ଜେନେଭା,୬।୪ : ଅନ୍ତର୍ଜାତୀୟ ସ୍ତରରେ ଭାରତକୁ ବଡ଼ ସଫଳତା ମିଳିଛି। ଚାରି ବର୍ଷ ପାଇଁ ମିଳିତ ଜାତିସଂଘର ପରିସଂଖ୍ୟାନ ଆୟୋଗକୁ ଭାରତ ନିର୍ବାଚିତ ହୋଇଛି। ଚାଇନା ସମେତ ଅନ୍ୟ ଦେଶକୁ ପଛରେ ପକାଇ ଭାରତ ଏହି ସଫଳତା ହାସଲ କରିଛି।
ଭାରତର ୫୩ ଭୋଟ ମଧ୍ୟରୁ ୪୬ ପାଇଛି। ଦକ୍ଷିଣ କୋରିଆ ଏସିଆ ପ୍ରଶାନ୍ତ ମହାସାଗରୀୟ ଦ୍ୱିତୀୟ ସଦସ୍ୟ ଭାବରେ ନିର୍ବାଚିତ ହୋଇଛି। ଗୁପ୍ତ ମତଦାନ ଦ୍ୱାରା ଭାରତ ନିର୍ବାଚିତ ହୋଇଥିବାବେଳେ ଆର୍ଜେଣ୍ଟିନା, ସିଆରପିଏଫ, ସ୍ଲୋଭେନିଆ, ୟୁକ୍ରେନ, ୟୁନାଇଟେଡ ରିପବ୍ଲିକ ଅଫ ତାଞ୍ଜାନିଆ ଏବଂ ଆମେରିକା ବିନା ନିର୍ବାଚନରେ ନିର୍ବାଚିତ ହୋଇଥିଲେ। ଚାରି ବର୍ଷର କାର୍ଯ୍ୟକାଳ ଆସନ୍ତା ବର୍ଷ ଜାନୁଆରୀ ୧ ରେ ଆରମ୍ଭ ହେବ ।
ଏହି ବଡ଼ ବିଜୟ ପାଇଁ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଟୁଇଟ କରି ଭାରତୀୟ ଦଳକୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ ପରିସଂଖ୍ୟାନ, ବିବିଧତା ଏବଂ ଜନସଂଖ୍ୟା କ୍ଷେତ୍ରରେ ଭାରତର ପାରଦର୍ଶୀତା ମିଳିତ ଜାତିସଂଘର ପରିସଂଖ୍ୟାନ ଆୟୋଗରେ ଆସନ ପାଇବାରେ ସାହାଯ୍ୟ କରିଛି। ଏସିଆ ପାସିଫିକ ଅଞ୍ଚଳରୁ କୁଏତ ଏବଂ ଦକ୍ଷିଣ କୋରିଆ ବର୍ତ୍ତମାନ ଜାପାନ ଏବଂ ସାମୋଆ ସହିତ ସଦସ୍ୟ ଅଛନ୍ତି। ଜାପାନ ଏବଂ ସାମୋଆର କାର୍ଯ୍ୟକାଳ ଆସନ୍ତା ବର୍ଷ ଏବଂ କୁଏତ ଏବଂ ଦକ୍ଷିଣ କୋରିଆର କାର୍ଯ୍ୟକାଳ ଚଳିତ ଶେଷ ହେବ।
ଏଥି ସହିତ ଭାରତ ମିଳିତ ଜାତିସଂଘର ନାର୍କୋଟିକ ଡ୍ରଗ କମିଶନ ଏବଂ ଏଚଆଇଭି / ଏଡସ (ୟୁଏନଏଆଇଡିଏସ) ପ୍ରୋଗ୍ରାମର ସଂଯୋଜକ ବୋର୍ଡର ସଦସ୍ୟ ଭାବରେ ନିର୍ବାଚିତ ହୋଇଛି। ନ୍ୟୁୟର୍କରେ ଥିବା ମିଳିତ ଜାତିସଂଘର ଭାରତର ସ୍ଥାୟୀ ମିଶନ ଏହି ସୂଚନା ଦେଇଛି। ନାର୍କୋଟିକ ଡ୍ରଗ କମିଶନ ଅନ୍ତର୍ଜାତୀୟ ଡ୍ରଗ୍ସ ନିୟନ୍ତ୍ରଣ ଚୁକ୍ତିଗୁଡିକର ପ୍ରୟୋଗ ଉପରେ ନଜର ରଖିଥିବାବେଳେ ୟୁଏନଏଆଇଡିଏସ ପ୍ରୋଗ୍ରାମ ସମନ୍ବୟ ବୋର୍ଡ ଏଚ.ଆଇ.ଭି. ଏଡସର ଅନ୍ତର୍ଜାତୀୟ ପ୍ରତିକ୍ରିୟାକୁ ସମର୍ଥନ କରିଥାଏ।
