ନୂଆଦିଲ୍ଲୀ, ୪ା୫: ୨୦୨୩ ବିଶ୍ୱ ପ୍ରେସ୍ ସ୍ବାଧୀନତା ସୂଚକାଙ୍କରେ ଭାରତ ୧୬୧ତମ ସ୍ଥାନକୁ ଖସିଛି। ମୋଟ ୧୮୦ଟି ଦେଶକୁ ନେଇ ଏହି ସୂଚକାଙ୍କ ପ୍ରସ୍ତୁତ କରାଯାଇଛି। ବିଶ୍ୱ ଗଣମାଧ୍ୟମ ଉପରେ ନଜର ରଖିଥିବା ରିପୋର୍ଟର୍ସ ଓ୍ବିଦାଉଟ୍ ବର୍ଡର (ଆର୍ଏସ୍ଏଫ୍)ର ସଦ୍ୟତମ ରିପୋର୍ଟରୁ ଏହା ଜଣାପଡ଼ିଛି। ଅନ୍ୟ ପକ୍ଷରେ ଗଣମାଧ୍ୟମ ସ୍ବାଧୀନତାରେ ପାକିସ୍ତାନ ୧୫୦ ର଼୍ୟାଙ୍କରେ ଥାଇ ଭାରତ ତୁଳନାରେ ଭଲ ସ୍ଥିତି ରହିଛି। ଗତବର୍ଷ ଭାରତ ୧୫୦ତମ ସ୍ଥାନରେ ରହିଥିଲା। ବିଶ୍ୱ ଗଣମାଧ୍ୟମ ସ୍ବାଧୀନତାରେ ଶ୍ରୀଲଙ୍କା ଚଳିତ ବର୍ଷ ୧୩୫ତମ ସ୍ଥାନରେ ରହିଛି, ଗତବର୍ଷ ଏହା ୧୪୬ତମ ସ୍ଥାନରେ ରହିଥିଲା। ନରଓ୍ବେ, ଆୟର୍ଲାଣ୍ଡ, ଡେନ୍ମାର୍କ ପ୍ରେସ୍ ସ୍ବାଧୀନତାରେ ଯଥାକ୍ରମେ ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନରେ ରହିଛନ୍ତି। ଅନ୍ୟପକ୍ଷରେ ଭିଏଟ୍ନମା, ଚାଇନା ଏବଂ ଉତ୍ତର କୋରିଆ ତାଲିକାର ସବାତଳେ ଅଛନ୍ତି। ଆର୍ଏସ୍ଏଫ୍ ପ୍ରତିବର୍ଷ ପ୍ରେସ୍ ସ୍ବାଧୀନତାର ବିଶ୍ୱ ର଼୍ୟାଙ୍କିଂ ପ୍ରସ୍ତୁତ କରିଥାଏ। ପ୍ରେସ୍ ସ୍ବାଧୀନତା ସୂଚକାଙ୍କରେ ଭାରତ ତଳକୁ ଖସିବାକୁ ନେଇ ଇଣ୍ଡିଆ ଓ୍ବମେନ୍ସ ପ୍ରେସ୍ କର୍ପସ୍, ପ୍ରେସ୍ କ୍ଲବ୍ ଅଫ୍ ଇଣ୍ଡିଆ ଏବଂ ପ୍ରେସ୍ ଆସିସିଏଶନ ଉଦ୍ବେଗ ପ୍ରକାଶ କରିବା ସହ ମିଳିତ ବିବୃତି ଜାରି କରିଛନ୍ତି। ଭାରତ ସମେତ ବିଭିନ୍ନ ଦେଶରେ ପ୍ରେସ୍ ସ୍ବାଧୀନତା ନିମ୍ନଗାମୀ ହୋଇଥିବା ଆର୍ଏସ୍ଏଫ୍ ରିପୋର୍ଟରେ କୁହାଯାଇଛି। ଦକ୍ଷିଣ ଗୋଲାର୍ଦ୍ଧରେ ଥିବା ବିକାଶଶୀଳ ଗଣତାନ୍ତ୍ରିକ ରାଷ୍ଟ୍ରଗୁଡ଼ିକରେ ଅସମାନତା ଜାରି ରହିଥିବାବେଳେ ଗଣମାଧ୍ୟମର ଭୂମିକାକୁ ନୂ୍ୟନ ଦର୍ଶାଯାଇପାରିବ ନାହିଁ। ପ୍ରେସ୍ ସ୍ବାଧୀନତାକୁ ଅସୁରକ୍ଷିତ କାର୍ଯ୍ୟ ସ୍ଥିତିର କୌଣସି ଅବଦାନ ରହିପାରିବ ନାହିଁ ବୋଲି ଆର୍ଏସ୍ଏଫ୍ ରିପୋର୍ଟରେ କୁହାଯାଇଛି।
