ଭୁବନେଶ୍ୱର,୫।୧୨(ସତ୍ୟଜିତ୍ ରାଉତ):ଭୁବନେଶ୍ୱର ଖାରବେଳନଗରସ୍ଥିତ ପ୍ଲଟ ନଂ-୨୨କୁ ଭଡ଼ାରେ ନେଇଥିବା ଘର ଖାଲି କରିବାକୁ କେନ୍ଦ୍ର କରି ଗଣ୍ଡଗୋଳ ହୋଇଛି। ଭଡ଼ାରେ ରହୁଥିବା ଯୁବତୀ ଓ ମାଲିକଙ୍କ ପରିବାର ସଦସ୍ୟଙ୍କ ମଧ୍ୟରେ ଖଣ୍ଡଯୁଦ୍ଧ ହୋଇଛି। ଯୁବତୀଙ୍କୁ ମାଡ଼ ମାରିବା ସହ ଦୁର୍ବ୍ୟବହାର ଘଟଣାରେ ଖାରବେଳନଗର ଥାନା ପୋଲିସ ଘର ମାଲିକଙ୍କ ଦୁଇ ପୁଅଙ୍କୁ ବୁଧବାର ଗିରଫ କରିଛି। ଅଭିଯୁକ୍ତଦ୍ୱୟ ହେଲେ ପ୍ରକାଶ ପ୍ରଧାନ (୨୯) ଓ ପ୍ରଦ୍ୟୁମ୍ନ ପ୍ରଧାନ (୪୨)। କୋର୍ଟଚାଲାଣ ପରେ ଅଭିଯୁକ୍ତଦ୍ୱୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ଝଗଡା ବେଳର ଭିଡିଓ ସୋସିଆଲ୍ ମିଡିଆରେ ଭାଇରାଲ ହୋଇଛି।
ପୋଲିସ ସୂଚନାନୁଯାୟୀ, ପୀଡ଼ିତା ଅଭିଯୋଗକାରିଣୀ ପ୍ଲଟ ନଂ-୨୨ର ତଳମହଲାରେ ଏକ ଘର ନେଇ ୨ବର୍ଷ ହେବ ରହୁଛନ୍ତି। ସେ ଏକ ସଂସ୍ଥାରେ ସେଲ୍ସମ୍ୟାନ ଭାବେ କାମ କରୁଥିବାବେଳେ ଭଡ଼ା ଟଙ୍କା ଦେବାରେ ଅନିୟମିତତା କରିବାରୁ ଘର ଛାଡ଼ିଦେବାକୁ ମାଲିକ ପ୍ରଫୁଲ୍ଲ ଚନ୍ଦ୍ର ପ୍ରଧାନ ତାଙ୍କୁ ତାଗିଦ୍ କରୁଥିଲେ। ହେଲେ ଅଗ୍ରିମ ଭଡ଼ା ବାବଦକୁ ୩୦ ହଜାର ଟଙ୍କା ଦେଇଥିବାବେଳେ ଉକ୍ତ ଟଙ୍କା ଫେରାଇଲେ ସେ ଘର ଛାଡ଼ିବେ ବୋଲି ପୀଡ଼ିତା ଜଣଙ୍କ କହିଥିଲେ। ଏହାକୁ କେନ୍ଦ୍ର କରି ପରସ୍ପର ମଧ୍ୟରେ ଥାନାରେ ଦୁଇ ମାମଲା ମଧ୍ୟ ରହିଛି। ସୋମବାର ମାଲିକଙ୍କ ସ୍ତ୍ରୀଙ୍କୁ ଯୁବତୀ ଜଣଙ୍କ ଗାଳିଗୁଲଜ କରିଥିବା ଅଭିଯୋଗ ପରେ ପୋଲିସ ଆଉ ଏକ ମାମଲା ରୁଜୁ କରିଥିଲା। ମଙ୍ଗଳବାର ସକାଳ ପ୍ରାୟ ୭ଟା ୩୦ରୁ ୮ଟା ୩୦ ମଧ୍ୟରେ ରୁମ୍ ପରିସରରେ ପୁଣି ଝଗଡ଼ା ଉଗ୍ରରୂପ ନେଇଥିଲା। ପୀଡ଼ିତା ଯୁବତୀ ଓ ତାଙ୍କ ରୁମମେଟ୍ଙ୍କ ମଧ୍ୟରେ ମାଲିକ ପ୍ରଫୁଲ୍ଲ ଏବଂ ତାଙ୍କ ଦୁଇପୁଅଙ୍କ ଝଗଡ଼ା ହୋଇଥିଲା। ଏହି ସମୟରେ ଯୁବତୀ ଓ ତାଙ୍କ ସାଥୀମାନଙ୍କୁ ଅଭିଯୁକ୍ତମାନେ ଟଣାଓଟରା କରିବା ସହ ଅସଦାଚରଣ କରି ମାଡ଼ ମାରିଥିଲେ। ଏନେଇ ଯୁବତୀଙ୍କ ଏତଲା ଆଧାରରେ ଖାରବେଳନଗର ଥାନା ପୋଲିସ ଏକ ମାମଲା (ନଂ.୫୩୦/୨୦୨୪) ରୁଜୁ କରି ଅଭିଯୁକ୍ତ ଦ୍ୱୟଙ୍କୁ ଗିରଫ କରିଥିଲା।
