ନୂଆଦିଲ୍ଲୀ/ଭୁବନେଶ୍ୱର, ୬।୫: ୧୯୭୧ ମସିହାରେ ଭାରତ-ପାକିସ୍ତାନ ଯୁଦ୍ଧ ପରେ ପ୍ରଥମ ଥର ପାଇଁ ଭାରତ ମେ ୭ ତାରିଖରେ ଏକ ଜାତୀୟ ସ୍ତରର ସିଭିଲ ଡିଫେନ୍ସ ମକ ଡ୍ରିଲ ଆୟୋଜନ କରୁଛି। ଏପ୍ରିଲ ୨୨ରେ ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ, ଯେଉଁଥିରେ ୨୬ ଜଣ ନିରୀହ ନାଗରିକ ପ୍ରାଣ ହରାଇଥିଲେ, ତା’ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହି ପରିପ୍ରେକ୍ଷୀରେ କେନ୍ଦ୍ର ଗୃହ ମନ୍ତ୍ରଣାଳୟ ଦେଶର ୨୪୪ଟି ସିଭିଲ ଡିଫେନ୍ସ ଜିଲାରେ (ଓଡ଼ିଶାର ୧୨ଜିଲା)ରେ ଏହି ବିଶାଳ ସମରାଭ୍ୟାସ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ୧୯୭୧ ପରେ ପ୍ରଥମ। ୧୯୯୯ରେ କାରିଗଲ ଯୁଦ୍ଧ ସମୟରେ ମଧ୍ୟ ଏପରି କୌଣସି ବି ଅଭ୍ୟାସ ହୋଇ ନଥିଲା।
India Pakistan War: ଏହି ମକ ଡ୍ରିଲ ସମୟରେ ବ୍ଲାକଆଉଟ ହେବ। ଏହାର ଅର୍ଥ ହେଉଛି ଆକ୍ରମଣ ସମୟରେ ସମସ୍ତ ଘର, କାର୍ଯ୍ୟାଳୟ ଏବଂ ସାର୍ବଜନୀନ ସ୍ଥାନର ଅନ୍ଧାର ହୋଇଯିବ। ଏହା ସହିତ ଜୋରରେ ସାଇରନ ମଧ୍ୟ ବଜାଯିବ। ସାଇରନ ଶୁଣିବା ମାତ୍ରେ ଲୋକଙ୍କୁ ସତର୍କ ରହିବାକୁ ପଡିବ ଏବଂ ସୁରକ୍ଷିତ ସ୍ଥାନକୁ ଯିବାକୁ ପଡିବ। ଆକ୍ରମଣ ସମୟରେ ନାଗରିକମାନଙ୍କୁ ବଞ୍ଚିବା ପାଇଁ ତାଲିମ ଦିଆଯିବ।
India Pakistan War: ତେବେ ଏହାକୁ ନେଇ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ବଡ଼ ବୟାନ ଦେଇଛନ୍ତି। ସେ କହିଛନ୍ତି, କେବଳ ଜିଲା ନୁହେଁ ଆଗକୁ ଗାଁ ଗାଁରେ ହେବ ମକ ଡ୍ରିଲ। ଯୁଦ୍ଧ ସମୟରେ କଣ କରିବାକୁ ପଡେ, ଆଡଭାଇଜାରି ଆସିବ। ସାଧାରଣ ଜନତା ମଧ୍ୟ ପ୍ରସ୍ତୁତ ରହିବା ଉଚିତ। ଓଡ୍ରାଫ, ଅଗ୍ନିଶମ, ପୋଲିସର ଭୂମିକା ରହିବ। ଜନସାଧାରଣ ଭୟଭୀତ ହେବାର କୌଣସି କାରଣ ନାହିଁ। ଏଭଳି ପରିସ୍ଥିତିରେ ସଜାଗ ରହ ସାମ୍ନା କରିବାକୁ ପଡ଼ିବ।
ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନାକୁ ଦୃଷ୍ଟିରେ ରଖି ସରକାର ନେଇଛନ୍ତି ବଡ଼ ନିଷ୍ପତ୍ତି। ବର୍ତ୍ତମାନ ସରକାର ପାକିସ୍ତାନ ଉପରେ ଡିଜିଟାଲ ଷ୍ଟ୍ରାଇକ୍ ଜାରି ରଖିଥିବାବେଳେ ଏବେ ଫାଇନାଲ ଯୁଦ୍ଧ ହେବା ନେଇ ବଡ଼ ସଙ୍କେତ ମିଳିଛି। ଯୁଦ୍ଧ ଲାଗି ଭାରତ ଗୋଳାବାରୁଦ, RDX ଏବଂ HMX ଭଳି ଶକ୍ତିଶାଳୀ ବିସ୍ଫୋରକ ଓ ବିଭିନ୍ନ ଯୁଦ୍ଧାସ୍ତ୍ର ଅଧିକରୁ ଅଧିକ ଉତ୍ପାଦନ କରୁଛି। ଏନେଇ ସବୁ କର୍ମଚାରୀଙ୍କ ଛୁଟି ବାତିଲ କରାଯାଇଛି।
India Pakistan War: ମଧ୍ୟପ୍ରଦେଶର ଜବଲପୁର ସ୍ଥିତ ଗୋଳାବାରୁଦ କାରଖାନା (ଓଏଫକେ) ସମେତ ମ୍ୟୁନିସନ୍ସ ଇଣ୍ଡିଆ ଲିମିଟେଡ (ଏମଆଇଏଲ) ଅଧୀନରେ ଥିବା ଅନେକ ପ୍ରତିରକ୍ଷା ଉତ୍ପାଦନ କାରଖାନା କର୍ମଚାରୀଙ୍କ ଦୀର୍ଘ ଛୁଟି ବାତିଲ କରିଛନ୍ତି। ଏହି ନିଷ୍ପତ୍ତି ଏପ୍ରିଲ ୨୨ ତାରିଖରେ ଜମ୍ମୁ ଓ କଶ୍ମୀରର ପାହାଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଦୁଇ ଦେଶ ମଧ୍ୟରେ ସୃଷ୍ଟି ହୋଇଥିବା ଉତ୍ତେଜନା ପରିପ୍ରେକ୍ଷୀରେ ନିଆଯାଇଛି, ଯେଉଁଥିରେ ୨୬ ଜଣ ନିରୀହ ବ୍ୟକ୍ତିଙ୍କ ମୃତ୍ୟୁ ହୋଇଥିଲା।
India Pakistan War: ଜବଲପୁରର ଖାମାରିଆ ଗୋଳାବାରୁଦ କାରଖାନା ଓ ଚନ୍ଦ୍ରପୁରର ଅନ୍ୟ କାରଖାନାରେ ପ୍ରାୟ ୭,୦୦୦ କର୍ମଚାରୀ ଦୀର୍ଘଦିନ ଧରି ଛୁଟି ଆବେଦନ କରିବାକୁ ମନା କରାଯାଇଛି ଏବଂ ପୂର୍ବରୁ ଅନୁମୋଦିତ ଛୁଟିଗୁଡ଼ିକୁ ବାତିଲ କରାଯାଇଛି। କାରଖାନା ପରିଚାଳନା ପକ୍ଷରୁ କୁହାଯାଇଛି ଯେ ରାଷ୍ଟ୍ରୀୟ ସୁରକ୍ଷା ଓ ଉତ୍ପାଦନ ବୃଦ୍ଧି ପାଇଁ ଏହି ପଦକ୍ଷେପ ନିଆଯାଇଛି। ଖାମାରିଆ କାରଖାନା ଭାରତର ଅନ୍ୟତମ ବୃହତ ସାମରିକ ଗୋଳାବାରୁଦ ଉତ୍ପାଦନ କେନ୍ଦ୍ର, ଯାହା କାରଗିଲ ଯୁଦ୍ଧ ସମୟରେ ବୋଫୋର୍ସ ଶେଲ ପାଇଁ ଫ୍ୟୁଜ ଏବଂ ବାଲାକୋଟ ଏୟାର ଷ୍ଟ୍ରାଇକରେ ବ୍ୟବହୃତ ୧,୦୦୦ ପାଉଣ୍ଡ ବୋମା ଯୋଗାଇଥିଲା।
