ନୂଆଦିଲ୍ଲୀ,୧୮ା୫: ଆଜି ଭାରତର ପ୍ରଥମ ପରମାଣୁ ପରୀକ୍ଷଣର ୫୧ ତମ ବାର୍ଷିକୀ। ୧୯୭୪ ମେ’ ୧୮ରେ, ଦେଶ ପୋଖରାନରେ ପ୍ରଥମ ପରମାଣୁ ପରୀକ୍ଷଣ କରିଥିଲା। ଏହି ପରମାଣୁ ପରୀକ୍ଷଣ ଭାରତର ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ନେତୃତ୍ୱରେ କରାଯାଇଥିଲା। ରବିବାର କଂଗ୍ରେସ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ନେତୃତ୍ୱକୁ ପ୍ରଶଂସା କରି କହିଛି ଯେ, ପ୍ରଧାନମନ୍ତ୍ରୀ ପ୍ରତିକୂଳ ପରିସ୍ଥିତିରେ ମଧ୍ୟ ସାହସର ସହିତ କାର୍ଯ୍ୟ କରିଥିଲେ।
କଂଗ୍ରେସ ‘ଏକ୍ସ’ରେ ଲେଖିଥିଲା ୧୮ ମେ’ ୧୯୭୪ ଭାରତ ପାଇଁ ଏକ ସୁବର୍ଣ୍ଣ ଦିନ ଥିଲା କାରଣ ଦେଶ ଇନ୍ଦିରା ଗାନ୍ଧୀଙ୍କ ନେତୃତ୍ୱରେ ପ୍ରଥମ ସଫଳ ପରମାଣୁ ପରୀକ୍ଷଣ କରିଥିଲା। ଯାହାକୁ ‘ସ୍ମାଇଲିଂ ବୁଦ୍ଧ’ ନାମ ଦିଆଯାଇଥିଲା। ଏହା ସହିତ ଦଳ ଲେଖିଛି ଯେ ଏହି ପରୀକ୍ଷଣ ଦେଶର ବୈଜ୍ଞାନିକ କ୍ଷମତା ଏବଂ ଦୃଢ଼ ରାଜନୈତିକ ନେତୃତ୍ୱର ପ୍ରତୀକ ପାଲଟିଛି।
କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡ୍ଗେ ସୋସିଆଲ ମିଡିଆରେ ଲେଖିଛନ୍ତି ଯେ, ୫୧ ବର୍ଷ ପୂର୍ବେ ଭାରତ ପ୍ରଥମ ପରମାଣୁ ପରୀକ୍ଷଣ କରିଥିଲା ଏବଂ ଏପରି ପରମାଣୁ ପରୀକ୍ଷଣ କରି ଭାରତ ବିଶ୍ୱର ଷଷ୍ଠ ଦେଶ ପାଲଟିଥିଲା। ଖାର୍ଗେ ଆହୁରି ଲେଖିଛନ୍ତି, ‘ଆମର ବୈଜ୍ଞାନିକମାନଙ୍କ ପ୍ରତିଭା ଏବଂ ସମର୍ପଣ ବିନା ଏହି ସଫଳତା ଅସମ୍ଭବ ଥିଲା।’ ଆମେ ସମସ୍ତେ ତାଙ୍କ ନିକଟରେ କୃତଜ୍ଞ। ଏହା ପରେ, ସେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ କାର୍ଯ୍ୟକୁ ପ୍ରଶଂସା କରିଥିଲେ ଏବଂ କହିଥିଲେ ଯେ, ପ୍ରତିକୂଳ ପରିସ୍ଥିତିରେ ମଧ୍ୟ ସେ ତାଙ୍କର ସାହସ ଦେଖାଇ ଏହି ପରୀକ୍ଷଣକୁ ସଫଳ କରିଥିଲେ।
କଂଗ୍ରେସ ନେତା ରାହୁଲ ଗାନ୍ଧୀ ଫେସ୍ବୁକ୍ରେ ପୋଷ୍ଟ କରି ଲେଖିଛନ୍ତି, ଇନ୍ଦିରା ଗାନ୍ଧୀଙ୍କ ନେତୃତ୍ୱରେ ଭାରତ ୫୧ ବର୍ଷ ପୂର୍ବେ ପୋଖରାନରେ ଅପରେଶନ ‘ସ୍ମାଇଲିଂ ବୁଦ୍ଧ’ର ପରୀକ୍ଷଣ ସଫଳତାର ସହିତ କରିଥିଲା। ଏହା ପରେ ସେ ଲେଖିଲେ, ‘ମୁଁ ସେହି ପ୍ରତିଭାବାନ ବୈଜ୍ଞାନିକ ଏବଂ ଗବେଷକଙ୍କ ପ୍ରତି ମୋର ଗଭୀର କୃତଜ୍ଞତା ପ୍ରକାଶ କରୁଛି ଯାହାଙ୍କ ଉତ୍ସର୍ଗତା ଏହାକୁ ସମ୍ଭବ କରିଛି।’
ଏହି ପରମାଣୁ ପରୀକ୍ଷଣକୁ ସଫଳ କରିବା ପାଇଁ ଏକ ଦଶନ୍ଧିରୁ ଅଧିକ ସମୟ ଲାଗିଥିଲା। ଏହି ପରୀକ୍ଷଣର ସଫଳତାର ସମସ୍ତ ଶ୍ରେୟ ଦେଶର ବୈଜ୍ଞାନିକମାନଙ୍କୁ ଯାଉଛି। ବୈଜ୍ଞାନିକ ଏବଂ ରାଜନୀତିଜ୍ଞଙ୍କ ଅକ୍ଳାନ୍ତ ପରିଶ୍ରମ ଯୋଗୁଁ ହିଁ ଦେଶ ପରମାଣୁ ପରୀକ୍ଷଣ କରିବାରେ ସଫଳ ହୋଇଥିଲା। ୭୫ ଜଣ ବୈଜ୍ଞାନିକ ଏବଂ ଇଞ୍ଜିନିୟରଙ୍କ ଏକ ଦଳ ୧୯୬୭ ରୁ ୧୯୭୪ ପର୍ଯ୍ୟନ୍ତ ୭ ବର୍ଷ ଧରି କଠିନ ପରିଶ୍ରମ କରିଥିଲେ। ଏହା ପୂର୍ବରୁ, କେବଳ ଆମେରିକା, ରୁଷ, ଫ୍ରାନ୍ସ, ୟୁକେ ଏବଂ ଚୀନ, ଜାତିସଂଘ ସୁରକ୍ଷା ପରିଷଦର ସଦସ୍ୟଙ୍କ ପାଖରେ ପରମାଣୁ ଶକ୍ତି ଥିଲା।
