ଭୁବନେଶ୍ୱର, ୧୨।୨(ସୁନିତ୍ ମିଶ୍ର):ଭାରତୀୟ ଚାଷୀ ଏବଂ ଟ୍ରେଡ୍ ୟୁନିୟନଗୁଡିକ ପକ୍ଷରୁ ଗୁରୁବାର ‘ଭାରତ ବନ୍ଦ’ ଡାକରା ଦିଆଯାଇଛି। ମୁଖ୍ୟତଃ କେନ୍ଦ୍ର ସରକାର ଆଣିଥିବା ୪ ନୂଆ ଶ୍ରମ କୋଡ୍ ବାତିଲ ଦାବିରେ ୧୦ ଟ୍ରେଡ୍ ୟୁନିୟନ ପକ୍ଷରୁ ବନ୍ଦ ଡାକରା ଦେବା ସହ ଅନ୍ୟ ସଙ୍ଗଠନଗୁଡିକର ସମର୍ଥନ ଲୋଡ଼ିଛନ୍ତି। ଆମେରିକା ସହ ଭାରତର ବହୁ ପ୍ରତୀକ୍ଷିତ ଟ୍ରେଡ୍ ଡିଲ୍ ମାର୍ଚ୍ଚ ଶେଷ ସୁଦ୍ଧା ସମ୍ପନ୍ନହେବାକୁ ଯାଉଛି। ଉଭୟ ପକ୍ଷ ଗତ ୮ ତାରିଖରେ ଏକ ମିଳିତ ଘୋଷଣାନାମାରେ ଏହାର ରୂପରେଖ ଜାରି କରିଛନ୍ତି। ଉକ୍ତ ବୁଝାମଣା ଦ୍ୱାରା ଭାରତୀୟ ବଜାରକୁ ପୁଞ୍ଜିନିବେଶର ସୁଅ ଛୁଟିବା ସହ ଦେଶରେ ନୂଆ ନିଯୁକ୍ତି ସୁଯୋଗ ସୃଷ୍ଟିହେବ ବୋଲି କେନ୍ଦ୍ର ଯୁକ୍ତି ବାଢୁଥିବାବେଳେ ଏହା ଏକ ଟ୍ରେଡ୍ ଡିଲ୍ ନୁହେଁ ବରଂ ଆମେରିକା ଚାପରେ ସରକାରଙ୍କ ଆତ୍ମସମର୍ପଣ ବୋଲି କୃଷକ ସଙ୍ଗଠନଗୁଡିକ ଅଭିହିତ କରିଛନ୍ତି। ଏହି ଡିଲ୍ ଦ୍ୱାରା ଭାରତୀୟ ଚାଷୀ ଏବଂ ଶ୍ରମିକଙ୍କ ସ୍ବାର୍ଥକୁ ବଳି ପକାଯାଇଥିବା ଅଭିଯୋଗ ଆଣି କୃଷକ ସଙ୍ଗଠନ ଏବଂ ଟ୍ରେଡ୍ ୟୁନିୟନଗୁଡିକ ପକ୍ଷରୁ ଭାରତ ବନ୍ଦ ଡାକରା ଦିଆଯାଇଛି। ଏହି ବନ୍ଦ ଡାକରାକୁ ରାଜ୍ୟ କଂଗ୍ରେସ ସମର୍ଥନ ଦେବା ନେଇ ଘୋଷଣା କରିଥିବା ବେଳେ ବିଜୁ ଶ୍ରମିକ ସାମ୍ମୁଖ୍ୟ ପକ୍ଷରୁ ନୈତିକ ସମର୍ଥନ ପ୍ରଦାନ ନେଇ ଘୋଷଣା କରାଯାଇଛି।