India Pakistan War: ପାହାଲଗାମ ଆକ୍ରମଣ ପରେ ଦେଶର ଆଭ୍ୟନ୍ତରୀଣ ଓ ରପ୍ତାନି ଚାହିଦା ବୃଦ୍ଧି ପାଇଛି। ଏହି ପରିସ୍ଥିତିରେ କାରଖାନାଗୁଡ଼ିକ ଉପରେ ଉତ୍ପାଦନ ବଜାୟ ରଖିବା ପାଇଁ ଚାପ ବୃଦ୍ଧି ପାଇଛି। ଅଧିକାରୀମାନେ କହିଛନ୍ତି ଯେ ଏହି ନିଷ୍ପତ୍ତି ସିଧାସଳଖ ଆକ୍ରମଣ ସହ ଜଡ଼ିତ ନୁହେଁ, କିନ୍ତୁ ଏହାର ସମୟ ଓ ପରିଧି ରାଷ୍ଟ୍ରୀୟ ମନୋଭାବକୁ ପ୍ରତିଫଳିତ କରୁଛି।
ବରିଷ୍ଠ ପରିଚାଳନା ଅଧିକାରୀମାନେ ଦାବି କରିଛନ୍ତି ଯେ ଏହି ନିଷ୍ପତ୍ତି ଏପ୍ରିଲ ମାସରେ ଉତ୍ପାଦନ ଲକ୍ଷ୍ୟ ହାସଲ ନ ହୋଇପାରିବା ଏବଂ ବିଦେଶୀ ରପ୍ତାନି ଆଦେଶ ପୂରଣ କରିବା ପାଇଁ ନିଆଯାଇଛି। ତେବେ, ଜବଲପୁରର ଖାମାରିଆ ଅର୍ଡନାନ୍ସ ଫ୍ୟାକ୍ଟ୍ରୀ ଏବଂ ଇଟାରସୀରେ ଜଣେ ଅଧିକାରୀ ନାମ ନ ପ୍ରକାଶ କରିବା ସର୍ତ୍ତରେ କହିଛନ୍ତି ଯେ ଏହି ନିର୍ଦ୍ଦେଶ ଜାତୀୟ ସୁରକ୍ଷା ପ୍ରସଙ୍ଗରେ ଜାରି କରାଯାଇଛି। ବଙ୍ଗଳର ଗନ ଆଣ୍ଡ ଶେଲ ଫ୍ୟାକ୍ଟ୍ରୀ-କୋସିପୋରରେ ଜଣେ କର୍ମଚାରୀ ଶୁକ୍ରବାର ଏକ ଆଦେଶ ଜାରି ହୋଇଥିବା ନିଶ୍ଚିତ କରିଛନ୍ତି, ଯେଉଁଥିରେ ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଛୁଟି ବାତିଲ କରାଯାଇଛି। ଓଡ଼ିଶାର ବଲାଙ୍ଗୀର ଜିଲାରେ ଥିବା ବଡ଼ମାଲ ଅର୍ଡନାନ୍ସ ଫ୍ୟାକ୍ଟ୍ରିରେ ମଧ୍ୟ ସମସ୍ତ କର୍ମଚାରୀଙ୍କ ଛୁଟି ୬୦ ଦିନ ପାଇଁ ବାତିଲ କରାଯାଇଛି।
ଏମଆଇଏଲ ଅଧିକାରୀମାନେ କହିଛନ୍ତି ଯେ ପାହାଲଗାମ ଆକ୍ରମଣ ପରେ କର୍ମଚାରୀମାନଙ୍କୁ “ସତର୍କ ମୋଡ”ରେ ରଖାଯାଇଛି। ଏହା ସୂଚାଏ ଯେ ଦେଶ ଜାତୀୟ ସୁରକ୍ଷା ଏବଂ ପ୍ରତିରକ୍ଷା ଉତ୍ପାଦନକୁ ଅଗ୍ରାଧିକାର ଦେଉଛି।
