ନୂଆଦିଲ୍ଲୀ,୧୭।୮: ପ୍ରାୟତଃ ଲୋକମାନେ ରେଳ ଷ୍ଟେଶନକୁ ନିଜ ବନ୍ଧୁ କିମ୍ବା ସମ୍ପର୍କୀୟଙ୍କୁ ନେବା ବା ଛାଡ଼ିବା ପାଇଁ ଯାଆନ୍ତି। ଏଥିପାଇଁ ସେମାନଙ୍କୁ ପ୍ଲାଟଫର୍ମ ଟିକେଟ ନେବାକୁ ପଡ଼େ। ବିନା ପ୍ଲାଟଫର୍ମ ଟିକେଟରେ ଷ୍ଟେଶନର ପ୍ଲାଟଫର୍ମକୁ ଯାଇଲେ ଜରିମାନା ମଧ୍ୟ ହୋଇପାରେ। ତେଣୁ ଆପଣ ଯଦି ରେଳ ଷ୍ଟେଶନକୁ ଯାଇ ପ୍ଲାଟଫର୍ମ ଟିକେଟ କିଣନ୍ତି, ତେବେ ଏହା ସହିତ ଜଡ଼ିତ ନିୟମଗୁଡ଼ିକ ଜାଣି ରଖିବା ଜରୁରୀ।
ପ୍ଲାଟଫର୍ମ ଟିକେଟ ନେବା ପରେ ଆପଣ ପୂରା ଦିନ ପ୍ଲାଟଫର୍ମରେ ରହିପାରିବେ ନାହିଁ। ପ୍ଲାଟଫର୍ମ ଟିକେଟ ନେବା ପରେ ଏହା ସାଧାରଣତଃ ୨ ଘଣ୍ଟା ପର୍ଯ୍ୟନ୍ତ ବୈଧ ରହେ। ଏହି ସମୟ ସୀମା ପରେ ମଧ୍ୟ ପ୍ଲାଟଫର୍ମରେ ରହିଲେ ଜରିମାନା ଦେବାକୁ ପଡ଼ିପାରେ। ୨ ଘଣ୍ଟା ପରେ ରହିଲେ ୫୦୦ ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ।
ଆପଣ ରେଳ ଷ୍ଟେଶନର ଟିକେଟ କାଉଣ୍ଟରକୁ ଯାଇ ପ୍ଲାଟଫର୍ମ ଟିକେଟ କିଣିପାରିବେ। ଏହା ବ୍ୟତୀତ, କାଉଣ୍ଟରରୁ ଟିକେଟ ନେବାକୁ ଚାହୁଁନଥିଲେ ଷ୍ଟେଶନରେ ଥିବା ଅଟୋମେଟିକ ଟିକେଟ ଭେଣ୍ଡିଂ ମେସିନ (ATVM) ମାଧ୍ୟମରେ ମଧ୍ୟ ନିଜେ ଟିକେଟ କାଢ଼ିପାରିବେ।
ଅନଲାଇନରେ ମଧ୍ୟ ବୁକ କରିପାରିବେ ପ୍ଲାଟଫର୍ମ ଟିକେଟ
-ଏଥିପାଇଁ ପ୍ରଥମେ RailOne ଆପ ଖୋଲି ମୋବାଇଲ ନମ୍ବର ଦ୍ୱାରା ଲଗ ଇନ କରନ୍ତୁ।
-ପ୍ଲାଟଫର୍ମ ଟିକେଟ ବିକଳ୍ପ ଚୟନ କରନ୍ତୁ।
-ଆପଣ ଷ୍ଟେଶନ ଭିତରେ ଅଛନ୍ତି କି ଷ୍ଟେସନ ବାହାରେ ଅଛନ୍ତି, ସେହି ବିକଳ୍ପ ଚୟନ କରନ୍ତୁ।
-ଷ୍ଟେଶନର ନାମ ଏବଂ ଯାତ୍ରୀଙ୍କ ସଂଖ୍ୟା ଦିଅନ୍ତୁ।
-ଅନଲାଇନ ପେମେଣ୍ଟ କରନ୍ତୁ।
ଟିକେଟ ଆପରେ My Booking ସେକ୍ସନରେ ମିଳିଯିବ।
-ପ୍ଲାଟଫର୍ମ ଟିକେଟ ସମ୍ପର୍କରେ ଜରୁରୀ କଥା
ପ୍ଲାଟଫର୍ମ ଟିକେଟ କେବଳ କାହାକୁ ରେଳ ଷ୍ଟେସନରେ ଛାଡ଼ିବା କିମ୍ବା ନେବା ପାଇଁ ପ୍ଲାଟଫର୍ମକୁ ଯିବା ନିମନ୍ତେ ହୋଇଥାଏ। ଏହି ଟିକେଟ ଦ୍ୱାରା କୌଣସି ଟ୍ରେନରେ ଯାତ୍ରା କରିହେବ ନାହିଁ। ଟ୍ରେନରେ ଯାତ୍ରା କରିବା ପାଇଁ ଅଲଗା ବୈଧ ଯାତ୍ରା ଟିକେଟ ଆବଶ୍ୟକ। କେହି ପ୍ଲାଟଫର୍ମ ଟିକେଟ ନେଇ ଟ୍ରେନରେ ଯାତ୍ରା କଲେ, ତାଙ୍କ ବିରୋଧରେ ରେଳବାଇ ପକ୍ଷରୁ ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ହୋଇପାରେ।
