ଗାନ୍ଧିନଗର,୧୯।୧୦ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଗାନ୍ଧିନଗରରେ ପ୍ରତିରକ୍ଷା ଏକ୍ସପୋ-୨୦୨୨ର ଉଦଘାଟନ କରିଛନ୍ତି। ଏହି ଅବସରରେ ସେ ଭାରତ-ପାକିସ୍ତାନ ସୀମା ଏଲଓସି ନିକଟରେ ଥିବା ଦିସା ଠାରେ ଏକ ନୂତନ ଏୟାରବେସର ମୂଳଦୁଆ ପକାଇଛନ୍ତି। ସେ କହିଛନ୍ତି ଯେ ଏହି ନୂତନ ଏୟାରବେସ ଦେଶର ସୁରକ୍ଷା ପାଇଁ ଏକ ପ୍ରଭାବଶାଳୀ କେନ୍ଦ୍ର ଭାବରେ ଉଭା ହେବ। ଏଥି ସହିତ ଗୁଜରାଟ ଭାରତର ପ୍ରତିରକ୍ଷା କେନ୍ଦ୍ରରେ ପରିଣତ ହେବ ଏବଂ ଭାରତର ସୁରକ୍ଷା କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ଏହି ଏୟାରଫିଲ୍ଡ ଏକ ପ୍ରମୁଖ ଭୂମିକା ଗ୍ରହଣ କରିବ। ଦିସା ଅନ୍ତର୍ଜାତୀୟ ସୀମାଠାରୁ ମାତ୍ର ୧୩୦ କିଲୋମିଟର ଦୂରରେ। ବାୟୁସେନା ପଶ୍ଚିମ ଦିଗରୁ ଆସୁଥିବା କୌଣସି ବିପଦକୁ ଭଲ ଭାବରେ ଜବାବ ଦେବାରେ ସକ୍ଷମ ହେବ। ତେବେ ସେ ପାକିସ୍ତାନର ନାମ ନେଇ ନାହାନ୍ତି।
ଏହି ଅବସରରେ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ ଏହା ହେଉଛି ପ୍ରଥମ ପ୍ରତିରକ୍ଷା ଏକ୍ସପୋ ଯେଉଁଥିରେ କେବଳ ଭାରତୀୟ କମ୍ପାନୀ ଅଂଶଗ୍ରହଣ କରୁଛନ୍ତି। ସେ କହିଛନ୍ତି ଯେ ମୁକ୍ତ ବାଣିଜ୍ୟ ତଥା ଅନ୍ତର୍ଜାତୀୟ ନିରାପତ୍ତା ପାଇଁ ସାମୁଦ୍ରିକ ସୁରକ୍ଷା ଆଜି ବିଶ୍ୱର ପ୍ରାଥମିକତା ପାଲଟିଛି।
ପ୍ରଧାନମନ୍ତ୍ରୀ କହିଛନ୍ତି, ଗତ ଆଠ ବର୍ଷ ମଧ୍ୟରେ ଭାରତୀୟ ପ୍ରତିରକ୍ଷା ସାମଗ୍ରୀର ରପ୍ତାନି ଆଠ ଗୁଣା ବୃଦ୍ଧି ପାଇଛି। ପ୍ରତିରକ୍ଷା ବାହିନୀ ୧୦୧ ସାମଗ୍ରୀଗୁଡିକର ଏକ ତାଲିକା ପ୍ରଦାନ କରିବ ଯାହାର ଆମଦାନୀ ଉପରେ ପ୍ରତିବନ୍ଧକ ଲଗାଯିବ। ୪୧୧ଟି ପ୍ରତିରକ୍ଷା ଉପକରଣ ଏବେ ଭାରତରେ ନିର୍ମାଣ ହେବ।
