ଭୁବନେଶ୍ୱର,୩୧ା୧୨(ଅନୁରାଧା ମହାରଣା): ଗତ ଦଶନ୍ଧି ମଧ୍ୟରେ କେନ୍ଦ୍ର ସରକାରଙ୍କ ଅନୁକୂଳ ନୀତି ଏବଂ ବ୍ୟାପକ ସଂସ୍କାର ଯୋଗୁ ଭାରତର ଦ୍ରୁତଗତିରେ ବୃଦ୍ଧି ଘଟୁଛି। ଏହା ସହ ବିଶ୍ୱ ସ୍ତରରେ ଅନେକ ଗୁରୁତ୍ୱପୂର୍ଣ୍ଣ ସୂଚକାଙ୍କରେ ଭାରତର ମାନ୍ୟତାରେ ଉଲ୍ଲେଖନୀୟ ଉନ୍ନତି ହୋଇଛି । ଭାରତର ଲଜିଷ୍ଟିକ୍ ପ୍ରଦର୍ଶନ ସୂଚକାଙ୍କ (ଏଲ୍ପିଆଇ) ୨୦୨୩ରେ ୧୬ଟି ସ୍ଥାନ ଉନ୍ନୀତ ହୋଇଥିଲା। ବର୍ତ୍ତମାନ ୧୩୯ ଦେଶ ମଧ୍ୟରେ ଭାରତ ୩୮ତମ ସ୍ଥାନରେ ପହଞ୍ଚିଛି, ଯାହା ଏକ ବଡ଼ ସଫଳତା ବୋଲି ସାଧାରଣରେ ମତ ପ୍ରକାଶ ପାଇଛି। ଗ୍ଲୋବାଲ ଇନୋଭେଶନ ଇଣ୍ଡେକ୍ସ (ଜିଆଇଆଇ) ୨୦୨୪ରେ ଭାରତର ର଼୍ୟାଙ୍କ ୩୯ ତମ ସ୍ଥାନକୁ ଉନ୍ନୀତ ହୋଇଛି। ୨୦୧୫ରେ ଏହି ର଼୍ୟାଙ୍କ୍ ୮୧ ତମ ସ୍ଥାନରେ ଏବଂ ୨୦୧୪ରେ ୭୧ ତମ ସ୍ଥାନରେ ଥିଲା। କେନ୍ଦ୍ର ସରକାରଙ୍କ ଦ୍ୱାରା ଷ୍ଟାର୍ଟଅପ ଇକୋସିଷ୍ଟମକୁ ମଜଭୁତ କରିବା କାରଣରୁ ଦେଶର ନବସୃଜନ ସମ୍ଭାବନାରେ ଏକ ବଡ଼ ବୃଦ୍ଧି ଘଟିଛି। ୨୦୨୪ରେ ପ୍ରଥମ ଥର ପାଇଁ ଭାରତର ବୈଦେଶିକ ମୁଦ୍ରାଭଣ୍ଡାର ୭୦୦ ବିଲିୟନ ଡଲାର ଅତିକ୍ରମ କରିଥିଲା। ଫଳସ୍ବରୂପ, ଚୀନ, ଜାପାନ ଏବଂ ସୁଇଜରଲାଣ୍ଡ ପରେ ଭାରତ ସର୍ବଭାରତୀୟ ସ୍ତରରେ ଚତୁର୍ଥ ସ୍ଥାନରେ ପହଞ୍ଚିଛି। ସୂଚନା ଥାଉକି, ଗତ ଦଶନ୍ଧିରେ (ଏପ୍ରିଲ ୨୦୧୪ ଏପ୍ରିଲରୁ ସେପ୍ଟେମ୍ବର ) ଭାରତରେ ୭୦୯.୮୪ ବିଲିୟନ ଡଲାରର ଏଫ୍ଡିଆଇ ପ୍ରବାହ ହୋଇଛି, ଯାହା ଗତ ୨୪ ବର୍ଷ ମଧ୍ୟରେ ମୋଟ ଏଫ୍ଡିଆଇ ପ୍ରବାହର ୬୮.୬୯% ରହିଛି।
ସେହିପରି ଭାରତର ଜିଡିପି ର଼୍ୟାଙ୍କିଙ୍ଗ୍ରେ ମଧ୍ୟ ଯଥେଷ୍ଟ ଉନ୍ନତି ହୋଇଛି। ୨୦୧୪ରେ ଭାରତ ୧୦ମ ସ୍ଥାନରେ ଥିବାବେଳେ ବର୍ତ୍ତମାନ ଏହା ୫ମ ସ୍ଥାନରେ ରହିଛି। ଆକଳନ ଅନୁଯାୟୀ, ଆସନ୍ତା ୩ରୁ ୪ ବର୍ଷ ମଧ୍ୟରେ ଭାରତ ଜର୍ମାନୀ ଏବଂ ଜାପାନକୁ ଅତିକ୍ରମ କରି ବିଶ୍ୱର ୩ୟ ବୃହତ୍ତମ ଅର୍ଥନୀତି ହେବ। ବିଶ୍ୱ ବାଣିଜ୍ୟ, ନବସୃଜନ ଏବଂ ଆର୍ଥିକ କ୍ଷେତ୍ରରେ ଭାରତର ବଢ଼ୁଥିବା ଶକ୍ତି ସୂଚାଇ ଦେଉଛି ଯେ, ଏହା ଆଗାମୀ ବର୍ଷରେ ବିଶ୍ୱ ଶକ୍ତି ଭାବରେ ନିଜର ସ୍ଥିତିକୁ ଆହୁରି ଦୃଢ଼ କରିବ ବୋଲି ଆଶା କରାଯାଉଛି।
