ନୂଆଦିଲ୍ଲୀ,୫।୨: ଅନେକ ଆଲୋଚନା ପରେ ଭାରତ ୟୁରୋପ, ଆମେରିକା ସହିତ ବାଣିଜ୍ୟ ଚୁକ୍ତି କରିବାରେ ସଫଳ ହୋଇଛି। ଏହି ଚୁକ୍ତି ଭାରତ ଅର୍ଥନୀତି ପାଇଁ ଖୁବ ସୁଯୋଗ ଆଣିଦେବ। ଏହି ସଫଳତା ପରେ ଭାରତ ଏବଂ ଗଲ୍ଫ କୋଅପରେସନ୍ କାଉନସିଲ୍ (GCC) ମଧ୍ୟରେ ଦୀର୍ଘ ଦିନରୁ ଅଟକି ରହିଥିବା ମୁକ୍ତ ବ୍ୟାପାର ଚୁକ୍ତି (FTA) ପାଇଁ ପୁଣି ଥରେ ବୁଝାମଣା ଆରମ୍ଭ କରିବାକୁ ଉଭୟ ପକ୍ଷ ସମ୍ମତି ପ୍ରକାଶ କରିଛନ୍ତି। ଆର୍ଥିକ ସମ୍ପର୍କକୁ ଅଧିକ ସୁଦୃଢ଼ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।
ଏହି ଚୁକ୍ତି ପାଇଁ ଆଲୋଚନା ପ୍ରଥମେ ୨୦୦୪ରେ ଆରମ୍ଭ ହୋଇଥିଲା। ୨୦୦୬ ଏବଂ ୨୦୦୮ରେ ଦୁଇଟି ପର୍ଯ୍ୟାୟରେ ଆଲୋଚନା ହେବା ପରେ, ୨୦୧୧ରେ ଜିସିସି ଏହାର ସମସ୍ତ ବିଶ୍ୱସ୍ତରୀୟ ବ୍ୟାପାର ଆଲୋଚନାକୁ ସ୍ଥଗିତ ରଖିଥିଲା। ୨୦୨୨ରୁ ପୁଣି ଥରେ ଏହି ପ୍ରକ୍ରିୟା ଗତିଶୀଳ ହୋଇଥିବା ବେଳେ ଗୁରୁବାର ଏ ସମ୍ପର୍କିତ ନୂତନ ସର୍ତ୍ତାବଳୀ ସ୍ୱାକ୍ଷରିତ ହୋଇଛି।
କେନ୍ଦ୍ର ମନ୍ତ୍ରୀ ପୀୟୂଷ ଗୋୟଲଙ୍କ ସୂଚନା ଅନୁଯାୟୀ, ଏହି ଚୁକ୍ତି ଦ୍ୱାରା ଭାରତ ଓ ଜିସିସି ଦେଶଗୁଡ଼ିକରେ ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ ଏବଂ ଅଧିକ ନିବେଶ ଆକୃଷ୍ଟ ହେବ।
ଏହା ଭାରତର ଶକ୍ତି ସମ୍ପଦକୁ ବିବିଧ କରିବାରେ ସହାୟକ ହେବା ସହ ଉଭୟ ପକ୍ଷର ଖାଦ୍ୟ ସୁରକ୍ଷାକୁ ସୁଦୃଢ଼ କରିବ। ଏହି ଗୋଷ୍ଠୀରେ ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ (UAE), କାତାର, କୁଏତ, ଓମାନ ଏବଂ ବାହାରିନ ସାମିଲ ଅଛନ୍ତି।
୨୦୨୪-୨୫ ଆର୍ଥିକ ବର୍ଷରେ ଭାରତ ଓ ଜିସିସି ମଧ୍ୟରେ ମୋଟ ଦ୍ୱିପାକ୍ଷିକ ବାଣିଜ୍ୟ ୧୭୮.୫୬ ବିଲିୟନ ଡଲାରରେ ପହଞ୍ଚିଛି, ଯାହା ଭାରତର ସମଗ୍ର ବିଶ୍ୱ ବାଣିଜ୍ୟର ପ୍ରାୟ ୧୫.୪୨%। ସାଉଦି ଆରବ ଏହି କ୍ଷେତ୍ରରେ ଭାରତର ଦ୍ୱିତୀୟ ବୃହତ୍ତମ ବ୍ୟାପାରିକ ଅଂଶୀଦାର ହୋଇଥିବା ବେଳେ, ଭାରତକୁ ଆସୁଥିବା ମୋଟ ବିଦେଶୀ ଅର୍ଥ ମଧ୍ୟରୁ ୧୯.୨% କେବଳ ୟୁଏଇ’ରୁ ଆସୁଛି।
India, Gulf Cooperation Council agree to restart talks on long-pending free trade deal
