ନୂଆଦିଲ୍ଲୀ,୮।୯: ଭାରତ ସରକାର ଚାଇନାର ସର୍ଟ-ଭିଡିଓ ପ୍ଲାଟଫର୍ମ ଟିକ୍ଟକ୍ ଉପରେ ଲାଗୁ ବ୍ୟାନ ହଟାଇବାର କୌଣସି ଯୋଜନା ନାହିଁ ବୋଲି କେନ୍ଦ୍ରୀୟ ଆଇଟି, ସୂଚନା ଓ ପ୍ରସାରଣ ତଥା ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ସ୍ପଷ୍ଟ କରିଛନ୍ତି। ଏକ ସାକ୍ଷାତକାରରେ ସେ କହିଛନ୍ତି ଯେ ଏହି ବିଷୟରେ ସରକାର କୌଣସି ଆଲୋଚନା କରିନାହାନ୍ତି। ଟିକ୍ଟକ୍ ର ମୂଳ କମ୍ପାନୀ ବାଇଟଡାନ୍ସ ଭାରତରେ ପୁନଃପ୍ରବେଶ ପାଇଁ ପ୍ରସ୍ତୁତି କରୁଛି ବୋଲି ଚାଲିଥିବା ଜଳ୍ପନାକୁ ଖଣ୍ଡନ କରି ବୈଷ୍ଣବ କହିଛନ୍ତି, “କୌଣସି ପକ୍ଷରୁ ଏପରି କୌଣସି ପ୍ରସ୍ତାବ ଆସିନାହିଁ।”
ଗତ ମାସରେ ଟିକ୍ଟକ୍ ର ଓ୍ଵେବସାଇଟ୍ ଭାରତରେ ଏୟାରଟେଲ ଓ ଭୋଡାଫୋନ ଭଳି କିଛି ବ୍ରଡବ୍ୟାଣ୍ଡ ଓ ମୋବାଇଲ ନେଟୱାର୍କରେ କ୍ଷଣିକ ପାଇଁ ଉପଲବ୍ଧ ହୋଇଥିଲା, ଯାହା ପରେ ସୋସିଆଲ ମିଡିଆରେ ଏହାର ପ୍ରତ୍ୟାବର୍ତନ ସମ୍ଭାବନା ନେଇ ଚର୍ଚ୍ଚା ଆରମ୍ଭ ହୋଇଥିଲା। ତେବେ ଅଧିକାରୀମାନେ ଏହାକୁ ଖାରଜ କରିଛନ୍ତି।
ଟିକ୍ଟକ୍ କୁ ୨୦୨୦ ଜୁନରେ ଜାତୀୟ ସୁରକ୍ଷା ଓ ଡାଟା ଗୋପନୀୟତା ଚିନ୍ତାକୁ ନେଇ ଭାରତରେ ପ୍ରଥମେ ବ୍ୟାନ କରାଯାଇଥିଲା। ଏହା ସହିତ ୫୯ଟି ଚାଇନା ଆପ୍ ଉପରେ କେନ୍ଦ୍ର ସରକାର ରୋକ ଲଗାଇଥିଲେ। ପରେ ଆପଲ ଓ ଗୁଗଲ ନିଜ ଆପ ଷ୍ଟୋରରୁ ଏହି ଆପଗୁଡ଼ିକୁ ହଟାଇଥିଲେ ଏବଂ ୨୦୨୧ ଜାନୁଆରୀରେ ଏହି ନିଷେଧାଜ୍ଞା ସ୍ଥାୟୀ କରାଯାଇଥିଲା। ସେତେବେଳେ ଭାରତ ଥିଲା ଟିକଟକର ସବୁଠାରୁ ବଡ଼ ବ୍ୟବହାରକାରୀ ବେସ୍, ଯେଉଁଠାରେ ୨୦୦ ନିୟୁତରୁ ଅଧିକ ଲୋକ ଏହା ବ୍ୟବହାର କରୁଥିଲେ।
ବାଇଟଡାନ୍ସର ଅନ୍ୟ ପ୍ରଡକ୍ଟ ଯେପରି ହେଲୋ ଓ କ୍ୟାପକଟ୍ ମଧ୍ୟ ସମାନ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଥିଲା। ପରେ କମ୍ପାନୀକୁ ଭାରତରେ ତା’ର ମ୍ୟୁଜିକ ଷ୍ଟ୍ରିମିଂ ସେବା ରେସୋକୁ ମଧ୍ୟ ବନ୍ଦ କରିବାକୁ ପଡ଼ିଥିଲା।
ଚାଇନା ନିବେଶକମାନେ ଭାରତୀୟ ଟେକ ଇକୋସିଷ୍ଟମରେ ପୁନର୍ବାର ସକ୍ରିୟ ହେବା ସମ୍ଭାବନା ଉପରେ ବୈଷ୍ଣବ କହିଛନ୍ତି ଯେ ସରକାର ଏକ ସ୍ୱଚ୍ଛ ନୀତି ଅନୁସରଣ କରିବେ। “ଆମେ ଏକ ଅତ୍ୟନ୍ତ ସ୍ୱଚ୍ଛ ଦେଶ। ନୀତିଗୁଡ଼ିକ ସମସ୍ତଙ୍କ ସହ ସ୍ପଷ୍ଟ ଭାବେ ବାଣ୍ଟି ହେବ,” ସେ କହିଛନ୍ତି।
୨୦୨୦ ଏପ୍ରିଲରେ କେନ୍ଦ୍ର ସରକାର ବୈଦେଶିକ ପ୍ରତ୍ୟକ୍ଷ ନିବେଶ (ଏଫଡିଆଇ) ପାଇଁ କଡ଼ା ନିୟମ ଜାରି କରିଥିଲେ, ଯାହା ଅନୁଯାୟୀ ଭାରତ ସହ ସ୍ଥଳସୀମା ସଂଲଗ୍ନ ଦେଶରୁ ଆସୁଥିବା ନିବେଶ ପାଇଁ ପୂର୍ବ ଅନୁମୋଦନ ବାଧ୍ୟତାମୂଳକ କରାଯାଇଛି। ଏହି ନୀତି ଯୋଗୁଁ ଚାଇନା ନିବେଶ ହ୍ରାସ ପାଇଥିଲା ଏବଂ ଅନେକ ଭାରତୀୟ ଷ୍ଟାର୍ଟଆପକୁ ଚାଇନା ଅଂଶଧନ କମାଇବାକୁ ବା ବିକଳ୍ପ ବାଟ ଦେଖିବାକୁ ବାଧ୍ୟ ହୋଇଥିଲେ।
