ନୂଆଦିଲ୍ଲୀ,୪।୩ : ଆମେରିକାର ରୋଗ ନିୟନ୍ତ୍ରଣ ଏବଂ ପ୍ରତିରୋଧ କେନ୍ଦ୍ର (ସିଡିସି) ଏବଂ ଗାମ୍ବିଆର ସ୍ବାସ୍ଥ୍ୟ କର୍ତ୍ତୃପକ୍ଷଙ୍କ ମିଳିତ ଅନୁସନ୍ଧାନରେ ଗାମ୍ବିଆରେ ଶିଶୁଙ୍କ ମୃତ୍ୟୁ ଏବଂ ଭାରତରେ ଉତ୍ପାଦିତ ଅପମିଶ୍ରିତ କଫ ସିରପ ବ୍ୟବହାର ମଧ୍ୟରେ ସମ୍ପର୍କ ରହିଛି। ବିଶ୍ୱ ସ୍ବାସ୍ଥ୍ୟ ସଂଗଠନ ଅକ୍ଟୋବର ୨୦୨୨ରେ ଏନେଇ ଏକ ସତର୍କ ସୂଚନା ଜାରି କରି କହିଥିଲା ଯେ ଭାରତୀୟ କମ୍ପାନୀ ମେଡେନ ଫାର୍ମାସ୍ୟୁଟିକାଲ୍ସ ଲିମିଟେଡ ଦ୍ୱାରା ଗାମ୍ବିଆକୁ ଦିଆଯାଉଥିବା ଚାରିଟି କଫ ସିରପ ଗୁଣାତ୍ମକ ମାନ ପୂରଣ କରୁନାହିଁ ।
ଏହାର ବ୍ୟବହାର ଯୋଗୁ ଅନେକ ପିଲାଙ୍କ ମୃତ୍ୟୁ ହେବାର ଆଶଙ୍କା ରହିଛି। ଏହି ଅନୁସନ୍ଧାନ ଦୃଢ଼ ଭାବରେ ସୂଚିତ କରିଛି ଯେ ଗାମ୍ବିଆକୁ ଆମଦାନୀ କରାଯାଇଥିବା ଔଷଧରେ ଡାଇଥାଇଲନ ଗ୍ଲାଇକଲ (ଡିଇଜି) କିମ୍ବା ଇଥିଲିନ ଗ୍ଲାଇକଲ (ଇଜି) ଦ୍ୱାରା ଅପମିିଶ୍ରିତ ହୋଇଛି। ଏହା ଯୋଗୁ ଶିଶୁମାନଙ୍କଠାରେ କିଡନୀ ସମସ୍ୟା ସୃଷ୍ଟି ହେବାର ଆଶଙ୍କା ଅଧିକ ବୋଲି ସିଡିସି ରିପୋର୍ଟରେ କୁହାଯାଇଛି। ଗତ ଅଗଷ୍ଟରେ ଗାମ୍ବିଆର ସ୍ବାସ୍ଥ୍ୟ ମନ୍ତ୍ରଣାଳୟ ଏନେଇ ତଦନ୍ତ ଆରମ୍ଭ କରିଥିଲା।
ସୂଚନାଯୋଗ୍ୟ, ଗାମ୍ବିଆରେ ୬୬ ପିଲାଙ୍କ ମୃତ୍ୟୁକୁ ଭାରତରେ ଉତ୍ପାଦିତ ଚାରିଟି କଫ ସିରପ ସହିତ ସମ୍ପୃକ୍ତ ଥିବା ରିପୋର୍ଟ ପରେ, ଅନୁସନ୍ଧାନ ପାଇଁ ସରକାର ଗଠନ କରିଥିବା ଏକ କମିଟି ଜାଣିବାକୁ ପାଇଛି ଯେ ବିଶ୍ୱ ସ୍ବାସ୍ଥ୍ୟ ସଂଗଠନ ସ୍ଦ୍ୱାରା ଅଂଶୀଦାର ହୋଇଥିବା କ୍ଲିନିକାଲ ସୂଚନା ପାଥୋଲୋଜିକାଲ ଅଟେ। ଏହା ଚୂଡ଼ାନ୍ତ ନିର୍ଣ୍ଣୟ ପାଇଁ ପର୍ଯ୍ୟାପ୍ତ ନୁହେଁ। ଡ୍ରଗ କଣ୍ଟ୍ରୋଲର୍ ଜେନେରାଲ ଅଫ ଇଣ୍ଡିଆ (ଡିସିଜିଆଇ) ଡ. ଭି.ଜି ସୋମାନି ଏ ବିଷୟରେ ବିଶ୍ୱସ୍ବାସ୍ଥ୍ୟ ସଂଗଠନକୁ ସୂଚନା ଦେଇଥିଲେ। ବିଶ୍ୱ ସ୍ବାସ୍ଥ୍ୟ ସଂଗଠନର ରୁଟେଣ୍ଡୋ କୁୱାନା ଅକ୍ଟୋବର ୧୩ରେ ଡିସିଜିଆଇକୁ ଏକ ଚିଠି ଲେଖି ଚାରିଟି କଫ ସିରପର ସୋନିପତ ଭିତ୍ତିକ ଉତ୍ପାଦକ ମେଡେନ ଫାର୍ମାସ୍ୟୁଟିକାଲ୍ସର ଅନୁସନ୍ଧାନର ଅଗ୍ରଗତି ବିଷୟରେ ଜଣାଇବାକୁ କହିଥିଲେ।
ଇ-ମେଲର ଉତ୍ତରରେ ଡ .ସୋମାନି ଶନିବାର କହିଛନ୍ତି ଯେ ପ୍ରତିକୂଳ ଘଟଣା ରିପୋର୍ଟର ବିବରଣୀ ଏବଂ ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା ଅଂଶୀଦାର ତଥା ବିଶ୍ଳେଷଣ କରିବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ବୈଷୟିକ ବିଶେଷଜ୍ଞଙ୍କ ଏକ କମିଟି ଗଠନ କରିଛି। ସେହି ଅନୁଯାୟୀ ପରବର୍ତ୍ତୀ ସମୟରେ ସୁପାରିଶ କରାଯିବ।
