ଲଣ୍ଡନ,୨୦ା୮: ଲଡର୍ସ କ୍ରିକେଟ ଗ୍ରାଉଣ୍ଡରେ ଗୁରୁବାର ଖେଳାଯାଇଥିବା ସପ୍ତମ ତଥା ଅନ୍ତିମ ମିକ୍ସଡ୍ ଭିନ୍ନକ୍ଷମ ଟି୨୦ ଅନ୍ତର୍ଜାତୀୟ ମ୍ୟାଚ୍ରେ ଇଂଲଣ୍ଡକୁ ୧୧୮ ରନରେ ହରାଇ ଭାରତ ବିଜୟ ହାସଲ କରିଛି। ଏହି ବିଜୟ ପରେ ଭାରତୀୟ ମିକ୍ସଡ୍ ଭିନ୍ନକ୍ଷମ ଦଳର ଖେଳାଳି ଓ ଅଫିସିଆଲ୍ସ ଲଡର୍ସ ବାଲକୋନିରେ ଭାରତର ପୂର୍ବତନ ଅଧିନାୟକ ସୌରଭ ଗାଙ୍ଗୁଲିଙ୍କ ଲୋକପ୍ରିୟ ଶାର୍ଟ ଘୂରାଇ ବିଜୟ ଉତ୍ସବକୁ ଦୋହରାଇଥିଲା।
ମ୍ୟାଚ୍ରେ ଅର୍ଜୁନ ଗବେରଙ୍କ ୪୪ ବଲରେ ୬୮ ଓ ଅଧିନାୟକ ମାଜିଦ ମାଗ୍ରେଙ୍କ ୧୯ ବଲରେ ଅପରାଜିତ ୬୩ ରନର ଇନିଂସ ଯୋଗୁ ଭାରତ ୨୦ ଓଭରରେ ୪ ଉଇକେଟ ହରାଇ ୨୦୬ ରନ କରିଥିଲା। ଜବାବରେ ହିଲାଲ ଅହମଦ ଓ୍ବାନ (୪/୨୧) ଓ ଜୟେଶ ପରମାର (୩/୧୪)ଙ୍କ ଘାତକ ବୋଲିଂ ବଳରେ ଇଂଲଣ୍ଡ ୮୮ ରନରେ ଅଲଆଉଟ୍ ହୋଇଯାଇଥିଲା।
ଭାରତୀୟ ଭିନ୍ନକ୍ଷମ କ୍ରିକେଟ ପରିଷଦ ପକ୍ଷରୁ ଦଳର ବିଜୟ ଉତ୍ସବର ଭିଡିଓ ଶେୟାର କରାଯାଇଛି, ଯେଉଁଥିରେ ଖେଳାଳି ଓ ଅଫିସିଆଲମାନେ ଲଡର୍ସ ବାଲକୋନିରେ ସେମାନଙ୍କ ବ୍ଲେଜର୍ସ କାଢ଼ି ଘୂରାଉଥିବା ଦେଖିବାକୁ ମିଳୁଛି। ଉଲ୍ଲେଖଯୋଗ୍ୟ ଯେ, ସମାନ ଗ୍ରାଉଣ୍ଡରେ ଇଂଲଣ୍ଡ ବିପକ୍ଷ ୨୦୦୨ ନାଟଓ୍ବେଷ୍ଟ ଟ୍ରଫି ଫାଇନାଲରେ ଭାରତର ବିଜୟ ପରେ ଗାଙ୍ଗୁଲି ଲଡର୍ସ ବାଲକୋନିରେ ଶାର୍ଟ ଘୂରାଇ ବିଜୟ ଉତ୍ସବ ପାଳିଥିଲେ।
