ଭୁବନେଶ୍ୱର, ୫।୯ (ତପନ ସ୍ବାଇଁ): କିଟ୍ ବିଶ୍ୱବିଦ୍ୟାଳୟ ପରିସରରେ ଭାରତର ପ୍ରଥମ ଜାତୀୟ ଭଲିବଲ ଏକାଡେମୀ ପ୍ରତିଷ୍ଠା ହୋଇଛି। ସୋମବାର ବିଜୁ ପଟ୍ଟନାୟକ ବହୁମୁଖୀ ଇନ୍ଡୋର ଷ୍ଟାଡିୟମରେ ଏହା ଉଦ୍ଘାଟିତ ହୋଇଛି। ଏଥିରେ ଭାରତର ୩୦ଟି ରାଜ୍ୟ ଆସୋସିଏଶନର ସଭାପତି ଓ ସମ୍ପାଦକ ଅଂଶଗ୍ରହଣ କରିଥିଲେ। ଦେଶରେ ଅନେକ କ୍ରୀଡ଼ାର ଏକାଡେମୀ ରହିଛି। ମାତ୍ର ପୁରାତନ ଏବଂ ସବୁଠାରୁ ଲୋକପ୍ରିୟ ଖେଳ ଭଲିବଲ୍ର ଏକାଡେମୀ ଭାରତରେ କେଉଁଠାରେ ନ ଥିଲା। ଏବେ ଏକାଡେମୀ ପ୍ରତିଷ୍ଠା ଦ୍ୱାରା ଏହି କ୍ରୀଡ଼ାର ବିକାଶ ହୋଇପାରିବ। ଏକାଡେମୀକୁ ଉଦ୍ଘାଟନ କରିବା ଅବସରରେ ଭଲିବଲ ଫେଡେରେଶନ ଅଫ୍ ଇଣ୍ଡିଆ (ଭିଏଫ୍ଆଇ) ସଭାପତି ତଥା କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ କହିଲେ ଯେ, ”ଆମେ ପ୍ରଥମ ପର୍ଯ୍ୟାୟରେ ଦେଶର ୫୦ ବାଳିକା ଓ ୫୦ ବାଳକ ଭଲିବଲ ପ୍ରତିଭାଙ୍କୁ ଚୟନ କରି ଏକାଡେମୀରେ ଶ୍ରେଷ୍ଠ ସୁବିଧା ସୁଯୋଗ ଦେବୁ। ଏଥିରେ ଅନ୍ତର୍ଜାତୀୟ ସ୍ତରର କୋଚିଂ ପ୍ରଦାନର ବ୍ୟବସ୍ଥା ରହିବ। ୨୦୨୦ଠାରୁ ଭାରତୀୟ ଭଲିବଲ ଦଳ ଯେତେସବୁ ଅନ୍ତର୍ଜାତୀୟ ଟୁର୍ନାମେଣ୍ଟରେ ଅଂଶଗ୍ରହଣ କରିଛି ତା’ ପୂର୍ବରୁ ସବୁ ବୟସ ବର୍ଗରେ ଏବଂ ସିନିୟର ସ୍ତରର କୋଚିଂ କ୍ୟାମ୍ପ କିଟ୍ ପରିସରରେ ଅନୁଷ୍ଠିତ ହୋଇଛି। ଏବେ ଦେଶର ପ୍ରତିଭା ସମ୍ପନ୍ନ ଭଲିବଲ ଖେଳାଳିଙ୍କୁ ଚୟନ କରାଯାଇ ଯୋଜନାବଦ୍ଧଭାବେ କୋଚିଂ ପ୍ରଦାନ କରାଯିବ। ଭୁବନେଶ୍ୱରରେ ଏକାଡେମୀ ହୋଇଥିବାରୁ ଓଡ଼ିଶାର ପ୍ରତିଭା ସମ୍ପନ୍ନ ଖେଳାଳିମାନେ ସୁଯୋଗର ସଦ୍ବ୍ୟବହାର କରି ଭାରତୀୟ ଦଳରେ ଅଧିକ ସଂଖ୍ୟାରେ ସ୍ଥାନ ପାଇପାରିବେ“।
ଗତ ୩-୪ ବର୍ଷ ମଧ୍ୟରେ ଦ୍ରୁତ ଗତିରେ ଭାରତୀୟ ଭଲିବଲର ବିକାଶ ହୋଇଥିବାରୁ ବିଭିନ୍ନ ରାଜ୍ୟ ଆସୋସିଏଶନର ସଭାପତି ଓ ସମ୍ପାଦକମାନେ ଅଚ୍ୟୁତଙ୍କୁ ପ୍ରଶଂସା କରିଥିଲେ। ଇତିମଧ୍ୟରେ ଭାରତ ପ୍ରଥମଥର ପାଇଁ ଅନ୍ତର୍ଜାତୀୟ ସ୍ତରରେ ପଦକ ଜିତିବା ସହ ୩ ବିଶ୍ୱ ଚାମ୍ପିୟନଶିପ୍ ପାଇଁ ଯୋଗ୍ୟତା ଅର୍ଜନ କରିଛି; ଯାହାକି ୧୯୫୧ରେ ଭିଏଫ୍ଆଇ ପ୍ରତିଷ୍ଠା ହେବାପରଠାରୁ କୌଣସି ସଭାପତିଙ୍କ କାର୍ଯ୍ୟକାଳ ମଧ୍ୟରେ ଏହା ସର୍ବାଧିକ ସଫଳତା। ଓଡ଼ିଶା ଆଥ୍ଲେଟିକ୍ସ ଆସୋସିଏଶନ ଓ ଫୁଟବଲ ଆସୋସିଏଶନ ଅଫ୍ ଓଡ଼ିଶା ସମ୍ପାଦକ ଆଶୀର୍ବାଦ ବେହେରା, ଶେଖର ବୋଷ, ରଥିନ ରୟ ଚୌଧାରୀ, ରାଜ କୁମାର, ଅନୁଲ ଚୌଧାରୀ ଓ ରାମାବତାର ସିଂ ଝାକର ଉଦ୍ଘାଟନୀ ଉତ୍ସବରେ ଉପସ୍ଥିତ ଥିଲେ।
