ନୂଆଦିଲ୍ଲୀ,୧୩।୧: ଭାରତ ଏବଂ ୟୁରୋପୀୟ ସଂଘ (EU) ମଧ୍ୟରେ ଏକ ମୁକ୍ତ ବାଣିଜ୍ୟ ଚୁକ୍ତିନାମା ପାଇଁ ଦୀର୍ଘ ସମୟ ଧରି ଚାଲିଥିବା ଆଲୋଚନା ଏବେ ଏକ ର୍ନିଣ୍ଣାୟକ ପର୍ଯ୍ୟାୟରେ ପହଞ୍ଚିଥିବା ପରି ମନେ ହେଉଛି। ଯଦି ସବୁକିଛି ଯୋଜନା ଅନୁଯାୟୀ ହୁଏ, ତେବେ ଏହି ଚୁକ୍ତିନାମା ଜାନୁଆରୀ ମାସ ଶେଷ ସୁଦ୍ଧା ଚୂଡ଼ାନ୍ତ ହୋଇପାରେ। ଏହି ସୂଚନା ଦେଇଛନ୍ତି ଜର୍ମାନ ଚାନ୍ସେଲର ଫ୍ରେଡ୍ରିଚ ମର୍ଜ, ଯିଏ ତାଙ୍କର ପ୍ରଥମ ଭାରତ ଗସ୍ତରେ ଅଛନ୍ତି। ସୋମବାର ଅହମ୍ମଦାବାଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ ପରେ ତାଙ୍କର ମନ୍ତବ୍ୟ ଭାରତୀୟ ଅର୍ଥନୀତି ଏବଂ ସାଧାରଣ ବ୍ୟବସାୟ ପାଇଁ ଏକ ନୂତନ ଆଶାର କିରଣ ଆଣିଛି।
ଜାନୁଆରୀ ଶେଷ ଏକ ‘ଗେମ ଚେଞ୍ଜର’ ହୋଇପାରେ
ଅହମ୍ମଦାବାଦ ଗସ୍ତ ସମୟରେ, ମର୍ଜ ସ୍ପଷ୍ଟ କରିଥିଲେ ଯେ ଯଦି ଜାନୁଆରୀ ଶେଷ ସୁଦ୍ଧା ଆଲୋଚନା ଚୂଡ଼ାନ୍ତ ହୁଏ, ତେବେ ୟୁରୋପୀୟ କମିଶନ ଏବଂ ୟୁରୋପୀୟ ପରିଷଦର ଅଧ୍ୟକ୍ଷମାନେ ଚୁକ୍ତିନାମା ସୱାକ୍ଷର କରିବା ପାଇଁ ଭାରତ ଗସ୍ତ କରିପାରନ୍ତି। ଏହି ସମ୍ଭାବ୍ୟ ଚୁକ୍ତିନାମା ସମ୍ପର୍କରେ ଉଭୟ ପକ୍ଷରେ ପ୍ରବଳ ଉତ୍ସାହ ରହିଛି। ଜର୍ମାନ ସରକାରୀ ସୂତ୍ର ଅନୁଯାୟୀ, ପ୍ରଧାନମନ୍ତ୍ରୀ ମୋଦି ଏବଂ ଚାନ୍ସେଲର ମର୍ଜଙ୍କ ମଧ୍ୟରେ “ଅତ୍ୟନ୍ତ ଘନିଷ୍ଠ” ଆଲୋଚନା ହୋଇଛି, ଯାହା ଜାନୁଆରୀ ମାସରେ ହିଁ ଏକ ଚୁକ୍ତିନାମା ସୱାକ୍ଷରିତ ହେବାର ସମ୍ଭାବନାକୁ ବୃଦ୍ଧି କରିଛି। ଏହି ସମୟରେ, ଗୁଜରାଟରେ ଏକ ପୃଥକ କାର୍ଯ୍ୟକ୍ରମରେ ଭାଷଣ ଦେଇ, ଭାରତୀୟ ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ ମଧ୍ୟ ନିଶ୍ଚିତ କରିଛନ୍ତି ଯେ ଚୁକ୍ତିନାମା ଶେଷ ପର୍ଯ୍ୟାୟରେ ଅଛି। ସାଧାରଣ ଲୋକଙ୍କ ପାଇଁ, ଏହାର ସିଧାସଳଖ ଅର୍ଥ ହେବ ଭାରତୀୟ ସାମଗ୍ରୀଗୁଡ଼ିକ ୟୁରୋପୀୟ ବଜାରକୁ ସହଜ ପହଞ୍ଚିବ ଏବଂ ୟୁରୋପରୁ ପ୍ରଯୁକ୍ତିବିଦ୍ୟା ଏବଂ ଉତ୍ପାଦଗୁଡ଼ିକ ଭାରତରେ ଅଧିକ ସୁଲଭ ହେବ।
