ନୂଆଦିଲ୍ଲୀ,୮ା୧: ଓଡ଼ିଶାରେ ସ୍ଥାପନା ହେବ ପରମାଣୁ ଶକ୍ତି କେନ୍ଦ୍ର। ଭାରତର ସବୁଠାରୁ ବଡ଼ ସରକାରୀ ବିଦ୍ୟୁତ୍ ଉତ୍ପାଦନକାରୀ ସଂସ୍ଥା ଏନଟିପିସି ଦେଶରେ ପରମାଣୁ ଶକ୍ତି କ୍ଷମତା ବୃଦ୍ଧି କରିବା ପାଇଁ ଯୋଜନା ପ୍ରସ୍ତୁତ କରିଛି। ଦେଶରେ ସ୍ୱଚ୍ଛ ଶକ୍ତିର ବ୍ୟବହାର ବଢ଼ାଇବା ଲକ୍ଷ୍ୟରେ ସଂସ୍ଥା ପକ୍ଷରୁ ଓଡ଼ିଶା ସମେତ ୫ ରୁ ୬ଟି ରାଜ୍ୟରେ ପ୍ରାୟ ୩୦ଟି ସମ୍ଭାବ୍ୟ ସ୍ଥାନକୁ ଚିହ୍ନଟ କରାଯାଇ ସେଠାରେ ଅନୁଧ୍ୟାନ କରାଯାଉଛି।
ଏହି ଯୋଜନାରେ ଓଡ଼ିଶା, ଗୁଜରାଟ ଏବଂ ମଧ୍ୟପ୍ରଦେଶ ଭଳି ରାଜ୍ୟଗୁଡ଼ିକୁ ସାମିଲ କରାଯାଇଛି। ସ୍ଥାନୀୟ ବିରୋଧ ଆଶଙ୍କାରେ ପ୍ରକଳ୍ପର ନିର୍ଦ୍ଦିଷ୍ଟ ସ୍ଥାନ ବର୍ତ୍ତମାନ ଗୋପନ ରଖାଯାଇଛି। ୨୦୪୭ ସୁଦ୍ଧା ଭାରତର ୧୦୦ ଗିଗାୱାଟ୍ (GW) ପରମାଣୁ ଶକ୍ତି ଉତ୍ପାଦନ ଲକ୍ଷ୍ୟରେ ଏନଟିପିସି ଏକାକୀ ୩୦ ପ୍ରତିଶତ ଅଂଶ ଗ୍ରହଣ କରିବାକୁ ଲକ୍ଷ୍ୟ ରଖିଛି। ଚଳିତ ବର୍ଷ ମଧ୍ୟଭାଗ ସୁଦ୍ଧା ସ୍ଥାନ ଚୟନ ଚୂଡ଼ାନ୍ତ ହେବାର ସମ୍ଭାବନା ରହିଛି।
ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ଏନଟିପିସି ରୁଷିଆର ‘ରୋସାଟମ୍’ ଏବଂ ଫ୍ରାନ୍ସର ‘ଇଡିଏଫ୍’ ଭଳି ବିଶ୍ୱସ୍ତରୀୟ କମ୍ପାନୀ ସହ ବୈଷୟିକ ଆଲୋଚନା ଜାରି ରଖିଛି। ଆମେରିକା ଓ ଦକ୍ଷିଣ କୋରିଆର ସଂସ୍ଥା ସହ ମଧ୍ୟ ଯୋଗାଯୋଗ କରାଯାଇପାରେ। ନୂତନ ପରମାଣୁ କେନ୍ଦ୍ରଗୁଡ଼ିକ ଜନବସତିଠାରୁ ଅତିକମରେ ୧ କିଲୋମିଟର ଦୂରରେ, କମ୍ ଭୂକମ୍ପ ପ୍ରବଣ ଅଞ୍ଚଳ ଏବଂ ଜଳଉତ୍ସ ନିକଟରେ ନିର୍ମାଣ ହେବ।
ନିକଟରେ କେନ୍ଦ୍ର ସରକାର ପରମାଣୁ ନିୟମରେ ପରିବର୍ତ୍ତନ କରି ବିଦେଶୀ ପୁଞ୍ଜିନିବେଶକାରୀଙ୍କୁ ଆକୃଷ୍ଟ କରିବା ପାଇଁ ପଥ ପରିସ୍କାର କରିଛନ୍ତି। ବର୍ତ୍ତମାନ ଏନଟିପିସିର ୮୪% ବିଦ୍ୟୁତ୍ କୋଇଲା ଓ ଗ୍ୟାସ୍ରୁ ଉତ୍ପାଦନ ହେଉଥିବା ବେଳେ, ଏହି ନୂତନ ପରମାଣୁ ପ୍ରକଳ୍ପ ସଂସ୍ଥାକୁ ସ୍ୱଚ୍ଛ ଶକ୍ତି କ୍ଷେତ୍ରରେ ଏକ ନୂଆ ପରିଚୟ ଦେବ।
