରୁ ୧୩.୩% କୁ ହ୍ରାସ ପାଇଛି। ଏହା ସତ୍ତ୍ୱେ ୨୦୨୪ ମାର୍ଚ୍ଚ ସୁଦ୍ଧା ମହାରାଷ୍ଟ୍ରର ମୁଣ୍ଡପିଛା ଆୟ ଜାତୀୟ ହାରାହାରିର ୧୫୦.୭% କୁ ବୃଦ୍ଧି ପାଇଛି।
ହରିୟାଣା ଓ ଦିଲ୍ଲୀ କ୍ରମାଗତ ଭାବେ ଭଲ ପ୍ରଦର୍ଶନ କରିଥିବାବେଳେ ମୁଣ୍ଡପିଛା ଆୟରେ ଦିଲ୍ଲୀ ସବୁଠାରୁ ଆଗରେ ରହିଛି। ପଞ୍ଜାବ ଏବଂ ହରିୟାଣା ମଧ୍ୟରେ ପାର୍ଥକ୍ୟ ଆଶ୍ଚର୍ଯ୍ୟଜନକ, କାରଣ ଏକଦା ସବୁଜ ବିପ୍ଳବର ହିତାଧିକାରୀ ଥିବା ପଞ୍ଜାବ ୨୦୦୦ ପରେ ମୁଣ୍ଡପିଛା ଆୟ ହ୍ରାସ ପାଇଥିବା ବେଳେ ହରିୟାଣା ଅର୍ଥନୈତିକ ଦୃଷ୍ଟିରୁ ଆଗକୁ ବଢ଼ିଛି।
ଏକଦା ପଞ୍ଜାବଠାରୁ ପଛରେ ଥିବା ହରିୟାଣା ଏବେ କିପରି ପ୍ରମୁଖ ଅର୍ଥନୈତିକ ମାପକାଠିରେ ଏହାକୁ ପଛରେ ପକାଇ ଦେଇଛି, ସେ ନେଇ ଏହି ରିପୋର୍ଟରେ ଅଧିକ ଅନୁସନ୍ଧାନ କରିବାକୁ ପରାମର୍ଶ ଦିଆଯାଇଛି।
ଉତ୍ତରପ୍ରଦେଶ ଓ ବିହାର ଭଳି ଗରିବ ରାଜ୍ୟଗୁଡ଼ିକର ମଧ୍ୟ ଭାରତର ଜିଡିପିରେ ଅବଦାନ ହ୍ରାସ ପାଇଛି। ୧୯୬୦-୬୧ରେ ଉତ୍ତରପ୍ରଦେଶର ଅଂଶ ୧୪%ରୁ ୯.୫%କୁ ଖସି ଆସିଥିବା ବେଳେ ବିହାର ତୃତୀୟ ସର୍ବାଧିକ ଜନବହୁଳ ରାଜ୍ୟ ହୋଇଥିଲେ ମଧ୍ୟ କେବଳ ୪.୩ ଯୋଗଦାନ କରୁଛି।
