ଚେନ୍ନାଇ,୨୮।୮: ଭାରତର ସୀମାକୁ ସଶକ୍ତ କରିବା ଲାଗି ପ୍ରତିରକ୍ଷା ବ୍ୟବସ୍ଥା ସୁଦୃଢ଼ କରାଯିବାର ଆବଶ୍ୟକତା ରହିଛି। ପୃଥିବୀରେ ଯେଉଁଭଳି ଭାବରେ ପରିବର୍ତ୍ତନ ଘଟୁଛି, ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ଜରୁରୀ ହୋଇପଡ଼ିଛି। ପ୍ରତିଟି ଦେଶ ନିଜ ନିଜର ସାମରିକ ଶକ୍ତି ଆଧୁନିକୀକରଣ ଏବଂ ମଜବୁତ କରୁଛନ୍ତି। ଏହା ଭାରତ ପାଇଁ ମଧ୍ୟ ପଯୁଜ୍ୟ ବୋଲି ପ୍ରତିରକ୍ଷା ନ୍ତ୍ରୀ ରାଜନାଥ ସିଂ କହିଛନ୍ତି। ଦେଶର ଆଭ୍ୟନ୍ତରୀଣ , ସୀମା ଏବଂ ସାମୁଦ୍ରିକ କ୍ଷେତ୍ରର ସୁରକ୍ଷା ଅପରିହାର୍ଯ୍ୟ ହୋଇପଡ଼ିଛି। ଚେନ୍ନାଇରେ ପାଟ୍ରୋଲିଂ ଯୁଦ୍ଧପୋତ ବିଗ୍ରହକୁ ଭାରତୀୟ ତଟରକ୍ଷୀ ବାହିନୀରେ ସାମିଲ କରିବା ଅବସରରେ ପ୍ରତିରକ୍ଷାମନ୍ତ୍ରୀ ଏଭଳି କହିଛନ୍ତି। ଏହି କାର୍ଯ୍ୟକ୍ରମରେ ସେନା ମୁଖ୍ୟ ଜେନେରାଲ ଏମ.ଏମ ନରାଓ୍ବନେ ମଧ୍ୟ ଉପସ୍ଥିତ ଥିଲେ। ରାଜନାଥ ସିଂ କହିଛନ୍ତି ଯେ ଏକ ରିପୋର୍ଟରେ ଉଲ୍ଲେଖ ହୋଇଛି ଯେ ଆସନ୍ତା ବର୍ଷେ ଅବା ୨ ବର୍ଷ ଅର୍ଥାତ୍ ୨୦୨୩ ସୁଦ୍ଧା ସାରା ପୃଥିବୀର ବିଭିନ୍ନ ଦେଶର ପ୍ରତିରକ୍ଷା ଖର୍ଚ୍ଚ ୨.୧ ଟ୍ରିଲିୟନ ଡଲାରରେ ପହଞ୍ଚିବାକୁ ଯାଉଛି। ଆସନ୍ତା ୫ ବର୍ଷ ମଧ୍ୟରେ ଏହା ବହୁଗୁଣିତ ହେବ ବୋଲି ଆଶା କରାଯାଉଛି ବୋଲି ସେ କହିଛନ୍ତି। ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ସଶସ୍ତ୍ର ବାହିନୀ, ଶିଳ୍ପ ଏବଂ ବିଭିନ୍ନ ଏକାଡେମୀର ଶିକ୍ଷାବିତ୍ଙ୍କ ମିଳିତ ପ୍ରୟାସ ଦ୍ୱାରା ଗବେଷଣା ଏବଂ ନବସୃଜନ କ୍ଷେତ୍ରରେ ଅଗ୍ରଗତି ପାଇଁ ପ୍ରତିରକ୍ଷା ମନ୍ତ୍ରଣାଳୟ ପକ୍ଷର କେତେକ ପଦକ୍ଷେପ ଗ୍ରହଣ କରାଯାଇଛି। ପାରସ୍ପରିକ ବୁଝାମଣା ଏବଂ ଜ୍ଞାନ ଏବଂ ସର୍ବୋତ୍ତମ ଜ୍ଞାନକୌଶଳ ଆଦାନପ୍ରଦାନ ଦ୍ୱାରା ଦେଶର ପ୍ରତିରକ୍ଷା ବ୍ୟବସ୍ଥା ସୁଦୃଢ଼ ହୋଇପାରିବ ବୋଲି ସେ କହିଛନ୍ତି।