ବର୍ତ୍ତମାନର ବିଶ୍ୱ ପରିସ୍ଥିତି ଉପରେ ଚିନ୍ତା ପ୍ରକାଶ କରି ଚାନ୍ସେଲର ମର୍ଜ କହିଛନ୍ତି ଯେ ବିଶ୍ୱ ବର୍ତ୍ତମାନ “ଦୁର୍ଭାଗ୍ୟଜନକ ସଂରକ୍ଷଣବାଦର ପୁନର୍ଜାଗରଣ” ଦେଇ ଗତି କରୁଛି। ଏହା ସିଧାସଳଖ ଭାରତ ଏବଂ ଜର୍ମାନୀ ଭଳି ଦେଶଗୁଡ଼ିକୁ ପ୍ରଭାବିତ କରୁଛି। ଯଦିଓ ସେ କୌଣସି ଦେଶର ନାମ ନେଇ ନଥିଲେ, ଏହାର ଅର୍ଥ ସ୍ପଷ୍ଟ ଥିଲା। ରୁଷିଆ ତେଲ କ୍ରୟ ନେଇ ଆମେରିକାର ଭାରତ ଉପରେ ଚାପ ଏବଂ ଖଣିଜ ପଦାର୍ଥ ରପ୍ତାନି ଉପରେ ଚୀନର କଟକଣା ଏହାର ପ୍ରମୁଖ ଉଦାହରଣ।
ଗତ ବର୍ଷ, ଚୀନର ରପ୍ତାନି କଟକଣା ଏବଂ ଆମେରିକା-ଚୀନ ବାଣିଜ୍ୟ ଯୁଦ୍ଧ ଯୋଗାଣ ଶୃଙ୍ଖଳାକୁ ଗୁରୁତର ଭାବରେ ବିପର୍ଯ୍ୟସ୍ତ କରିଥିଲା, ଯାହାର ପ୍ରଭାବ ଜର୍ମାନୀ କାର୍ ନିର୍ମାତାମାନେ ବହନ କରିଥିଲେ। ଏପରି ଅନିଶ୍ଚିତ ପରିବେଶରେ, ଭାରତ ଏବଂ ୟୁରୋପୀୟ ସଂଘ ମଧ୍ୟରେ ଏହି ଚୁକ୍ତିନାମା କେବଳ ଉଭୟ ଅର୍ଥନୀତିକୁ ମଜବୁତ କରିବ ନାହିଁ ବରଂ ଚୀନ ଏବଂ ଆମେରିକା ଉପରେ ନିର୍ଭରଶୀଳତା ହ୍ରାସ କରିବା ଦିଗରେ ଏକ ପ୍ରମୁଖ ପଦକ୍ଷେପ ପ୍ରମାଣିତ ହେବ।
ସୁରକ୍ଷା ପ୍ରସଙ୍ଗରେ ଜର୍ମାନୀ ଭାରତର ସମର୍ଥନ ଚାହୁଁଛି
ଜର୍ମାନୀ ଚାହୁଁଛି ଯେ ଭାରତ ରୁଷ ଉପରେ ର୍ନିଭରଶୀଳତା ହ୍ରାସ କରିବା ପାଇଁ ସୁରକ୍ଷା ପ୍ରସଙ୍ଗରେ ତାଙ୍କ ସହିତ କାମ କରୁ। ଏଥିପାଇଁ, ଦୁଇ ଦେଶ କୃତ୍ରିମ ବୁଦ୍ଧିମତ୍ତା (AI), ସୱାସ୍ଥ୍ୟ କ୍ଷେତ୍ର ଏବଂ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ଉପରେ ବୁଝାମଣାପତ୍ର (MoU) ସୱାକ୍ଷର କରିଛନ୍ତି। ପ୍ରଧାନମନ୍ତ୍ରୀ ମୋଦୀ ଏକ ମିଳିତ ସାମ୍ୱାଦିକ ସମ୍ମିଳନୀରେ କହିଛନ୍ତି ଯେ ଏହି ଚୁକ୍ତିନାମାଗୁଡ଼ିକ ପାରସ୍ପରିକ ସହଯୋଗକୁ ନୂତନ ପ୍ରେରଣା ଏବଂ ଶକ୍ତି ପ୍ରଦାନ କରିବ।
