ନୂଆଦିଲ୍ଲୀ, ୨୨।୯ : ଭାରତୀୟ ମୁଦ୍ରା ସର୍ବକାଳୀନ ସର୍ବନିମ୍ନ ସ୍ତରରେ ପହଞ୍ଚିଛି। ଗୁରୁବାର ଦିନ ଏହା ଆମେରିକୀୟ ଡଲାର ତୁଳନାରେ ୮୦.୨୮ସ୍ତରରେ ଖୋଲିଛି। ଏହାପୂର୍ବରୁ ବୁଧବାର ଏହା ୭୯.୯୮ରେ ବନ୍ଦ ହୋଇଥିଲା। ବୁଧବାର ଟଙ୍କା ଏହାର ସର୍ବକାଳୀନ ସର୍ବନିମ୍ନ ସ୍ତର ୮୦.୪୫ ଛୁଇଁଥିଲା। ଅପରପକ୍ଷରେ, ଗତ ୨୦ବର୍ଷ ମଧ୍ୟରେ ଡଲାରର ଏହା ସବୁଠୁ ବଡ ବୃଦ୍ଧି ବୋଲି କୁହାଯାଉଛି।
ମୁଦ୍ରାସ୍ଫୀତିକୁ ନିୟନ୍ତ୍ରଣ କରିବା ପାଇଁ ଆମେରିକାର କେନ୍ଦ୍ରୀୟ ବ୍ୟାଙ୍କ ଫେଡେରାଲ ରିଜର୍ଭ ସୁଧ ହାରକୁ ୦.୭୫ ପ୍ରତିଶତ ବୃଦ୍ଧି କରିବାକୁ ଘୋଷଣା କରିଛି। କ୍ରମାଗତ ତୃତୀୟ ବୃଦ୍ଧି ପରେ ବ୍ୟାଙ୍କର ବେଞ୍ଚମାର୍କ ପାଣ୍ଠି ହାର ୩ ରୁ ୩.୨୫ କୁ ବୃଦ୍ଧି ପାଇଛି। ୨୦୨୩ ସୁଦ୍ଧା ସୁଧ ହାର ୪.୬ ପ୍ରତିଶତକୁ ବୃଦ୍ଧି ପାଇବ ବୋଲି ଆକଳନ କରାଯାଇଛି। ଭାରତ ସମେତ ସମଗ୍ର ବିଶ୍ୱ ଉପରେ ଏହାର ପ୍ରଭାବ ପଡିପାରେ।
ଏହି କାରଣରୁ ଶେୟାର ବଜାରରେ ଏକ ବଡ଼ ଧରଣର ହ୍ରାସ ଘଟିଛି। ଶେୟାର ବଜାର ଦିନର ନିମ୍ନ ସ୍ତରରେ ବୁଧବାର ବନ୍ଦ ହୋଇଥିଲା। ଡୋ ଜୋନ୍ସ ୩୦୧୮୪ ସ୍ତରରେ ବନ୍ଦ ହେବା ସହିତ ୫୨୨ ପଏଣ୍ଟ ହ୍ରାସ ପାଇଛି। ଅପରପକ୍ଷରେ ନାସଡାକ ୨୦୫ ପଏଣ୍ଟ ହରାଇ ୧୧,୨୨୦ ପଏଣ୍ଟରେ ବନ୍ଦ ହୋଇଯାଇଛି। ଏସ ଆଣ୍ଡ ପି ମଧ୍ୟ ୨ ପ୍ରତିଶତ ହ୍ରାସ ପାଇଛି।