ଏଆଇଟିୟୁସି ରାଜ୍ୟ ସଭାପତି ଅଶୋକ ଦାସ କହିଛନ୍ତି, ରାଜ୍ୟର ବିଭିନ୍ନ ସ୍ଥାନରେ ଏଆଇଟିୟୁସି ପକ୍ଷରୁ ଶାନ୍ତିପୂର୍ଣ୍ଣ ଭାବେ ବନ୍ଦ ପାଳନ କରାଯିବ। ୧୨ ଘଣ୍ଟା ଲାଗି ଭାରତ ବନ୍ଦ ଡାକରା ଦିଆଯାଇଛି। ୪ ନୂତନ ଶ୍ରମ କୋଡ୍ ବାତିଲ ଦାବି, କୃଷକମାନଙ୍କ ସର୍ବନିମ୍ନ ଉତ୍ପାଦିତ ମୂଲ୍ୟ, ବିଦ୍ୟୁତ୍ ବିଲ୍ରେ ଅନିୟମିତତା ଏବଂ ସ୍ମାର୍ଟ ମିଟର ପ୍ରତ୍ୟାହାର, ବିଭିନ୍ନ ରାଷ୍ଟ୍ରାୟିତ ଶିଳ୍ପଗୁଡିକୁ ଘରୋଇକରଣ ବନ୍ଦ ଆଦି ମୋଟ୍ ୧୭ଟି ଦାବି ନେଇ ବନ୍ଦ ଡାକରା ଦିଆଯାଇଛି। ଶ୍ରମିକମାନେ ଦେଶବ୍ୟାପୀ କାର୍ଯ୍ୟ ବନ୍ଦ ରଖିବେ ବୋଲି ସେ କହିଛନ୍ତି। ଅନ୍ୟପଟେ ଅଲ ଓଡ଼ିଶା ବସ୍ ଆସୋସିଏଶନ କୋଷାଧ୍ୟକ୍ଷ ବରୋଦା ଆଚାର୍ଯ୍ୟ କହିଛନ୍ତି, ମାଲିକମାନେ ରାସ୍ତାରେ ବହୁ ଦାମିକା ଗାଡ଼ି ଚଳାଚଳ କରୁଛନ୍ତି। ବନ୍ଦ ପାଳନ ସମୟରେ କିଏ କୋଉଠି କେତେବେଳେ କାଚ ଭାଙ୍ଗିଦେବ ତାକୁ ଦେଖି କେତେଜଣ ବସ୍ ଚଳାଚଳ ନ କରିପାରନ୍ତି। ଏପର୍ଯ୍ୟନ୍ତ କିଛି ଚୂଡ଼ାନ୍ତ ନିଷ୍ପତ୍ତି ହୋଇନାହିଁ। ହେଲେ ଆସୋସିଏଶନ ବନ୍ଦ କରିବ ନାହିଁ ବସ୍ ଚଳାଇବ ଯଦି କେହି ରାସ୍ତାରେ ଅଟକାଇବେ ତେବେ ସେଠାରେ ରହିଯିବ ବୋଲି ଆଚାର୍ଯ୍ୟ କହିଛନ୍ତି।
ଅନ୍ୟପକ୍ଷରେ ପିଲାମାନେ ସ୍କୁଲ, କଲେଜ ଯିବା ନେଇ ଏବେଠାରୁ ଦ୍ୱନ୍ଦ୍ୱ ସୃଷ୍ଟି ହୋଇଛି। କାରଣ ଯଦି ଗାଡ଼ି, ମଟର ଚଳାଚଳ ନ କରିବ ତେବେ ପିଲାମାନେ ଶିକ୍ଷାନୁଷ୍ଠାନ କେମିତି ଯିବେ ତାହା ଦ୍ୱନ୍ଦ୍ୱରେ ଅଛି। ସରକାରଙ୍କ ପକ୍ଷରୁ ସ୍କୁଲ, କଲେଜ ଏବଂ ସରକାରୀ କାର୍ଯ୍ୟାଳୟ ବନ୍ଦ ନେଇ କିଛି ଘୋଷଣା କରାଯାଇନାହିଁ। ଅନ୍ୟପଟେ କଂଗ୍ରେସ ବରିଷ୍ଠ ନେତା ଜୟଦେବ ଜେନା କହିଛନ୍ତି, ରାଜ୍ୟର ଯେଉଁଠାରେ ସବୁ ଟ୍ରେଡ୍ ୟୁନିୟନ ରହିଛି ସେସବୁଠି କଂଗ୍ରେସ ବନ୍ଦକୁ ସମର୍ଥନ ଦେବ। ଜିଲା ମୁଖ୍ୟାଳୟଗୁଡିକରେ ମଧ୍ୟ ଟ୍ରେଡ୍ ୟୁନିୟନଗୁଡିକୁ ସମର୍ଥନ କରିବାକୁ କଂଗ୍ରେସ ନେତାମାନଙ୍କୁ କୁହାଯାଇଥିବା ଜୟଦେବ କହିଛନ୍ତି। ବିଜୁ ଶ୍ରମିକ ସାମ୍ମୁଖ୍ୟର ମହାସଚିବ ସୁବାସ ସିଂ କହିଛନ୍ତି, କେନ୍ଦ୍ର ସରକାର ଶ୍ରମିକମାନଙ୍କ ସ୍ବାର୍ଥକୁ ସମ୍ପୂର୍ଣ୍ଣ ନଷ୍ଟ କରିଦେବାକୁ ବସିଛନ୍ତି। ଶ୍ରମିକମାନଙ୍କ ସ୍ବାର୍ଥକୁ ହତ୍ୟାକରି ମାଲିକମାନଙ୍କୁ ଲାଭ ଦେବାକୁ ଚେଷ୍ଟା କରାଯାଉଛି। ଅନେକ ରାଷ୍ଟ୍ରାୟତ୍ତ ସଂସ୍ଥାକୁ ଘରୋଇକରଣ କରି ବଡ଼ ବଡ଼ କମ୍ପାନୀ ହାତକୁ ଟେକିଦିଆଯାଇଛି। ଭାରତବ୍ୟାପୀ ଶ୍ରମିକମାନଙ୍କ ଭିତରେ ଅସନ୍ତୋଷ ବଢ଼ିବାରେ ଲାଗିଛି। କେନ୍ଦ୍ର ବଜେଟରେ ଶ୍ରମିକମାନଙ୍କ ପାଇଁ କିଛି ହେଲେ ନାହିଁ। ତେଣୁ ବିଜୁ ଶ୍ରମିକ ସାମ୍ମଖ୍ୟ ଏହାକୁ ସମର୍ଥନ କରିବ ବୋଲି ସୁବାସ କହିଛନ୍ତି।
ଭାଜପା ମୁଖପାତ୍ର ଅନିଲ ବିଶ୍ୱାଳ କହିଛନ୍ତି, ଶ୍ରମ କୋଡ୍ ପ୍ରତ୍ୟାହାର ଦାବିରେ ଦେଶବ୍ୟାପୀ ଧର୍ମଘଟ ଡାକରା ନିନ୍ଦନୀୟ। ଯେଉଁମାନେ ଶ୍ରମ ଆଇନରେ ସଂସ୍କାରକୁ ବିରୋଧ କରୁଛନ୍ତି ସେମାନେ କଳକାରଖାନା ବନ୍ଦର ମୁଖ୍ୟ ସୂତ୍ରଧର। ଶ୍ରମ ଆଇନରେ ସବୁ ସଂଶୋଧନ ଶ୍ରମିକମାନଙ୍କ ହିତରେ ଅଣାଯାଇଛି। ଯେଉଁମାନେ ବିରୋଧ କରୁଛନ୍ତି ସେମାନେ ସରକାରରେ ଥିବାବେଳେ ଶ୍ରମିକମାନେ ନିର୍ଯାତିତ ହେଉଥିଲେ ବୋଲି ଅନିଲ କହିଛନ୍ତି।