ନୂଆଦିଲ୍ଲୀ,୨୩।୫: ସ୍ବାସ୍ଥ୍ୟସେବା ନେଇ ଲୋକଙ୍କ ସହ ସମ୍ପର୍କରେ ରହିଥିବା ଭାରତର ୧୦ ଲକ୍ଷରୁ ଊର୍ଦ୍ଧ୍ୱ ଆଶାକର୍ମୀଙ୍କୁ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ଗ୍ଲୋବାଲ ହେଲ୍ଥ ଲିଡର୍ସ ଆଓ୍ବାର୍ଡରେ ସମ୍ମାନିତ କରାଯାଇଛି। ୭୫ତମ ବିଶ୍ୱ ସ୍ବାସ୍ଥ୍ୟ ସଭା ଅବସରରେ ଆଶା କର୍ମୀଙ୍କ ସମେତ ୬ଟି ସଂସ୍ଥାକୁ ଏହି ପୁରସ୍କାର ମିଳିଛି। ଆଶାକର୍ମୀମାନେ ତାଲିମପ୍ରାପ୍ତ ମହିଳା ସ୍ବେଚ୍ଛାସେବୀ, ଯେଉଁମାନେ ସ୍ବାସ୍ଥ୍ୟସେବାକୁ ସାରା ଦେଶର ଗ୍ରାମାଞ୍ଚଳ ଓ ଦୁର୍ଗମ ଅଞ୍ଚଳରେ ରହୁଥିବା ଲୋକଙ୍କ ପାଖରେ ପହଞ୍ଚାଇପାରିଛନ୍ତି। ସେମାନେ ମାତୃଯତ୍ନ ସେବା ଯୋଗାଇବା ସମେତ ଶିଶୁମାନଙ୍କ ଟିକାକରଣ, ଗୋଷ୍ଠୀ ସ୍ବାସ୍ଥ୍ୟସେବା, ଉଚ୍ଚ ରକ୍ତଚାପ, ଯକ୍ଷ୍ମା ଚିକିତ୍ସା, ପୋଷଣତତ୍ତ୍ୱ ସେବା, ପରିମଳ ଓ ସୁସ୍ଥ ଜୀବନଯାପନ ଲାଗି କାର୍ଯ୍ୟ କରିଥାନ୍ତି। ଦେଶର ପ୍ରାଥମିକ ସ୍ବାସ୍ଥ୍ୟସେବା ବ୍ୟବସ୍ଥାରେ ସେମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି। କୋଭିଡ୍ ମହାମାରୀ ବେଳେ ମଧ୍ୟ ସେମାନେ କୋଟି କୋଟି ଲୋକଙ୍କୁ ଜରୁରୀ ସ୍ବାସ୍ଥ୍ୟସେବା ଯୋଗାଇ ଦେଇଥିଲେ ବୋଲି ଡବ୍ଲ୍ୟୁଏଚ୍ଓ ପକ୍ଷରୁ ଏକ ବିବୃତିରେ କୁହାଯାଇଛି। ସମ୍ପୂର୍ଣ୍ଣ ଆଶାକର୍ମୀ ଟିମ୍ ଡବ୍ଲ୍ୟୁଏଚ୍ଓ ମହାନିର୍ଦ୍ଦେଶକଙ୍କ ଗ୍ଲୋବାଲ ହେଲ୍ଥ ଲିଡର୍ସ ଆଓ୍ବାର୍ଡ ପାଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଖୁସି ବ୍ୟକ୍ତ କରିଛନ୍ତି। ସେ ଟୁଇଟ୍ ଯୋଗେ ଆଶାକର୍ମୀମାନଙ୍କୁ ଅଭିନନ୍ଦନ ଜଣାଇଛନ୍ତି। ସୁସ୍ଥ ଭାରତ ଗଢ଼ିବାରେ ସେମାନଙ୍କ ଭୂମିକା ଆଗରେ ରହିଥିବା ମୋଦି କହିଛନ୍ତି। ସେହିପରି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିଆ ମଧ୍ୟ ସମସ୍ତ ଆଶାକର୍ମୀଙ୍କୁ ଅଭିନନ୍ଦନ ଜଣାଇଛନ୍ତି।
