ନୂଆଦିଲ୍ଲୀ,୧୪।୮: ଭାରତ ୨୦୩୧ ସୁଦ୍ଧା ବିଶ୍ୱର ଦ୍ୱିତୀୟ ସର୍ବବୃହତ୍ ଅର୍ଥନୀତି ହେବାର କ୍ଷମତା ରଖିଛି। ଏପରିକି ୨୦୬୦ ସୁଦ୍ଧା ଚାଇନାକୁ ଟପି ଭାରତ ବିଶ୍ୱର ସର୍ବବୃହତ୍ ଅର୍ଥନୀତି ହେବା ସମ୍ଭାବନା ରହିଛି ବୋଲି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ)ର ଡେପୁଟି ଗଭର୍ନର ଡ. ମାଇକେଲ ଦେବବ୍ରତ ପାତ୍ର ମତବ୍ୟକ୍ତ କରିଛନ୍ତି। ଶନିବାର ରିଜର୍ଭ ବ୍ୟାଙ୍କ ପକ୍ଷରୁ ଆୟୋଜିତ ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ ସମ୍ମାନିତ ଅତିଥି ଭାବେ ଯୋଗଦେଇ ପାତ୍ର କହିଛନ୍ତି, ୨୦୪୦ରୁ ୫୦ ମସିହା ମଧ୍ୟରେ ଦେଶର ଅଭିବୃଦ୍ଧି ୪ରୁ ୫%କୁ ହ୍ରାସ ପାଇଲେ ମଧ୍ୟ ୨୦୬୦ ସୁଦ୍ଧା ଭାରତ ବିଶ୍ୱର ବୃହତ୍ତମ ଅର୍ଥନୀତି ହେବା ସମ୍ଭାବନା ରହିଛି। ଭାରତ ବର୍ତ୍ତମାନ ବିଶ୍ୱର ୬ଷ୍ଠ ବୃହତ୍ ଅର୍ଥନୀତି। କିନ୍ତୁ କ୍ରୟ ଶକ୍ତି ସମତା (ପିପିପି) ଆଧାରରେ ଚାଇନା ଓ ଆମେରିକା ପରେ ବିଶ୍ୱ ଜିଡିପିର ୭% ଅଂଶୀଦାର ସହ ଭାରତ ବର୍ତ୍ତମାନ ବିଶ୍ୱର ୩ୟ ବୃହତ୍ ଅର୍ଥନୀତି ହୋଇପାରିଛି। ସେହିପରି ଭାରତ ୨୦୨୭ରେ ୫ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବ। ୨୦୨୦-୨୧ ଆର୍ଥିକ ବର୍ଷରେ କୋଭିଡ୍ ମହାମାରୀ ଯୋଗୁ ଜିଡିପି ୬.୬% କୁ ହ୍ରାସ ପାଇଥିବାବେଳେ ୨୦୨୧-୨୨ ଆର୍ଥିକ ବର୍ଷରେ ଏହା ୮.୭% କୁ ଫେରିଛି। ଜିଡିପିର ପୂର୍ବ ମହାମାରୀ ସ୍ତରଠାରୁ ୧.୫% ଅଧିକ ରହିଛି ବୋଲି ସେ କହିଥିଲେ। ଚଳିତ ଆର୍ଥିକ ବର୍ଷ ପାଇଁ ଜିଡିପି ୭.୨% ବୃଦ୍ଧି ପାଇବ ବୋଲି ଆର୍ବିଆଇ ପକ୍ଷରୁ ଆକଳନ କରାଯାଇଥିବା ପାତ୍ର କହିଛନ୍ତି।
ଅପରପକ୍ଷରେ ଓଇସିଡି ଆକଳନ ଅନୁସାରେ ୨୦୪୮ ସୁଦ୍ଧା ଭାରତ ଆମେରିକା ଅର୍ଥନୀତିକୁ ଟପିପାରେ ବୋଲି ଆକଳନ କରାଯାଇଛି। ଏପରିକି ଚାଇନା ପରେ ଭାରତ ବିଶ୍ୱର ଦ୍ୱିତୀୟ ବୃହତ୍ ଅର୍ଥନୀତି ହେବ। ଭାରତ ନିଜର ଡେମୋଗ୍ରାଫିକ ଡିଭିଡେଣ୍ଡ, ମାନୁଫାକ୍ଚରିଂ, ରପ୍ତାନି ଓ ଆନ୍ତର୍ଜାତିକୀକରଣ ଜରିଆରେ ଏହି ଲକ୍ଷ୍ୟ ହାସଲ କରିପାରିବ। ତେବେ ଏହି ଲକ୍ଷ୍ୟ ହାସଲରେ ଅନେକ ପ୍ରତିବନ୍ଧକ ଏବେ ମଧ୍ୟ ରହିଛି। ମହାମାରୀର ମାନ୍ଦାବସ୍ଥା ଯୋଗୁ ଲୋକଙ୍କ ଜୀବନ ଜୀବିକା ଓ ଉତ୍ପାଦନ ବ୍ୟାପକ ପ୍ରଭାବିତ ହୋଇଛି। ସେସବୁରେ ସୁଧାର ସାଙ୍ଗକୁ ଅର୍ଥନୀତିର ପୂର୍ବ ସ୍ଥିତିକୁ ଫେରିବାକୁ ଭାରତ ପ୍ରାୟ ୧୦ବର୍ଷ ଲାଗିଯିବ। ସେହିଭଳି ଭିତ୍ତିଭୂମି ନିବେଶରେ ଭାରତ ବିଶ୍ୱରେ ବହୁ ପଛରେ ରହିଛି। ଏପରିକି ଭାରତୀୟ ଶ୍ରମବଳର କେବଳ ୪୬.୨% ନିଯୁକ୍ତିକ୍ଷମ, ଯାହାକି ଅର୍ଥିନୀତି ବିକାଶରେ ଏହା ଏକ ବଡ ପ୍ରତିବନ୍ଧକ। ଆର୍ବିଆଇ ପକ୍ଷରୁ ଆକଳନ କରାଯାଇଛି ଯେ ଭାରତ ଏ ସବୁ ଚ୍ୟାଲେଞ୍ଜକୁ ମୁକାବିଲା କରିପାରିବ। ତେବେ ଆଗାମୀ ଦଶନ୍ଧିରେ ୧୧% ହାରରେ ବିକାଶ କରିପାରିଲେ ଭାରତ ୨୦୪୮ ନୁହେଁ ବଂର ୨୦୩୧ରେ ବିଶ୍ୱର ଦ୍ୱିତୀୟ ସର୍ବବୃହତ୍ ଅର୍ଥନୀତିରେ ପରିଣତ ହେବ ଏବଂ ୨୦୬୦ ସୁଦ୍ଧା ବିଶ୍ୱର ସର୍ବବୃହତ୍ ଅର୍ଥନୀତି ହେବା ଯଥେଷ୍ଟ ସମ୍ଭାବନା ରହିଛି।
